A O Sisimoga Leina la ga Keresete?
“Modimo le ōna o [godisitse Keresete] thata, me oa mo naea yeōna leina ye le hetañ maina aotlhe; Gore mañōlè aotlhe a khubamè ka leina ya ga Yesu, a dilō tse di kwa legodimoñ, le a dilō tse di mo lehatshiñ, le a dilō tse di kwa tlhatse ga lehatshe, Le gore diteme cotlhe di bolèlè ha Yesu Keresete e le Morèna, kgalalecoñ ea Modimo Rara.”—BAFILIPI 2:9-11.
MO DITEMANENG tse di fa godimo, moaposetoloi Paulo o ne a tlhalosa ka tshisimogo le tlotlo tseo di tshwanelang leina la ga Jesu. A o ‘khubama ka mangole’ mo leineng ja gagwe? A o itse “leina ye le hetañ maina aotlhe” leo Jehofa a le mo neetseng? Gompieno, makgolokgolo a didikadike a iphaka gore ke Bakeresete. A go ka bolelwa gore ‘ba khubama ka mangole’ mo leineng la ga Jesu? A re tlhatlhobeng leina leo mme re bone seo se kopanyelediwang mo go ‘khubameng ka mangole’ mo go le tlotleng.
Ke Leina la Mofuta Ofe?
Santlha, ke “leina” lefe leo le neng la neelwa Jesu? Ga se leina fela la gagwe la botho. Batho ba bangwe le bone ba ile ba bidiwa Jesu, jalo seo tota tota ga se “leina ye le hetañ maina aotlhe.” Mme ebile ga se leina la ga Jesu go ya ka botho jwa gagwe. Gone go boammaaruri, Jesu o ne a itsiwe jaaka mosupi yo o kwa pele-pele wa ga Jehofa mo lobopong lotlhe. (Tshenolō 3:14) Lefa go ntse jalo, o ne a ipapalela leina leo. “Leina ye le hetañ maina aotlhe” leno ‘le ne la newa’ Jesu ke Jehofa. Leina leo he, ke lefe? Mafoko mangwe a moperofeti Isaia a re thusa go araba seo. Makgolokgolo a dingwaga pele ga go tsalwa ga ga Jesu, Isaia o ne a kwala jaana kaga ene: “Gonne ñwana re mo tsalecwe, ñwana oa mosimane re mo neilwe; me pushō e tla nna mo lerudiñ ya gagwè: me leina ya gagwè le tla bidiwa Kgakgamaco, Mogakolodi, ModimoMothata, Rara oa Bosakhutleñ, Kgōsana ea Kagishō.”—Isaia 9:6.
“Leina” leo le raya eng? Le lebisitse boemong jo bo kwa godimo le taolong eo Jesu a neng a tla e neelwa e le gore a tle a diragatse thato ya ga Rraagwe. Ke go lemoga le go ineela mo taolong eno e e kwa godimo go bo mangole otlhe a tshwanetse go khubama. Ereka go ntse jalo, a re tlhatlhobeng thata thata direto tseno tse nne tse di umakilweng ke Isaia.
Ke ka ditsela dife Jesu a leng “Mogakolodi”?
Santlha, Isaia o ne a re leina la ga Jesu le ne le tla nna “Mogakolodi.” O ne a tla laolelwa go neela kgakololo e e gakgamatsang mo sethong. Pele ga a tla mo lefatsheng Jesu o ne a setse a ntse a direla jaaka Lefoko, kana mmueledi-mogolo wa ga Jehofa. (Yohane 1:1) Fa a ne a santse a le mo lefatsheng o ne a bua mafoko ao a neng a gogela batho botshelong jo ba sa khutleng—ruri e ne e le kgakololo e e molemo-lemo! Ka gone, Petere o ne a mo raya a re: “U na le mahoko a botshelō yo bo sa khutleñ.” (Yohane 6:68) Jesu ke ene wa konokono mo moseleng wa ga Jehofa wa puisano le batho. (Tshenolō 1:1) Go botlhokwatlhokwa ka mongwe le mongwe gompieno go reetsa mafoko a gagwe. Ke “tsela le boamarure, le botshelō.” (Yohane 14:6) Ga go na poloka epe e e ka bonwang ke bao ba ganang go reetsa “Mogakolodi” yono.
Ke ka tlhaloganyo efe Jesu a leng “Modimo Mothata”?
