Goreng Batho Ba se Na Botho?—Baebele e a Reng ka Kgang Eno?

Batho gompieno ga ba na botho. Balwetse ba omanya dingaka; batho ga ba tlotle badiri ba ba ba thusang kwa diresetšhurenteng; ga ba tlotle badiri ba ba ba thusang mo difofaneng; bana ba sekolo ba sotla barutabana ba bone, ba a ba tshosetsa e bile ba a ba tlhasela; boradipolotiki bangwe ba dira dilo tse di tshosang mme ba bangwe bone ba leka ka bojotlhe go itira ba ba siameng.

Re ka ikanya Baebele go re bolelela gore boitshwaro jo bo siameng ke bofe. Gape e re bolelela go goreng batho ba se na botho gompieno.

Goreng batho ba se na botho?

Batho ba le bantsi mo lefatsheng ga ba tlhole ba na le botho kana boitshwaro jo bo siameng.

•  Go ya ka potsolotso e e ileng ya dirwa kwa America bosheng jaana ke khampani nngwe e e bidiwang Gallup, batho ba ile ba re fa ba leba kwa morago dingwaga di le 22 tse di fetileng, ba lemogile gore botho bo fokotsegile go feta le fa e le leng pele.

•  Mo potsolotsong e nngwe go ile ga botsolodiwa batho ba le 32 000 mo dinageng di le 28, mme diperesente di le 65 di ile tsa bua se se tshwanang.

Baebele e ile ya bolelelapele ka boitshwaro jo re bo bonang gompieno.

•  “Mo malatsing a bofelo, go tla nna le dinako tse di thata e bile di le kotsi. Gonne batho ba tla ikakanyetsa ba le bosi, ba rata madi, ba ikgantsha, ba le mabela, ba tlhapatsa, ba sa utlwe batsadi, ba sa leboge, . . .  ba sa rate ba bangwe, [e bile] ba sa ithibe mo go sepe.”—2 Timotheo 3:1-3.

Go ithuta mo go oketsegileng gore boporofeti jono bo diragadiwa jang, bala setlhogo se se reng “Did the Bible Predict the Way People Think and Act Today?”

Kaelo e o ka e ikanyang

Le fa gone batho mo lefatsheng ba sa tlhole ba na le botho jaaka pele, dimilione tsa batho di thusitswe ke Baebele gore ba nne le boitshwaro jo bo siameng. Kgakololo ya yone ka boitshwaro “ka metlha e ka ikanngwa, gone jaanong le ka bosakhutleng.” (Pesalema 111:8) Bona dikai di le mmalwa:

•  Se Baebele e se buang: “Lo tshwanetse go direla batho dilo tsotlhe tse lo batlang ba di lo direla.”—Mathaio 7:12.

  Se e se kayang: Re tshwanetse go dirisana le ba bangwe sentle le ka tlolo fela jaaka re batla gore le bone ba dirisane le rona ka tsela e e tshwanang.

•  Se Baebele e se buang: “E re ka jaanong lo latlhile maaka, a mongwe le mongwe wa lona a bue boammaaruri le moagelani wa gagwe.”—Baefeso 4:25.

  Se e se kayang: Re tshwanetse go ikanyega mo go sotlhe se re se buang le se re se dirang.

Go ithuta mo go oketsegileng ka kgang eno bala:

•  Tora ya Tebelo ya setlhogo se se reng “Re ka Bona Kae Kgakololo E re Ka e Ikanyang?”

•  Bala le setlhogo se se reng“Go Itshokelana—Kafa Baebele e ka Thusang ka Gone .”