Latlhela Ditlhobaelo tsa Gago Mo Go Jehofa

A MONNA yo o dirileng kgokahalo le polao o ka nna le tlhobaelo? Ele ruri, fa e le gore o na le segakolodi o tla nna le yone. Kgosi Dafide o ne a na le segakolodi. Lefa go le jalo, fa a ne a gateletswe ke kgotelo, kgosi eno ya bogologolo ya Mohebera e ne ya dira kgokahalo le mosadi yo o neng a bidiwa Betheshebe. Seemo se ne sa nna matswakabele fa a sena go ithwala, mme kwa bofelelong a ikutlwa a patelesega go rulaganyetsa loso lwa monna wa gagwe mme a tle a mo nyale ka boene.

Fa a sena go itharabologelwa, a o ka akanyetsa ka tlalelo, pogo ya segakolodi e a tshwanetseng a bo a nnile le yone? Tota, ga re a tshwanela go go akanya, ka go bo Dafide o a go re bolelela ka boene. E ne e le tlhomagano ya ditiragalo tseno tse di botlhoko tse di mo gogetseng go kwala Ps 51 pesalema ya bo-masome a matlhano le bongwe.

Dafide o ne a dirisana jang le tlalelo eo yotlhe? Pesalema e re bolelela gore ka tlhamalalo o ne a ipolela go Modimo wa gagwe, Jehofa, go seo a se dirileng mme a bontsha boikwatlhao jo bo boteng le jwa pelo. Go tswa foo o ne a kopa thuso ya Modimo go tlhagolela moya o o farologaneng. O ne a re: “Modimo, bopa pelo e e itshekileñ mo go nna; u bo u shahatsè mōea o o siameñ mo teñ ga me.” (Pesalema 51:10) Ka tsela eno, o ne a ‘latlhela tlhobaelo yotlhe ya gagwe mo go Jehofa.’—1 Petere 5:7.

A Modimo o ne a tla thusa mongwe yo o dirileng masula a a ntseng jalo? Dafide o ne a tlhomamisega gore o tla mo thusa. O ne a re: “Ditlhabèlō tsa Modimo ke mōea o o phatlogileñ: pelo e e phatlogileñ, e e ñomogileñ, ga u ketla u e nyatsa, Modimo.” (Pesalema 51:17) Ditiragalo di bontsha gore mo botshelong jotlhe jwa gagwe Dafide o ne a boga matswela a seo a se dirileng. Mme ka ntlha ya boikwatlhao jwa gagwe jwa pelo, Mmopi wa gagwe o ne a seka a mo tlogela. O ne a fiwa thuso go emelana le ditlhobaelo tsa gagwe.

Re ka ne re se ka ra bolaya. Lefa go le jalo ga go ope wa rona yo o senang ditlhobaelo tsa mofuta mongwe o o rileng. Rotlhe re a leofa, mme segakolodi se se maswe ke mokgweleo o mogolo. Ka mo go oketsegileng, mo e ka nnang mongwe le mongwe o tshwenyega ka botsogo, tlhatlogo ya tsa botshelo, gongwe le eleng go godisa bana, tiro, mathata a go dirisana le ba bangwe, bokebekwa, sekoloto, le dilo tse di tshwanang. A o leka go rwala matshwenyego ao otlhe ka bowena? Ele ruri, ga o a tshwanela go go dira. O tla itumela fa o latela kgakololo eno ya Dikwalo: “Latlhèla morwalō oa gago mo go Yehofa, me o tla gu kokotletsa: ga a ketla a leseletsa mosiami gopè go tshikiñwa.”—Pesalema 55:22.

Kafa go ka Kopiwang Thuso mo go Jehofa

Re ka latlhela morwalo wa rona jang mo go Jehofa? Mme kana, re tshwanetse go mo rapela mme ra buisana le ene ka ditlhobaelo tsa rona. Buka ya ga Diane e neela kgakololo e e molemo ka ga se. E re bolelela gore: “U ikanyè Yehofa ka pelo eotlhe ea gago, me u se ka ua ikaèga tlhaloganyō ea gago hèla.” (Diane 3:5) Ka jalo, fa re batla thuso ya ga Jehofa, re tshwanetse go ikaega ka botlhale jwa gagwe, eseng jwa rona. Ka dinako tse dingwe re tshwanetse go ithuta thuto e.

Ka sekai, mo lefatsheng je lengwe, Bakeresete ba ne ba lebane le pogiso e e botlhoko. Go ya ka pego, lwa ntlha ba ne ba rapelela thuso ya Modimo, mme ba sa tlhaloganye. Ba ne ba sa tlhaloganye gore ke ka ntlha yang ba tshwanetse go lebana le maitemogelo a a ntseng jalo mme ba leka go bolelela Jehofa gore ba ne ba batla a ba direla eng.

