Baebele e a Reng ka Pabalesego ya Basadi?

“Fa ke le monnye, abuti o ne a tlhola a ntitaya e bile a ntshotla ka mafoko letsatsi le letsatsi. Fa ke sena go nyalwa, matsale le ene o ne a ntshotla. Ene le ratsale ba ne ba ntirile lekgoba. Ke ne ke nna ke akanya ka go ipolaya.”​—Madhu,a India.

World Health Organization e a re, “Go sotliwa ga basadi go aname mo lefatsheng lotlhe.” Mokgatlho ono o fopholetsa gore mo e ka nnang mosadi a le mongwe mo go ba le bararo, o a sotliwa kgotsa o kile a sotliwa ka go itewa kgotsa ka thobalano.

Fa e le gore seno se kile sa go diragalela, o ka tswa o ikutlwa o sa babalesega ka gonne o akanya gore mongwe a ka go sotla ka mafoko, ka go go itaya kgotsa ka thobalano. Ka gonne basadi ba sotliwa, o ka tswa o tsaya gore batho ba le bantsi ba akanya gore ‘Basadi ga ba botlhokwa.’ Mme gone a Modimo o tsaya basadi ba le botlhokwa?

Modimo o leba basadi jang?

Lokwalo: “[Modimo] o ne a bopa monna le mosadi.”​—Genesise 1:27.

Se lo se kayang: Modimo o bopile banna le basadi. O ba bona botlhe ba tshwanelwa ke tlotlo. Mo godimo ga moo, o lebeletse gore monna a ‘rate mosadi wa gagwe jaaka a ithata,’ e seng gore a leke go mo laola, a bue le ene a dirisa mafoko a a botlhoko kgotsa a mo iteye. (Baefeso 5:33; Bakolosa 3:19) Eleruri pabalesego ya basadi e botlhokwa thata mo Modimong.

“Fa ke le monnye ke ne ka sotliwa ka thobalano ke bamasika. Fa ke na le dingwaga di le 17, mothapi wa me o ne a ntshosetsa ka gore o tla nkoba mo tirong fa ke sa robale le ene. Gone jaanong ke godile mme monna wa me, batsadi ba me le baagisani ba me ga ba ntlotle. Le fa go ntse jalo, fa nako e ntse e ya ke ile ka ithuta ka Mmopi e bong Jehofa.b Jehofa o tlotla basadi. Seno se ile sa ntlhomamisetsa gore o a nthata le gore ke botlhokwa thata mo go ene.”​—Maria, Argentina.

Ke eng se se ka go thusang?

Lokwalo: “Go na le tsala e e ikanyegang go gaisa ba lelapa la gaeno.”​—Diane 18:24.

Se lo se kayang: Tsala ya mmatota e tla go ema nôkeng. Fa go kgonega bolelela mongwe yo o mo tshepang gore o ikutlwa jang.

“Go fetile dingwaga di le 20 ke sa bolelele ope gore nkile ka sotliwa ka thobalano. Seo se ile sa dira gore ke nne ke sa itumela, ke nne ke tlhobaela e bile ke gateletswe mo maikutlong. Le fa go ntse jalo, fa ke sena go bolelela mongwe ka se se ntiragaletseng, ke ile ka ikutlwa ke imologile thata.”​—Elif, Türkiye.

Lokwalo: “Latlhelang ditlhobaelo tsotlhe tsa lona mo [Modimong], ka gonne o a lo kgathalela.”​—1 Petere 5:7.

Se lo se kayang: Modimo o reetsa dithapelo tsa gago. (Pesalema 55:22; 65:2) E re ka a go kgathalela, a ka go thusa go lemoga gore o botlhokwa fela thata.

“Go ithuta ka Jehofa go nthusitse gore ke simolole go ikutlwa botoka morago ga go feta mo dilong tse di botlhoko thata tse di ntiragaletseng. Gone jaanong ke kgona go rapela mme ke bolelele Modimo gore ke ikutlwa jang. Modimo o tshwana le tsala e e tlhaloganyang maikutlo a me.”​—Ana, Belize.

A Modimo o tla fedisa go sotliwa ga basadi?

Lokwalo: “Jehofa . . . o tla direla dikhutsana le batho ba ba gateletsweng tshiamiso, gore motho ope fela mo lefatsheng a se ka a tlhola a ba boifisa.”​—Pesalema 10:17, 18.

Se lo se kayang: Go ise go ye kae, Modimo o tla fedisa tshiamololo yotlhe, go akaretsa le go bogisiwa le go sotliwa ga basadi.

“Go a nkgomotsa go itse gore go ise go ye kae Jehofa o tla fedisa go sotliwa ga basadi le basetsana. Go itse seno go nneile kagiso.”​—Roberta, Mexico.

Go ithuta mo go oketsegileng ka gore Baebele e re naya jang tsholofelo, gore goreng o ka tshepa ditsholofetso tse di mo go yone le gore Basupi ba ga Jehofa ba thusa ba bangwe jang gompieno ba dirisa Baebele, kopa go etelwa.

Itseele kgatiso eno gore o e printe.