Dira ka Pelo Yotlhe!
1 Re na le mabaka a mantsi a go leboga Jehofa. Seo se akaretsa go mo lebogela dilo tse a re di diretseng mo nakong e e fetileng, tse a di dirang gone jaanong le tse a santseng a tla re di direla mo nakong e e tlang. Ditebogo tsa rona di tshwanetse go re tlhotlheletsa go dira eng? Pesalema nngwe ya ga Dafite e araba jaana: “Ke tlaa baka Jehofa ka metlha yotlhe; pako ya gagwe e tlaa nna ka gale mo molomong wa me.”—Pes. 34:1.
2 Baebele e bontsha ka phepafalo gore re laetswe gore re rere. Re dira tiro eno ka “pelo yotlhe, jaaka e ka bo e le go direla Morena.” (Bakol. 3:23) Re tla dira go le kana kang mo bodireding fa e le gore ruri re dira ka pelo yotlhe? Fa re akanya ka tsela e Jehofa a re ratileng ka yone, eleruri dipelo tsa rona di re tlhotlheletsa go dira gotlhe mo re ka go kgonang go bolelela batho ba bangwe kaga gagwe le ka maikaelelo a gagwe a a molemolemo! Re tlhotlheletsega go dira se re se kgonang.
3 Go a utlwala go bo re ka lebelela gore motho yo o dirang ka pelo yotlhe o tla batla go tlhoma mogopolo wa gagwe thata mo tirelong e e boitshepo. Mopesalema, yo kwantle ga pelaelo a neng a ikutlwa jalo o ne a bolela jaana: “Ke tle ke go bake gasupa ka letsatsi.” (Pes. 119:164) Batho ba ba ikutlwang jaaka mopesalema ba batla go dirisa ditshono tse ba ka bakang Jehofa ka tsone. Fa maemo a bone a ba letla, ba dira ka tlhoafalo ka mo ba ka kgonang ka teng.
4 Re na le Ditshono Tse Dintsi Tsa go Baka Jehofa: Ga go tlhokege gore re lete go fitlha re dira tiro ya ntlo le ntlo pele ga re rera mafoko a a molemo. Badirikarona, ba re tsenang sekolo le bone, ba losika, le ditsala tsa rona, botlhe ba tlhoka go utlwa molaetsa wa Bogosi. Fa re le mo loetong, re ka simolola motlotlo o o tla dirang gore re neele bosupi mo badiring ba hotele, badiri ba resetšhurente, badiri ba seteishene sa petorolo kana mo bakgweetsing ba dithekesi. Fa re le kwa gae, re ka nna ra neela baagisani ba rona le batho ba ba tlisang dilwana bosupi. Fa re robetse kwa kokelong, go na le baoki, dingaka, le balwetse ba bangwe ba re ka ba rerelang ka tsela e e seng ya ka tlwaelo.
5 Go Neela Bosupi jo e Seng Jwa ka Tlwaelo go Nna le Matswela: Ka letsatsi lengwe Basupi bangwe ba babedi ba ne ba ntse ba tsamaya mo parakeng mme ba simolola motlotlo le lekawana lengwe le le neng le iphokisa phefo le ngwana wa lone. Kgabagare ene le mosadi wa gagwe ba ne ba amogela boammaaruri. Moragonyana ga foo monna yono o ne a tlhalosa gore nakonyana fela pele ga a kopana la ntlha le Basupi ba babedi bano, o ne a rapetse Modimo a mo kopa gore, ‘Fa e le gore o teng, tsweetswee dira gore ke go itse.’ O akanya gore se se diragetseng kwa parakeng ke tsela e Jehofa a neng a araba thapelo ya gagwe ka yone.
6 Batho ba ba dirang ka pelo yotlhe ba ba batlang go thusa batho ba bangwe semoyeng, ba itumela thata. Ba itse gore tirelo e e ntseng jalo ya “pelo e e itekanetseng,” e itumedisa Jehofa.—1 Ditir. 28:9.