Lobone Lwa Bone Ga lo A ka Lwa Tima
MO METLHENG ya Baebele go ne go na le basupi ba ba ikanyegang ba ga Jehofa ba ba neng ba na le dipoelomorago le mathata. Ba ne ba ganediwa e bile ba na le ditlhaelo tse di bonwang ke mongwe le mongwe. Lefa go ntse jalo, ba ne ba se ka ba tlogela ka ntlha ya go kgobega marapo. Tota e bile, lobone lwa bone ga lo a ka lwa tima.
Ka sekai, moperofeti Jeremia o ne a neilwe thomo ya go nna moperofeti wa Modimo mo setšhabeng sa Bajuta ba batenegi. O ne a itsise tlhagiso ka ga tshenyego ya Jerusalema e e neng e tla tla. (Jeremia 1:11-19) Ka ntlha ya seo, Jeremia o ile a nna le dikgotlhang di le dintsi le baagikaene, ba ba neng ba mo tsaya e le mogoeletsi wa tshenyego.
Moperesiti Pashure, yo o neng a le molaodi yo mogolo mo ntlong ya Modimo, o kile a itaya Jeremia ka ntlha ya se a neng a se perofeta a bo a mo golegela mo disaneng. Jeremia o ne a bolela jaana ka se se neng se lebega e le go mmusetsa kwa morago: “Ke dule setshego sa motshegare otlhe, mongwe le mongwe o a ntshotla. Gonne ke a re ke bua gangwe le gape, ke be ke goe; ke goe ke re: ‘Thubakanyo le thopo’: ka gonne lefoko la ga Jehofa le dirilwe mo go nna kgobo le setshego motshegare otlhe.” Moperofeti yono o ne a kgobega marapo mo a neng a bolela jaana: “Ga nketla ke mo umaka [Jehofa], le fa e le go tlhola ke bua mo ineng la gagwe.”—Jeremia 20:1, 2, 7-9.
Lefa go ntse jalo, Jeremia o ne a se ka a ineela mo go kgobegeng marapo. O ne a itsise jaana fa a ne a bolela ka “lefoko la ga Jehofa”: “Go [nna] mo pelong ya me e kete molelo o o šang o tswaletswe mo marapong a me, ke bile ke lapile ka go iphapaanya, ke be ke retelelwe ke go itshoka.” (Jeremia 20:8, 9) E re ka Jeremia a ne a tlhotlheletsega thata go bolela mafoko a Modimo, o ne a nonotshiwa ke moya o o boitshepo a bo a diragatsa thomo ya gagwe.
Moaposetoloi Paulo le ene o ne a na le mabaka a le mantsi a go kgobega marapo, fa a ne a ka a lesa a mo fekeetsa. O ne a itshokela masetlapelo a tlholego, go thubega ga sekepe, pogiso le go itewa. Mo godimo ga moo, ‘mo go neng go mo imela ka malatsi otlhe e ne e le tlhobaelo ka ga diphuthego tsotlhe.’ (2 Bakorinthe 11:23-28) Ee, Paulo o ne a tshwanetse go itshokela mathata ka malatsi otlhe, a tshwenyegile ka diphuthego tse disha tse a neng a tsentse letsogo fa di tlhomiwa. Mo godimo ga moo, o ne a sa itekanela e bile a tshwanelwa ke go lwa le “mutlwa mo nameng,” gongwe o ne a sa bone sentle mo matlhong. (2 Bakorinthe 12:7; Baroma 7:15; Bagalatia 4:15) Ba bangwe ba ne ba bile ba seba Paulo, mme kgabagare di ne tsa fitlha mo ditsebeng tsa gagwe.—2 Bakorinthe 10:10.
Lefa go ntse jalo, Paulo o ne a se ka a lesa go kgobega marapo go mo fekeetsa. Nnyaa, o ne a se na maatla a a fetang a motho. (2 Bakorinthe 11:29, 30) Ke eng se se dirileng gore ‘molelo wa gagwe wa ka fa teng’ o nne o tuka? Selo sa botlhokwa ke gore o ne a na le ditsala tse di neng di mo ema nokeng, ba bangwe ba ne ba bile ba tsamaya le ene go ya Roma koo a neng a tsenngwa mo kgolegelong gone. (Ditiro 28:14-16) Sa bobedi, moaposetoloi o ne a tsaya boemo jo a neng a le mo go jone ka tsela e e lekalekaneng. Babogisi le baganetsi ba gagwe ba ne ba le phoso, e seng Paulo. Fa a ne a tla tloga a wetsa botshelo jwa gagwe jwa mo lefatsheng, o ne a sekaseka bodiredi jwa gagwe ka tsela e e siameng mme a bolela jaana: “Go tloga fano ke setse ke beetswe serwalo sa tshiamo, [se] Morena, moatlhodi wa tshiamo, o tlaa se [nnayang].”—2 Timotheo 4:8.
Mo godimo ga dilo tsotlhe, Paulo o ne a rapela Jehofa Modimo ka metlha, mme ‘Morena o ne a ema gaufi le ene, a ba a mo naya thata.’ (2 Timotheo 4:17) Paulo o ne a bolela jaana: “Nka dira dilo tsotlhe ka ene yo o nnonotshang.” (Bafilipi 4:13) Go buisana le Modimo le Bakeresetekaene, mmogo le go sekaseka bodiredi jwa gagwe ka tsela e e siameng, go ne ga thusa Paulo gore a tswelele pele mo tirelong ya ga Jehofa.
Modimo o ne wa tlhotlheletsa Paulo go kwala jaana: “A re se lapeng mo go direng molemo; gonne re tlaa roba mo motlheng o e leng one, fa re sa ngodiege.” (Bagalatia 6:7-9) Re roba eng? Botshelo jo bo sa khutleng. Ka gone he, dira jaaka Jeremia, Paulo le basupi ba le bantsi ba ga Jehofa ba ba ikanyegang ba ba umakilweng mo Dikwalong. Ee, dira jaaka bone, mme o se ka wa ineela mo go kgobegeng marapo. O se ka wa lesa lobone lwa gago lo tima.—Bapisa Mathaio 5:14-16.
[Ditshwantsho mo go tsebe 25]
Paulo le Jeremia ga ba a ka ba lesa mabone a bone a tima