Nna Pelokgale O bo O Ikanyege Jaaka Benaia

Benaia e ne e le motlhabani yo o pelokgale ka nako ya fa Kgosi Dafide le Kgosi Solomone ba ne ba busa. E ne e le morwa wa moperesiti. Gantsi Balefi le baperesiti ba ne ba sa dirise dibetsa. Mme gone, o ne a ya go lwa kwa dintweng tsa ga Jehofa. O ne a le pelokgale tota. Ka sekai, o ne a tsena mo khuting a bo a bolaya tau e bile o ne a fenya motlhabani mongwe wa seganka. Dafide o ne a tshepa Benaia thata jaana mo a neng a mo tlhoma go nna mookamedi wa bafemedi ba gagwe.​—2 Sam. 23:20-23.

Benaia o ile a tswelela a ikanyega mo go Dafide le fa Abesalome le Adonija ba mo tlhanogela. (2 Sam. 8:18; 15:18; 1 Dikg. 1:8) Tota le fa Dafide a setse a tsofetse, Benaia o ne a ikanyega mo go ene e bile o ile a tlhomamisa gore Solomone o tlhomiwa go nna kgosi. (1 Dikg. 1:32-40) Ruri Benaia o ne a ikanyega mo go Jehofa le mo dikgosing tse Jehofa a neng a di tlhomile, le fa gone ba bangwe ba ne ba sa ikanyege.

Le rona re tlhoka go nna pelokgale go lwantsha mmaba wa rona e bong Satane le ba ba mo emang nôkeng. Re tshwanetse go ikemisetsa go tswelela re tshela ka melao ya ga Jehofa. (Baef. 6:11; 1 Pet. 5:8, 9) Tota le fa bangwe ba tlogela go direla Jehofa, re nna re ikanyega mo go ene re tlhomamisegile gore o tla re segofatsa.​—2 Sam. 22:26.