Modimo o Amega ka Wena

MARY, mosadi mongwe wa Mokeresete yo o neng a tloga a wetsa dingwaga tsa gagwe tsa bo40, o ne a boga thata mo botshelong jwa gagwe. O ne a tlhalana le monna dingwaga tse di lesome tse di fetileng fa monna wa gagwe a sena go dira boaka. Morago ga moo, Mary o ne a mekamekana le go diragatsa seabe sa gagwe sa go nna motsadi yo o mongwe fela gore a godise bana ba gagwe ba banè. Mme o santse a sena monna, e bile ka dinako tse dingwe ga a kgone go itshokela bodutu. Mary o ipotsa gore, ‘A seno se raya gore Modimo ga a amege ka nna kana ka bongwanake ba ba senang rraabo?’

Eleruri o ka utlwela Mary botlhoko ka tsela e a ikutlwang ka yone, go sa kgathalesege gore o kile wa nna madimabe ka tsela e e tshwanang kana nnyaa. Rotlhe re kile ra itshokela maemo a a thata, mme re ka tswa re kile ra ipotsa gore Jehofa o tla re thusa leng le gone jang. Maitemogelo ano a mangwe a bakilwe ka tlhamalalo ke go bo re tlhwaela tsebe melao ya Modimo. (Mathaio 10:16-18; Ditiro 5:29) A mangwe a bakiwa ke go bo re le batho ba ba sa itekanelang, ba re tshelang mo lefatsheng le le busiwang ke Satane. (1 Johane 5:19) Moaposetoloi Paulo o ne a kwala jaana: “Lobopo lotlhe lo ntse lo fegelwa, le gompieno, lo mo botlhokong jo e keteng jwa pelego.”—Baroma 8:22.

Lefa go ntse jalo, lebaka la go bo o lebane le teko e e botlhoko ga go reye gore Jehofa o go latlhile kana gore ga a batle gore o itumele. O ka tlhomamisega jang ka seno? Ke eng se se bontshang gore Modimo o amega ka wena?

Sekao sa Bogologolo

Baebele e re neela bosupi jo bo papametseng jwa gore Jehofa o amega ka batho ka bongwe. Akanya ka Dafite. Jehofa o ne a kgatlhegela modisa yono yo mmotlana, a bona e le “monna yo o ntseng ka fa pelong ya gagwe.” (1 Samuele 13:14) Morago ga moo, fa Dafite a ne a busa e le kgosi, Jehofa o ne a mo solofetsa jaana: “Ke ntse ke na nao gongwe le gongwe kwa o ntse o ya gone.”—2 Samuele 7:9.

A seno se raya gore Dafite o ne a tshela botshelo jo bo “itumedisang,” jo bo neng bo se na mathata? Nnyaa, Dafite o ne a lebane le diteko tse di botlhoko pele a busa le ka nako ya fa a ne a busa. Go fetile dingwaga di le dintsi pele a nna kgosi, a setswesetswe morago ke Kgosi Saule wa mmolai. Mo nakong eno ya botshelo jwa gagwe, Dafite o ne a kwala jaana: “Mowa wa me o mo ditaung . . . e bong bana ba batho, ba meno a bone a leng marumo fela le metswi.”—Pesalema 57:4.

Lefa go ntse jalo, Dafite o ne a tlhatswegile pelo gore Jehofa o amega ka ene ka namana fa a ne a le mo botlhokong jono. O ne a bolelela Jehofa jaana mo thapelong: “Dikgarakgatshego tsa me o a di bala.” Ee, Dafite o ne a tsaya seo jaaka e kete Jehofa o kwadile matshwenyego otlhe. Morago ga moo Dafite o ne a oketsa jaana: “A ko o tsenye dikeledi tsa me tsotlhe mo modutwaneng wa gago; a ga di mo lokwalong lwa gago?”a (Pesalema 56:8) Ka setshwantsho seno, Dafite o ne a bontsha fa a tshepa gore Jehofa o ne a lemoga seemo mme gape le boikutlo jo bo bakwang ke sone.