Lefa go ntse jalo, ba ne ba nonofa mme ba ithuta go leba go bogela tshiamo jaaka tshiamelo. Ka gone, ba ne ba tshwana le baaposetoloi ba pele bao, fa ba sena go betswa ke baeteledi pele ba Sejuda, “ba cwa ha pele ga lekgotla, ba itumèla ka ba kailwe chwanèlō ea go tlotlololwa ka ntlha ea Leina.” (Ditiho 5:41) Jaanong Bakeresete bano ba segompieno ka bopelotelele ba ineela ka thuso ya Modimo go pogiso lefa e ka nna efe e Satane a e koegelang mo go bone. Ba ikanya mo go Jehofa go dira dilo ka tsela e e leng ya gagwe mme ka pelotelele ba letela nako e e leng ya gagwe go ba golola. Ka tsholofelo ba latlhela ditlhobaelo tsotlhe tsa bone mo go ene.—Diane 14:26.

Ka mo go oketsegileng, go latlhela ditlhobaelo tsa rona mo go Jehofa go tlhoka tumelo ya gore Jehofa o ka ebile o tla re thusa. Mosadi mongwe o ne a ithuta thuto eno sentle. O ne a boga ditlhobaelo ka ntlha ya gore, lefa a ne a eletsa go direla Jehofa, o ne a tshwakgotswe ke go goga motsoko. O ne a rapelela thuso mme a tswelela fela ka go goga. Nako nngwe morago o ne a kgona go bolela ka boitumelo gore: “Kwa bofelong ke ne ka khutlisa go goga!” Ke ka ntlha yang a ne a ka se eme pele? O ne a dumela ka gore: “Ke ne ka rapelela thuso ya Modimo, mme tota ke ne ke sa dumele gore o ka nthusa.” E ne e le fela fa a ne a kopa ka tumelo a neng a amogela thuso e a neng a e tlhoka.—Bahebera 11:6.

He, fa re eletsa gore Jehofa a re thuse ka ditlhobaelo tsa rona, go na le dilo tse re tshwanetseng go di dira. Jesu o ne a bontsha seno, ka gore: “Tlañ kwano go nna lotlhe ba lo lapileñ, ba lo imèlwañ, me ke tla lo lapolosa. Ipeleseñ yokwe oa me, lo ithutè ga me; gonne ke bonolō le boiñōtlō mo peduñ: me lo tla bōnèla meōea ea lona tapologō.”—Mathaio 11:28, 29.

Go na le polelo e e reng, ‘Modimo o thusa ba ba ithusang.’ Mafoko a a fa godimo a ga Jesu a supa gore, tota, ‘Modimo o thusa ba ba iketleeleditseng go thusa ba bangwe.’ Jesu o ne a neelana ka tapologo—kgololo mo ditlhobaelong—go bao ba neng ba iketleeditse go ‘ipelesa jokwe,’ go raya, go ineela go kaelo ya ga Keresete le go direla Modimo le baagelani ba bone fela jaaka go dirile Jesu.—Mathaio 9:35-38; Yakobe 1:27; 1 Yohane 3:17.

Jehofa O Thusa Jang?

Ka jalo he, fa re boga tlhobaelo e kgolo mme re rapela Modimo ka tumelo e e tletseng, mme re bontsha gore tumelo eo ke ya mmannete ka go leka go dira go rata ga gagwe, go mo direla le go thusa baagelani ba rona, re ka lebelela thuso ya mofuta ofe?

E ka nna ya nna gore Modimo o tla phimola gotlhelele bothata jo bo re tsosetsang tlhobaelo. Seo se diragetse nako le nako. Kana e ka nna ya nna gore o tla re neela botlhale jo bo tlhokafalang go rarabolola bothata ka borona kana go bona tsela e e siameng ya go bo rarabolola. Go tswa foo re tla itemogela boammaaruri jwa seane sa Bibela: “Eo o ikanyañ pelo ea gagwè ka esi ke seeleele; me eo o tsamaeañ ka botlhale, o tla gololwa.”—Diane 28:26.

Re ka bona jang botlhale joo jwa bomodimo? Go nna teng mo dipokanong tsa batho ba ga Jehofa le go bala Bibela le dikgatiso tsa Bibela ke ditsela tse pedi tse di tlang mogopolong. Fela jaaka mmè wa Mokeresete yo o neng a nna le tlhobaelo e kgolo ka go bo monna wa gagwe a ne a nna a tagilwe a tlhalositse a re, “Go bala Tora ya Tebelo le go e ithuta le go e dirisa mo botshelong jwa me go nthusitse fela thata.”—Bahebera 10:24, 25; Pesalema 119:97-104.

Kana, Jehofa o ka re thusa ka bakaulengwe ba rona ba Bakeresete. Mogolwane mongwe o ne a amogela go batho bangwe ba babedi mo phuthegong ya gagwe lekwalonyana lo lo bothitho loo karolo ya lone e balegileng ka gore: “Re go lebogela makgetlo a mantsi a o neng wa re reetsa le go re thusa ka mathata a rona a botho, wa re kgothatsa fa re ne re hutsafetse, wa re etela fa re lwala, wa tla nako nngwe le nngwe fa re ne re go batla wa ba wa nna masigo otlhe fa re ne re le kwa dikokelong fa malapa a rona a ne a go tlhoka. Re leboga Jehofa go nna le mokaulengwe yo o re tlhokomelang thata fela jaaka o dira.”

