A Jesu O Ka Tswa A Ne A Na Le Tumelo mo Modimong?

Kgang E E Akabatsang ya Modumelatharonngwe

“JESU o ka bo a ne a na le tumelo jang? Ke Modimo; o itse e bile o bona sengwe le sengwe kwantle ga gore a ikaege mo go ope. Tumelo e akaretsa go ikaega gotlhelele mo mothong yo mongwe le go dumela selo se se sa bonweng; ka jalo gore Jesu-Modimo o ka tswa a ne a na le tumelo, ga go boammaaruri.”

Go ya ka moithutabomodimo wa Mofora e bong Jacques Guillet, eno ke kgopolo e e dumelwang thata ke Bakatoliki. A o gakgamadiwa ke tlhaloso eno? O ka nna wa bo o ile wa akanya gore e re ka Jesu e le sekao mo Bakereseteng mo go sengwe le sengwe, o tshwanetse a bo a tlhoma sekao le mo tumelong. Fa e le gore o ne o akanya jalo, he ga o ise o akanye ka botlalo ka thuto e e itsegeng thata ya Labokeresete ya Tharonngwe.

Kgang ya tumelo ya ga Jesu ke kgang e e sa kgoneng go tlhaloganngwa ke baithutabomodimo ba Bakatoliki, Baporotesetanta le ba Orthodox bao ba dumelang gore Tharonngwe ke “bosaitseweng jo bo sa tlhaloganngweng jwa konokono jwa tumelo le botshelo jwa Mokeresete.”a Lefa go ntse jalo ga se botlhe ba ba ganetsang tumelo ya ga Jesu. Jacques Guillet o dumalana gore “go thata gore motho a se ka a dumela gore Jesu o ne a na le tumelo,” lefa tota Guillet a dumela gore go ya ka thuto ya Tharonngwe, eno ke “kgang e e ikganetsang.”

Mojesuite wa Mofora e bong Jean Galot, le baithutabomodimo ba le bantsi jaaka ene, ba bua puo phaa gore e re ka a le “Modimo wa boammaaruri le motho wa boammaaruri, . . . Keresete a ka se dumele mo go ene ka boene.” “Tumelo e akaretsa go dumela mo mothong yo mongwe, e seng mo go wena ka bowena,” go tlhalosa jalo lokwalodikgang lwa ka metlha lwa kereke lwa La Civiltà Cattolica. Ka jalo, selo se se dirang gore go nne thata go amogela tumelo ya ga Jesu, ke thuto ya konokono ya Tharonngwe, e re ka megopolo eno e mebedi e ikganetsa tota.

Baithutabomodimo ba re, “Diefangele ga di ke di bua ka ga tumelo ya ga Jesu.” Mme gone, mareo ano pi·steuʹo (dumela, nna le tumelo) le piʹstis (tumelo), a a dirisiwang mo Dikwalong tsa Bokeresete tsa Segerika, gantsi a kaya tumelo e barutwa ba neng ba na le yone mo Modimong kana mo go Keresete, go na le gore e kaye tumelo eo Jesu a neng a na le yone mo go Rraagwe wa selegodimo. Ka jalo a re tshwanetse go swetsa gore Morwa Modimo o ne a se na tumelo? Re tlhaloganya eng ka ga se a ileng a se dira le go se bua? Dikwalo tsone tsa reng?

Dithapelo Kwantle Ga Tumelo?

