A Re Tshela mo Metlheng ya Bofelo?

Go simolola ka tokololo e, Tora ya Tebelo e tla gatisa dikarolo di roba bobedi tse di tlhomaganang kaga metlha ya bofelo

KE MANG yo botshelo jwa gagwe bo iseng bo ke bo amiwe ke ntwa? Ke mang yo iseng a ke a utlwe maduo a dintwa tse pedi tsa lefatshe mo lekgolong leno la dingwaga—motlha wa thubakanyo, tlhoka-pabalesego le poifo e e beilweng godimo ga setho sotlhe? Ke mang yo o falotseng mathata a a nnileng gone ka ntlha ya itsholelo e e wetseng kwa tlase, mekgweleo e e oketsegang ya tsa madi go reka ditlhabani tsa sesole kana boipakanyetso jwa ntwa? Ke mang yo botshelo jwa gagwe jaanong bo seng kotsing ka matshosetsi a magolo a ka metlha a ntwa ya “nuclear”?

Ekane e tlhabanwa ka borumolang kana ka boiphemelo, ka mabaka a a siameng le a a sa siamang, ntwa e ile ya nna sesinyi sa ditlhabologo. Go latlhegelwa ke matshelo ga batho ka bogone fela go ile ga gola ka mo go boitshegang. Jaaka go ne ga lekanyediwa ke ba Norwegian Academy of Sciences ka 1969, lefatshe le itsile fela dingwaga tsa kagiso di le 292 fa e sale 3600 B.C.E., lemororo dintwa tse 14 531 di ne tsa lowa.

Lekgolo la rona, bogolo fa e sale ntwa ya ntlha ya lefatshe ka 1914, le ne la bidiwa “motlha wa thubakanyo.” Mabapi le one, James Reston o ne a kwala go The New York Times ya Motsheganong 30, 1982: “Leno le ne la nna lekgolo la dingwaga le le tletseng ka madi mo historing ya ditso tsa motho. Le ile la boga ka dintwa tse 59 magareng ga merafe ka dimilione tse 29 tsa batlhabani ba ba suleng, le dintwa tsa selegae di le 64 tse go gobaditsweng ba ba ka nnang dimilione tse thataro—re sa umake masome-some a dimilione tsa ba eseng masole ba ba neng ba bolaiwa mo letlhakoreng le lengwe. Se ke se se kaiwang ke ntwa.”

Se se boitshegang bogolo ke matswela a ntwa e nngwe ya lefatshe e baeteledipele ba lefatshe le baitseanape ba nnileng ba lebisa go yone kgapetsa-kgapetsa jaaka Hara-Magedona. (Tshenolō 16:14, 16) Ba ile ba le e leba ga motlhofo fela jaaka kudumedi e e iteretsweng ke motho, lemororo Bibela e amanya Hara-Magedona le “[ntwa] ea letsatsi ye legolo ya Modimo, Mothataeotlhe.” Ke ntwa ya gagwe go tlosa boikepo mo lefatsheng le go tlhoma Thulaganyo e Ntšha ya tshiamo ya batho ba ba ratang kagiso.

Tsholofelo eno e e neetsweng ke Modimo ya Thulaganyo e Ntšha ya tshiamo e tshegeditse banna ba tumelo go tswa bogologolong. (Bahebera, kgaolo 11) Bano ba ile ba lebelela pele ka go tlhoafalela nako ya fa Modimo o tla ba gakologelwang le go ba tsosetsa botshelong jo bo sa khutleng. (Yobe 14:13, 14; Pesalema 37:29) Basiami bao ba ne ba ikanya mo maatleng a Modimo go ba tsosetsa mo kgolokweng e e phepafaditsweng koo o tla ‘khutlisang ditlhabano le kwa bokhutlong jwa lefatshe.’—Pesalema 46:9.

Mme ga ba a ka ba itse gore ke leng dilo tseno di neng di tla diragala. Nako eo Modimo a neng a tla tsaya kgato e ne ya lebisiwa ga motlhofo fela jaaka ‘motlha wa bokhutlo’ kana “mo metlheñ e e tla tlañ kwa pele pele”. (Daniele 11:40; Isaia 2:2) Ga go gakgamatse, he, go bo barutwa ba ga Jesu ba ne ba mo atamela kwa bothokong mme ba mmotsa ba re: “Dilō tse di tla dihala leñ? Le seshupō e tla nna eñ sa go tla ga gago, le sa bokhutlō yoa lehatshe?”—Mathaio 24:3.

Selo sa ntlha se Jesu a neng a se umaka e le seo e neng e tla nna tshupo ya go atamela ga bokhutlo e ne e le: “Lo tla utlwèla dintwa, le medumō ea dintwa.” (Mathaio 24:6) A lebaka la go bo re tshela mo “lekgolong la dingwaga le le tletseng ka madi mo historing ya ditso tsa motho” e ka nna ya bo e le tiragatso ya sesupo se Jesu a neng a se neela? A eleruri re tshela mo metlheng ya bofelo?