Ka jalo, fa o na le ditlhobaelo, ke ka ntlha yang o sa di abalane le ba ba godileng mo phuthegong ya gaeno? Gongwe Jehofa o ka go thusa ka bone, mme o tla bona boammaaruri jwa seane sa bogologolo: “Tsala e rata motho ka metlha eotlhe, le morwa rra motho o tsalecwe motlha oa pitlaganō.”—Diane 17:17.

Mme kana, ga se ka metlha Jehofa a tla tlosang mathata a a re leretseng tlhobaelo. Mme ka go re nonotsha ka tiriso ya Bibela, moya o o boitshepo kana bakaulengwe ba rona ba Bokeresete, o re thusa gore re lebe mathata sentle mme re dirisane le one ka botlhale. Ka tsela e, re ka itemogelela se moaposetoloi Paulo a neng a se bolela: “Nka diha dilō cotlhe ka èna eo o nnonotshañ.” (Bafilipi 4:13) Ka gone lefa mathata a sa ntse a le gone, Jehofa Modimo o boloka tsholofetso ya gagwe: “Ga nketla ke gu tlhōkahalèla gopè, le gōne ga nketla ke gu latlha gopè.”—Bahebera 13:5.

Alma o ne a fitlhela seno se le boammaaruri. Ke mosadi wa Mokeresete yo mo dingwageng tse di fetileng o neng a le mo kotsing ya koloi e e mo tlogetseng a sule ditokololo go tswa mo lethekeng go ya kwa tlase. O na le botlhoko jo bogolo thata, mme kitso ya gore Modimo o tla tloga o fedisa bolwetse le tshotlego ke kgomotso le thuso go ene. Mo nakong eno, o bolela ka gore: “Ke rapela Jehofa gore a nthuse letsatsi le letsatsi go go itshokela. Go tswa foo, fa letsatsi leo le fetile, ke atametse ka letsatsi le le lengwe!”

Alma le ka motlha ga a ke a tlhaela pokano ya phuthego ya Bokeresete, mme o dirisa sebaka sengwe le sengwe se se mmulegetseng go abalana le ba bangwe tsholofelo e a nang le yone ka ga isagwe. Ka tsela eno o utlwa kemo nokeng ya ga Jehofa jaaka a latlhela mekgweleo ya gagwe mo go ene.

Ekane ke thuso efe e Jehofa o e neelang, re ka tlhomamisega gore ke e re e tlhokang, mme e lekanetse. Moaposetoloi Paulo ka tsholofelo o ne a ka re: “Me rea itse ha dilō cotlhe di dihisanya mmōgō go dihèla ba ba ratañ Modimo molemō.” (Baroma 8:28) Le eleng mo pogong e kgolo, go ka kgonagala gore re itemogele thuso ya ga Jehofa Modimo. Paulo o ne a re bolelela: “Lo se ka loa tlhobaediwa ke sepé; me mo diloñ cotlhe a ditōpō tsa lona di itsisiwè Modimo ka thapèlō le kokotlèlō, di na le tebogo. Me kagishō ea Modimo e e hetañ tlhaloganyō eotlhe, e tla dibèlèla dipelo tsa lona le megopolō ea lona mo go Keresete Yesu.”—Bafilipi 4:6, 7.

Ka jalo, ekane ditlhobaelo kana mekgweleo ya rona ke eng, a ka tsholofelo re lateleng kgakololo ya ga moaposetoloi Petere: “Ke gōna ikokobeletseñ ha tlhatse ga lecōgō ye le nonohileñ ya Modimo, gore o tlo o lo goletsè mo lobakeñ lo e leñ lōna; Lo nntse lo latlhèla tlhobaèlō eotlhe ea lona mo go ōna, ka oa lo babalèla.”—1 Petere 5:6, 7.

[Lebokoso mo go tsebe 20]

Jehofa o solofeditse gore thusa go sikara mekgweleo ya rona. A o na le mangwe a mathata a a latelang:

◻ Bolwetse?

◻ Khutsafalo?

◻ Segakolodi se se molato?

◻ Go ikutlwa o sena mosola?

◻ Tlhaelo ya boikgapo?

◻ Pogiso kana kgatelelo?

◻ Letlhoo le le tlisiwang ke lotso, setlhopha sa loago, kana bong?

◻ O imetswe ke mathata a letsatsi le letsatsi?

◻ O tshwenyega ka isagwe?

◻ Bothata jwa go dirisana le batho ba ba rileng?

Fa go le jalo, ke ka ntlha yang o a leka o le nosi? Ditlhobaelo tse di ntseng jalo di motlhofo thata go sikarwa fa re amogela thuso ya ga Jehofa.