Lefoko la Modimo Le Tshedile
Basadi ba Babedi Ba Ba Nang le Bothata
Monna yo o tshwaregileng mo bodiheding ke moaposetoloi Paulo. Mme basadi ba babedi ba ba nang nae ke Euodia le Sentuke, maloko a phuthego ya Bokeresete ya lekgolo la ntlha la dingwaga mo motseng wa Filipi.
Dingwaga dingwe morago ga seno, fa Paulo a ne a le kwa Roma, o ne a kwalela phuthego ya Filipi a re: “Thusa basadi bauō, gonne ba kile ba diha le nna mo Mahokuñ a a Molemō.” (Bafilipi 4:3) Ke ka ntlha yang fa Paulo a ile a kwala seno ka ga Euodia le Sentuke?
Paulo o ne a utlwaletse gore bothata bongwe bo ne bo ile jwa tsoga magareng ga basadi ba babedi bao, mme ba ne ba sa tshedisane sentle. Jalo a kwala: “Ke laea Euodia, ke laea Sentuke, gore ba nnè pelo ñwe hèla mo Moreneñ.” (Bafilipi 4:2) Bibela ga e bolele gore bothata jwa bone e ne e le bofe, mme bo ne bo le masisi ka mo go lekaneng mo Paulo a neng a kgona le go bo utlwalela a le makgolo a dimmaele kgakala-kgakala mo Roma. Gongwe bobedi jwa bone ba ne ba fufegelelana. Kana gongwe ba ne ba ile ba tsena mo kgannyeng e e masisi, jaaka fa go bonwa fa, mme ba sa tlhole ba buisana mmogo. Lefa bothata e ka tlhola e ne e le eng, Paulo o ne a ba neela kgakololo mo lokwalong leo le neng le lebisitswe phuthegong yotlhe.—Bafilipi 1:1.
Mme kana, a Euodia le Sentuke ba ne ba arabela kgakololong mme ba fedisa diphapaang tsa bone? Bibela ga e bolele. Mme ereka jaana e ne e le basadi ba ba molemo bao pele ba neng ba dira mmogo le Paulo mo bodiheding, re ka gopola fela kafa ba ileng ba rakana mmogo mme ba feta ba tlhamalatsa bothata jwa bone ka moya wa lorato. Mo letlhakoreng je lengwe, ba ka bo ba ile ba kgwaraladiwa ke kgakololo e e neng ya neelwa. Ba ka bo ba ile ba nna le boikutlo jwa gore: ‘Paulo o tsere kae thata ya go senola bothata jwa rona fa pele ga phuthego yotlhe?’ Mme jalo diphapaang tsa bone di ka bo di ile tsa se ka tsa rarabololwa, mme tsa ba tsa nna tsa befela kwa pele. Go tweng fa seno se ka bo se ile sa diragala?
Mme kana, lekwalo leno la Bafilipi le ne la kwalwa mo e ka nnang ka 60 C.E. Dingwaga di sekae moragonyana pogiso e kgolo e ne ya tsogela Bakeresete mo Roma. Go tweng fa e le gore pogiso eno e ne e ka bo e ile ya fetela le kwa Filipi, mme Euodia le Sentuke ba latlhelwa mo kgolegelong, fela jaaka Paulo le Silase ba ne ba ile ba latlhelwa mo kgolegelong gone koo dingwaga dingwe tse di fetileng? (Ditihō 16:19-34) Go tweng fa e le gore ba ka bo ba ile ba tsenngwa mo kgolegelong e le nngwe le mo ntlwaneng e le nngwe fela?
Fa ba ne ba sa utlwane, mme ebile diphapaang tsa bone di ne tsa golela mo goreng ba ilane, go ka bo go diragetseng? Ba ka bo ba ile ba digana mo semoyeng, gongwe ba bile ba senyetsana kamano ya bone le Jehofa Modimo. Abo seo se ne se tla hutsafatsa ruri! Mme abo ruri go ka hutsafatsa jang gompieno fa re sa ratane ka lorato lo lo tukang fa “sepitla se segolo” se tlela tsamaiso eno ya dilo!—Mathaio 24:21.