Fa o Bala Pego ya Baebele, Ipone o le Karolo Ya se Se Diregang

Baebele e na le dipego tse dintsi tsa ditiragalo tse di re rutang dithuto tsa botlhokwa. Fa re leka go akanya ka dipego tseno, re tla tlhaloganya se re se balang e bile se tla re tswela mosola le go feta. Dikakantsho tse di latelang di ka go thusa go akanya ka dipego tsa Baebele.

• Balela kwa godimo. Go balela kwa godimo go tla go thusa gore o akanye ka se se diregang mo pegong e o e balang. Fa lo bala Baebele lo le lelapa, lo ka abela mongwe le mongwe wa lona mafoko a batho ba ba farologaneng ba go buiwang ka bone mo Baebeleng.

• Itsenye mo ditlhakong tsa bone. Leka go akanya gore batho ba go buiwang ka bone ba akanya eng le gore ba ikutlwa jang. Ka sekai, ipotse go re: “Goreng motho yono a ile a bua mafoko ano kgotsa a dira se a se dirileng? Fa ke ne ke le mo boemong jono, ke ne ke tla akanya eng kgotsa ke ne ke tla dira eng?”

• Torowa. Go leka go torowa ditiragalo tse o di balang, go ka go thusa gore o ipone o le koo le gore o gopole dipego tsa Baebele botoka. Leka go dira jalo le fa o se mankge wa go torowa.