Fa Dafite a ne a tla tloga a swa, o ne a ka kwala jaana ka se se neng sa mo diragalela: “Ditsamao tsa motho di tlhomamisiwa ke Jehofa; mme o natefelwa ke tsela ya gagwe. Le fa a wa, ga a ketla a batanyetsegela ruri; ka gobo Jehofa o mo tshegeditse ka seatla sa gagwe.” (Pesalema 37:23, 24) Le wena o ka tlhomamisega gore lefa diteko tsa gago di ka tswelela pele le go oketsega, Jehofa o bona boitshoko jwa gago e bile o bo tsaya bo le botlhokwa. Paulo o ne a kwala jaana: “Modimo ga o tshiamololo ya gore o ka lebala tiro ya lona, le go rata leina la one, mo lo go bonyweng ka lo ntse lo direla baitshepi, mme lo sa ntse lo ba direla le gompieno.”—Bahebere 6:10.

Le gone, Jehofa o ka go thusa ka go go neela maatla gore o itshokele sekgoreletsi sepe se se mo tseleng ya gago. Dafite o ne a kwala jaana: “Dipatikego tsa mosiami di dintsi; mme Jehofa o mo golola mo go tsone tsotlhe.” (Pesalema 34:19) Ee, Baebele e re bolelela gore matlho a ga Jehofa “a sianela kwa le kwa mo lefatsheng lotlhe go iponatsa fa a le thata ntlheng ya batho ba dipelo tsa bone di leng boitekanelo mo go ene.”—2 Ditirafalo 16:9.

Jehofa o go Gogile

Bosupi jo bo oketsegileng jwa gore Jehofa o amega ka motho ka namana bo ka fitlhelwa mo mafokong a ga Jesu. O ne a bolela jaana: “Ga go motho ope yo o ka tlang mo go nna, fa Rara yo o nthomileng a sa mo goge.” (Johane 6:44) Ee, Jehofa o thusa batho ka bongwe gore ba solegelwe molemo ke melemo ya setlhabelo sa ga Keresete. Jang? Thatathata ke ka tiro ya go rerwa ga Bogosi. Ke boammaaruri gore tiro eno e nna “tshupo mo merafeng yotlhe,” lefa go ntse jalo e fitlhelela batho ka bongwe ka bongwe. Lebaka la go bo o reeditse molaetsa wa mafoko a a molemo o bo o tsaya kgato go supa gore Jehofa o amega ka wena ka namana.—Mathaio 24:14.

Jehofa o gogela batho kwa go Morwawe le gore ba nne le tsholofelo ya go tshela ka bosakhutleng a dirisa moya o o boitshepo. Seno se thusa mongwe le mongwe gore a tlhaloganye le go dirisa boammaaruri jwa semoya go sa kgathalesege ditlhaelo le go sa itekanela mo re go ruileng. Tota, ga go ope yo o ka tlhaloganyang maikaelelo a Modimo fa a sa thusiwe ke moya wa Modimo. (1 Bakorinthe 2:11, 12) Fela jaaka Paulo a ne a kwalela Bathesalonika, “batho ga ba na tumelo botlhe.” (2 Bathesalonika 3:2) Jehofa o neela fela batho ba ba ratang go gogiwa ke ene moya wa gagwe.

Jehofa o goga batho ka gonne o a ba rata e le motho ka bongwe mme o batla gore ba bolokwe. A bo e le bosupi jo bo nonofileng jang ne jwa gore Jehofa o amega ka motho ka namana! Jesu o ne a bolela jaana: “Ga se go rata ga Rraeno yo o kwa legodimong, gore mongwe wa ba babotlana ba, a nyelele.” (Mathaio 18:14) Ee, Modimo o tsaya motho mongwe le mongwe a le botlhokwa a farologane le ba bangwe. Ke gone ka moo Paulo a neng a ka kwala jaana: “O tlaa [naya] mongwe le mongwe ka fa ditirong tsa gagwe.” (Baroma 2:6) Mme moaposetoloi Petere o ne a bolela jaana: “Modimo [ga] se motlhaodi wa batho; mo merafeng yotlhe, [motho ka bongwe] yo o boifang one, a ba a dira tshiamo, o a lebosega mo go one.”—Ditiro 10:34, 35.

Dikgakgamatso Tsa ga Jesu

Tsela e Modimo a neng a kgatlhegela batho ka yone e ne ya bontshiwa ka tsela e e amang maikutlo ke dikgakgamatso tse di neng tsa dirwa ke Morwawe, Jesu. Diphodiso tseno di ne di kopane le boikutlo jo bo boteng. (Mareko 1:40, 41) E re ka Jesu “[a ka se ka a] dira sepe ka esi, fa e se se o bonang Rara a se dira,” boutlwelobotlhoko jwa gagwe bo bontsha gore Jehofa o amega ka mongwe le mongwe wa batlhanka ba gagwe ka tsela e e lorato.—Johane 5:19.