Isaia o ne a bolelelapele gape gore Jesu o ne a tla nna “Modimo Mothata.” Pele ga a tla mo lefatsheng o ne a le “Modimo” ka tlhaloganyo ya gore o ne a le “sechwanō sa Modimo o o sa bonweñ, e le èna motsalwa pele mo lobopoñ lotlhe.” (Yohane 1:1; Bakolosa 1:15) Morago ga a sena go swa jaaka motho le go tsosiwa jaaka moya o o sa sweng, ke Modimo ka tlhaloganyo ya gore mo mmeleng o abalana “Bomodimo sebele.”—Bakolosa 2:9; 1 Timotheo 6:15, 16.
Lefa go ntse jalo, go na le taolo eo e tsamaelanang mmogo le sereto se se reng “Modimo Mothata.” Mo Bibeleng banna bangwe ba ne ba bidiwa medimo. Ka baka lang? Ka go bo ba ne ba direla jaaka baatlhodi mo morafeng wa Iseraele. (Pesalema 82:1-6) Jesu, “Modimo Mothata,” ke Moatlhodi yo mogolo yo o tlhophilweng wa ga Jehofa. Ene ka boene o ne a tlhalosa gore seo se ne se rayang: “Rara ga a atlhole motho opè, me katlholō eotlhe o e neetse Morwa; Gore botlhe ba tlotlè Morwa hèla yaka ba tlotla Rara.”—Yohane 5:22, 23.
Gareng ga ditiro tsa katlholo tseo di neetsweng Jesu ke go atlhola phuthego ya gagwe—ka bobedi bao ba ileng ba swa pele ga go boa ga gagwe ka thata ya Bogosi le bao ba santseng ba tshela—mo lobakeng lwa go nna gone ga gagwe mo ‘motlheng wa bokhutlo.’ (Mathaio 24:3) O bile gape o atlhola merafe gompieno, a kgaoganya “dinku” le “dipodi.” Gape, o tla okamela letsatsi la dingwaga tse di sekete la katlholo ya setho sotlhe morago ga Aramagedona. Ruri ke “Modimo Mothata”!—Mathaio 25:31-46; Tshenolō 11:18; 1 Petere 4:17; Tshenolō 20:4, 5, 13.
Ke ka baka lang fa Jesu ka tshwanelo a bidiwa “Rara oa Bosakhutleñ”?
Jesu gape o ne a tshwanetse go nna “Rara oa Bosakhutleñ.” Seo se ne se ka nna jalo jang? Mme kana, Adame e ne e le ene rre wa ntlha wa lotso lwa motho. Lefa go ntse jalo, o ne a latlhegelwa ke paka ya go nna “Rara oa Bosakhutleñ” fa a sena go leofa. O ne a ka se tlhole a neela bana ba gagwe botshelo jo bo sa khutleng jaaka boswa. Jesu, mo letlhakoreng je lengwe, o ne a seka a leofa. Mme ka go ntshetsa setho botshelo jwa gagwe jo bo senang boleo setlhabelo, o ne a bulela bao ba neng ba bontsha tumelo tsela ya botshelo jo bo sa khutleng. (Yohane 3:16; 1 Yohane 2:2) Ka gone o tla ba neela botshelo jo bo sa khutleng joo Adame a neng a palelwa ke go bo ba neela. Ka jalo, Bibela e mmitsa “Adame oa moragō,” “mōea o o tshedisañ.” (1 Bakorintha 15:45) Ka tshwanelo o bidiwa “Rara oa bosakhutleñ” wa lotso Iwa motho Iwa isagwe lo lo itekanetseng.
Ke jang Jesu a tlatsang sebaka sa go nna “Kgōsana ea Kagishō”?
Labofelo, Isaia o ne a bolela gore leina la ga Jesu le ne le tla nna “Kgōsana ea Kagishō.” O ne a tla nna Kgosi, a lere kagiso mo babusiweng ba gagwe. (Pesalema 72:6, 7) Morago ga tsogo ya gagwe Jesu o ne a bontsha bogolo jwa thata ya gagwe fa a ne a re: “Taolō eotlhe ke e neilwe kwa legodimoñ le mo lehatshiñ.” (Mathaio 28:18) Taolo e kgolo eno e ne e akaretsa go busa jaaka Kgosi mo phuthegong ya gagwe fa e sale ka 33 C.E. le godimo ga Bogosi jwa Modimo fa e sale 1914. (Bakolosa 1:13; Tshenolō 11:15) Jesu o tla lere kagiso mo lefatsheng leno ka go senya baba ba Modimo le ka go busa ka tshiamiso mo bathong ba ba tshiamo.—Pesalema 37:10, 11; 72:7, 8; Daniele 2:44.
