Dinaga di Latlhegetswe ke Ditrilione mo Dintweng—⁠A di Latlhegetswe ke Madi Fela?

Go dirisiwa madi a le mantsi thata mo ntweng.

•  “Sesole mo lefatsheng lotlhe se ile sa dirisa madi a ka nna ditrilione di le 2.2 (didolara tsa Amerika) mo dintweng. Ga go ise go tsamaye go dirisiwe madi a makalo go tla go fitlha ga jaana.”—The Washington Post, February 13, 2024.

Dinaga ga di a latlhegelwa ke madi fela. Akanya ka sekai seno: Ntwa ya kwa Ukraine.

•  Masole. Go fopholediwa gore mo dingwageng tse pedi tse di fetileng masole a ka nna 500 000 a bolailwe kgotsa a ile a gobala kwa ntweng.

•  Baagi. Go ya ka United Nations batho ba ka nna 28 000 ba ile ba bolawa kgotsa ba gobala mo ntweng eo. Le fa go ntse jalo, letona lengwe la UN le ile la re: “Ga re kgone go itse ka botlalo palo ya batho ba ba amilweng ke ntwa eno.”a

Dintwa di ama batho ka tsela e kgolo le e e utlwisang botlhoko.

•  Dimilione di le 114. Eno ke palo ya batho ba ba ileng ba tshwanelwa ke go fudusiwa ka ntlha ya ntwa le thubakanyo mo lefatsheng lotlhe go simologa ka September 2023.

•  Dimilione di le 783. Eno ke palo ya batho ba ba amiwang ke tlhaelo ya dijo. “Dintwa di dira gore go nne le tlhaelo ya dijo, mme diperesente di ka nna 70 mo lefatsheng lotlhe tsa batho ba ba amiwang ke tlhaelo ya dijo ba nna kwa dinageng tse go nnang go na le dintwa le thubakanyo kwa go tsone.”—World Food Programme.

A dintwa di tla fela? A re ka solofela gore go tla nna le kagiso? A go tla nna le nako e go tla bong go se na ope yo o humanegileng mme dijo e le ntletsentletse? Baebele e a reng?

Nako ya dintwa

Baebele e ile ya re go tla nna le dintwa mo lefatsheng lotlhe, mme e ile ya tshwantsha ntwa le mopalami wa pitse.

•  “Mme ke ne ka bona pitse e nngwe e e bohibidu jwa molelo e tla, mme yo o e palameng o ne a newa taolo ya go tlosa kagiso mo lefatsheng gore batho ba bolaane, mme o ne a newa tšhaka e kgolo.”—Tshenolo 6:4.

Mopalami yoo wa pitse o setswe morago ke bapalami ba bangwe ba babedi ba ba tshwantshetsang leuba le loso lo lo bakwang ke malwetse a leroborobo le dilo tse dingwe. (Tshenolo 6:5-8) Go ithuta mo go oketsegileng ka boporofeti jono jwa Baebele le gore goreng re tlhomamisegile gore bo a diragadiwa gompieno bala setlhogo se se reng “Bapalami ba Dipitse Tse Nnê ke Bomang?”

Go tla nna le kagiso

Mo nakong e e sa fediseng pelo madi a ka se tlhole a dirisediwa dintwa. Le fa go ntse jalo, seno se ka se direge ka ntlha ya maiteko a batho. Baebele e a re:

•  Modimo o tla “fedisa dintwa mo lefatsheng lotlhe.”—Pesalema 46:9.

•  Modimo o tla baakanya tshenyo e e bakilweng ke dintwa. “O tla phimola dikeledi tsotlhe mo matlhong a bone, mme loso lo tla bo lo sa tlhole lo le teng, e bile go tla bo go sa tlhole go na le khutsafalo kgotsa selelo kgotsa botlhoko. Dilo tse di neng di tlhola di direga ga di tlhole di le teng.”—Tshenolo 21:4.

•  Modimo o tla dira gore batho botlhe ba tshele ka kagiso. “Batho ba me ba tla nna mo lefelong la bonno le le nang le kagiso, mo mafelong a a sireletsegileng le mo mafelong a boikhutso a a ritibetseng.”—Isaia 32:18.

Go ya ka boporofeti jwa Baebele dintwa le dilo tse dingwe tse di diregang gompieno di bontsha gore go tloga go nna le kagiso mo nakong e e sa fediseng pelo.

Modimo o tla dira jang gore go nne le kagiso? O tla dirisa puso ya gagwe kana Bogosi jwa gagwe jo bo kwa legodimong. (Mathaio 6:10) Go ithuta gore Bogosi joo ke eng le gore bo ka go ama jang, lebelela bidio e e khutshwane e e reng Bogosi Jwa Modimo ke Eng?