A o ko o akanye ka polelo ya kgakgamatso nngwe e Jesu a neng a e dira, e e kwadilweng mo go Mareko 7:31-37. Mo go yone Jesu o ne a fodisa monna mongwe yo o neng a le susu e bile a kwakwaetsa. Baebele e bolela jaana: “A . . . ntsha [monna] mo bontsing a mo isa fa thoko.” Go tswa foo, “a lelalela legodimong, a fegelwa, a mo raya a re: ‘Efatha,’ ke go re: ‘Kabologa.’”

Ke ka ntlha yang fa Jesu a ne a ntsha monna yono mo bontsing jwa batho? Ebu, e ka tswa e le gore motho yo o susu yo o sa kgoneng go bua sentle o ne a ka tlhabiwa ke ditlhong fa pele ga batho ba ba lebeletseng. Jesu o ka tswa a ne a lemoga gore monna yono o tlhabiwa ke ditlhong, mme ke gone ka moo a neng a mo fodisetsa kwa thoko. Mokanoki mongwe wa Baebele o bolela jaana: “Polelo eno yotlhe e re bontsha sentlentle gore Jesu o ne a sa tseye monna yono e le molwetse fela; o ne a mo tsaya e le motho yo o farologaneng le ba bangwe. Monna yono o ne a tlhoka sengwe se se kgethegileng e bile a na le bothata jo bo sa tlwaelegang, mme Jesu ka go mo akanyetsa ka tsela e e lorato, o ne a dirisana le ene ka tsela e e neng e sa utlwise maikutlo a gagwe botlhoko le ka tsela e a neng a ka kgona go e tlhaloganya.”

Polelo eno e bontsha gore Jesu o ne a amega ka batho. O ka tlhomamisega gore le wena o go kgatlhegela fela jalo. Ke boammaaruri gore loso lwa gagwe lwa go intsha setlhabelo e ne e le go bontsha lorato go lefatshe lotlhe la batho ba ba ka dumelang go rekololwa. Lefa go ntse jalo, o ka dirisa thuso eno ka namana, fela jaaka Paulo a ne a dira, yo o neng a kwala jaana: “Morwa Modimo . . . o [nthatile], a ba a intshetsa nna.” (Bagalatia 2:20, mokwalo o o sekameng ke wa rona.) Mme e re ka Jesu a boletse gore ‘yo o mmoneng o bone Rara,’ re ka tlhomamisega gore Jehofa le ene o kgatlhegela mongwe le mongwe wa batlhanka ba gagwe ka tsela e e tshwanang.—Johane 14:9.

Jehofa o Nna Moduedi

Go nna le kitso ya Modimo go akaretsa go itse karolo nngwe le nngwe ya botho jwa gagwe jaaka bo senotswe mo Baebeleng. Leina le le reng Jehofa tota le raya “O Dira Gore go Diragale,” mo go rayang gore Jehofa o ka nna se a batlang gore a nne sone e le gore a dire thato ya gagwe. Mo hisitoring yotlhe, o ne a nna le diabe tse di farologaneng, go akaretsa le go nna Mmopi, Rara, Morena Molaodi, Modisa, Jehofa wa mashomoshomo, Moutlwi wa thapelo, Moatlhodi, Moruti yo o Molemolemo le Morekolodi.b

Gore re tlhaloganye se leina la Modimo le se bolelang ka botlalo, gape re tshwanetse go itse Jehofa e le Moduedi. Paulo o ne a kwala jaana: “Kwa ntle ga tumelo go reteletse ruri go o kgatlha. Gonne yo o tlang Modimong o na le go dumela fa o le yo, e bile e le one moduedi wa ba ba o batlang.”—Bahebere 11:6.

Jehofa o solofeditse batho ba gompieno ba tlhophang go mo direla ka peloyotlhe botshelo jo bo sa khutleng mo paradaiseng mo lefatsheng. Ga se bopelotshetlha go bo re lebeletse gore tsholofetso eo e e molemolemo e diragadiwe, le gone ga se go ipagololela mogodu fa re ipona re nna mo go yone. Moshe “o ne a lebile tefo ya tuelo.” (Bahebere 11:26) Ka mo go tshwanang Paulo o ne a lebeletse pele go diragadiwa ga tsholofetso ya Modimo ka tlhoafalo mo Bakereseteng ba ba tloditsweng ba ba ikanyegang. O ne a kwala jaana: “Ke lekela ka thata kwa sekaong, ke ya go tsaya sekgele sa piletsogodimo ya Modimo mo go Keresete Jesu.”—Bafilipi 3:14.