Go Lemoga Leina la ga Jesu
Ka gone go bonwa sentle gore “leina ye le hetañ maina aotlhe” le kopanyeletsa boemo, thata kana taolo eo Modimo a neng a e neela Jesu. Ruri le heta maina otlhe ka jaana go se sebopiwa sepe se se kileng sa neelwa taolo e e kwa godimo e e ntseng jalo. Ke Jesu fela yo go neng ga twe ka ene: “Ga go nna poloka mo go ōpè o sele; le gōna ga go leina lepè le sele ha tlhatse ga legodimo, ye batho ba le neilweñ, ye re nang le go bolokwa mo go yeōna.” (Ditihō 4:12) Mme ke Jesu fela yo o neng a ka re: “Ha lo ntōpa señwe hèla ka leina ya me, shōna ke tla se diha.”—Yohane 14:14.
Ka jalo, moaposetoloi Paulo o ne a tswelelapele ka go re: “Gore mañōlè aotlhe a khubamè ka leina ya ga Yesu, a dilō tse di kwa legodimoñ, le a dilō tse di mo lehatshiñ, le a dilō tse di kwa tlhatse ga lehatshe.” (Bafilipi 2:10) Ee, le e leng “dilō tse di kwa legodimoñ,” baengele ba ba ikanyegang, ba dumalana le boemo jwa gagwe jo bo kwa godimo le taolo. (Bahebera 1:4-6) “[Ba ba] kwa tlhatse ga lehatshe” ba tla ithuta kaga “leina” la ga Jesu fa ba nna le karolo mo tsogong ya selefatshe. Ke fela go bao ba ‘khubamang ka mangole’ ka go sisimoga taolo ya gagwe e a e neilweng ke Modimo tsogo eo e tla itshupang e le ‘tsogelo ya botshelo.’—Yohane 5:29; Tshenolō 20:12.
“Dilō tse di mo lehatshiñ” le tsone—ke gore, rona ba ba santseng ba tshela gone jaanong—ba tlamega go ‘khubama ka mangole’ mo leineng la ga Jesu fa re eletsa go bona botshelo jo bo sa khutleng. Seno se raya go reetsa Jesu, Mogakolodi, le go dirisa kgakololo ya gagwe. (Mathaio 7:24, 25) Go raya go bontsha tumelo mo go ene e le gore maleo a rona a tle a itshwarelwe. Ka gone e tla re kgabagare a nne Rara wa Bosakhutleng wa rona.
Mme segolo bogolo, go raya go ineela gone jaanong go Moatlhodi yo o tlhomilweng ke Modimo le Kgosi, Jesu. Re tshwanetse ra itshupa re le “dinku”—e seng “dipodi”—ka ditiro tsa rona tebang le bomonnaa-kgosi. Re tshwanetse ra rera mafoko a a molemo kaga Bogosi jwa “Kgōsana ea Kagishō” eno go ba bangwe. (Mathaio 24:14; 25:34-40) Mme re tshwanetse ra utlwa melao ya Bogosi jwa gagwe fa re ntse re itlhaotse mo dikgannyeng tsa merafe ya lefatshe jeno.—Yakobe 2:8; 1 Bakorintha 6:9, 10; Yohane 15:19.
Jehofa o laleditse babusi ba lefatshe go ineela tlase ga Jesu. (Pesalema 2:10-12) Lefa go ntse jalo, ba a gana, mme mo mabakeng a le mantsi ba ganetsa Bakeresete bao ba ineelang go ene. Ka gone ‘go khubama ka mangole’ mo leineng la ga Jesu ga se ka metlha go leng motlhofo. Jesu ka boene o ne a tlhagisa a re: “Lo tla ilwa ke merahe eotlhe ka ntlha ea leina ya me.”—Mathaio 24:9.
Bakeresete ba ba ikanyegang ba itemogela kilo eo fa ba ganelela mo go tlotleng Jesu le go bontsha tshisimogo e e tshwanetseng mo maatleng le mo taolong tsa ga Keresete. Lefa go le jalo, ke tshiamelo e e itumedisang ebile e solofetsa dituelo tse dikgolo go fitlhelwa gareng ga bao ba lebisiwang go Bafilipi 2:11: “Diteme cotlhe di bolèlè ha Yesu Keresete e le Morèna, kgalalecoñ ea Modimo Rara.”