Le wena o ka lebelela pele go bona tuelo e Jehofa a e solofetsang batho ba ba itshokang. Go lebelela pele tuelo eo ke karolo e e botlhokwa ya go itse Modimo le go itshoka mo tirelong ya gagwe. Ka jalo tlhatlhanya ka malatsi otlhe ka masego a Jehofa a go beetseng one. Mary, yo o neng a umakiwa kwa tshimologong, o ne a leka thata gore a dire seno. O bolela jaana: “E ne e le la ntlha mo botshelong jwa me bosheng jaana, ke amogela gore setlhabelo sa ga Jesu sa thekololo se a nkama. Ke simolola go ikutlwa gore Jehofa o amega ka nna jaaka motho ka bongwe. Ke ntse ke le Mokeresete ka dingwaga tse di fetang 20, mme ke bosheng jaana mo ke neng ka simolola go dumela seno tota.”

Mary, mmogo le dimilione tsa batho ba bangwe, o setse a ithuta gore Jehofa o amega ka batho ba gagwe mme e seng fela ba le setlhopha mme lefa e le motho ka bongwe, ka go ithuta Baebele le go tlhatlhanya ka yone go tswa pelong. Moaposetoloi Petere o ne a tlhatswegile pelo ka seno mo a neng a kwala jaana: “Latlhelang tlhobaelo yotlhe ya lona mo [Modimong], ka o amega ka lona.” (1 Petere 5:7, NW) Ee, Modimo o amega ka wena!

[Dintlha tse di kwa tlase]

[Lebokoso mo go tsebe 6]

Tsogo—Bosupi Jwa Gore Modimo o a Amega

BOSUPI jo bo tlhatswang pelo jwa gore Modimo o kgatlhegela motho mongwe le mongwe bo fitlhelwa mo Baebeleng mo go Johane 5:28, 29: “Lobaka lo etla, lo botlhe ba ba mo [mabitleng a kgakologelo, NW] ba tlaa utlwang lentswe la [ga Jesu] ka lone. Mme ba tlaa tswa.”

Se se kgatlhang ke gore lefoko la Segerika le le reng mne·meiʹon (lebitla la kgakologelo) le dirisitswe fano mo boemong jwa taʹphos (phupu). Lefoko le le reng taʹphos le tlisa kgopolo fela ya go fitlha. Mme lefoko la mne·meiʹon le bontsha gore rekoto ya botshelo jwa motho yo o suleng e a gakologelwa.

Mo ntlheng eno, akanya fela gore tsogo e tla tlhoka gore Jehofa Modimo a dire eng. O tshwanetse gore a bo a itse sengwe le sengwe ka motho yoo gore a tle a mmusetse mo botshelong gape—go akaretsa le mekgwa ya gagwe e a neng a na le yone le gore motho yoo a bo a kgona go gakologelwa sengwe le sengwe. Ke gone fela motho yoo a ka tsosiwang a tshwana le pele.

Ke boammaaruri gore motho o ka bona seo se sa kgonege, mme “mo Modimong dilo tsotlhe di ka dira[g]ala.” (Mareko 10:27) E bile tota o kgona go lemoga se se mo pelong ya motho. Lefa go fetile makgolokgolo a mantsi a dingwaga motho a sule, Modimo o santse a kgona go mo gakologelwa; ga a lebale. (Jobe 14:13-15) Ka gone, fa Jesu a ne a bolela ka Aberahame, Isake le Jakobe o ne a ka re Jehofa “ga se Modimo wa baswi, fa e se wa batshedi fela; gonne botlhe ba tshelela one,” lefa go fetile makgolokgolo a dingwaga ba ntse ba sule. (Mokwalo o o sekameng ke wa rona.)—Luke 20:38.

Ka gone, dikete tsa dimilione tsa batho ba ba suleng, Jehofa o di gakologelwa ka botlalo. A bo e le bosupi jo bo tlhomologileng jang ne gore Modimo o amega ka batho go ya ka motho ka bongwe!

[Setshwantsho mo go tsebe 7]

Jesu o ne a kgatlhegela batho ba a neng a ba fodisa motho ka namana