Jesu e ne e le monna yo o neng a rapela. O ne a rapela ka dinako tsotlhe—fa a ne a kolobediwa (Luke 3:21); bosigo jotlhe pele ga a ka tlhopha baaposetoloi ba gagwe ba ba 12 (Luke 6:12, 13); le pele ga a fetoga ponalo ka kgakgamatso mo thabeng, fa a ne a na le baaposetoloi Petere, Johane, le Jakobe. (Luke 9:28, 29) O ne a rapela fa mongwe wa barutwa a ne a mo kopa a re: “Re rute go rapela,” mme a ba ruta Thapelo ya Morena (ya “Rraetsho”). (Luke 11:1-4; Mathaio 6:9-13) O ne a rapela a le nosi ka nako e telele phakela thata (Mareko 1:35-39); ka nako ya fa go ne go nna maitseboa mo thabeng a se na go kgaogana le barutwa ba gagwe (Mareko 6:45, 46); a na le barutwa ba gagwe mme le fa a ne a ba rapelela. (Luke 22:32; Johane 17:1-26) Ee, thapelo e ne e le karolo e e botlhokwa mo botshelong jwa ga Jesu.

O ne a rapela pele ga a ne a dira dikgakgamatso, ka sekai, pele ga a ka tsosa tsala ya gagwe Lasaro: “Rara ke a go leboga ka o nkutlwile. Ke ne ke itse fa o nkutlwa gale; mme ka bo ke buisiwa ke bontsi jwa batho jo bo emeng fa ba ntikanyeditse, ka re ba tle ba dumele fa o nthomile.” (Johane 11:41, 42) Go bo a ne a tlhomamisega gore ruri Rraagwe o ne a tla araba thapelo ya gagwe go bontsha kafa tumelo ya gagwe e neng e nonofile ka gone. Kamano eno ya go rapela Modimo le go nna le tumelo mo go Ene e bonala sentle mo go seo Keresete a neng a se bolelela barutwa ba gagwe: “Dilo tsotlhe tse lo di rapelelang lo di lopa, lo dumela fa lo di amogetse, mme lo tla di bona.”—Mareko 11:24.

Fa e le gore Jesu o ne a sena tumelo, ke ka ntlha yang fa a ne a rapela Modimo? Thuto ya Labokeresete ya Tharonngwe ya gore Jesu e ne e le motho mme e le Modimo gape, e ganetsa molaetsa wa Baebele. E kgoreletsa batho gore ba tlhaloganye bomotlhofo le nonofo ya Baebele. Monna yo Jesu o ne a ikuela go mang? Mo go ene ka boene? A o ne a sa itemoge gore e ne e le Modimo? Mme fa e ne e le gore e ne e le Modimo e bile a itse seo, ke ka ntlha yang fa a ne a rapela?

Dithapelo tsa ga Jesu tse a neng a di rapela mo letsatsing la bofelo la botshelo jwa gagwe jwa mo lefatsheng, di dira gore re lemoge sentle tumelo eo a neng a na le yone mo go Rraagwe wa selegodimo. Ka go bontsha gore o ne a na le tsholofelo le gore o ne a tlhomamisegile mo go se a neng a se lebeletse, o ne a kopa jaana: “Mme jaana, Rara, a ko o nkgalaletse nao, ka kgalalelo e ke neng ke ntse ke na nayo nao pele lefatshe le ise le nne.”—Johane 17:5.

E re ka a ne a itse gore diteko tse di botlhoko tota le loso lwa gagwe lo ne lo atametse, mo bosigong jo a neng a le mo tshimong ya Gethesemane mo Thoteng ya Lotlhware, o ne “a simolola go hutsafala le go huduega mo go botlhoko,” mme a re: “Mowa wa me o hutsafetse thata, e le mo go isang losong fela.” (Mathaio 26:36-38) Mme a khubama a rapela a re: “Rra, fa e le go rata ga gago, tlosa senwelo se mo go nna; lefa go ntse jalo, e seng go rata ga me, mme a go rata ga gago go dirale.” Mme “ga bonala moengele kwa go ene, a tswa legodimong, a mo thatafatsa.” Modimo o ne wa utlwa thapelo ya gagwe. Ka ntlha ya maikutlo a gagwe le teko e e botlhoko, “mofufutso wa gagwe wa nna jaaka marothodi a magolo a madi, a rothela fa fatshe.”—Luke 22:42-44.

Diteko tsa ga Jesu, go bo a ne a batla go nonotshiwa le mekokotlelo ya gagwe, e supa eng? Jacques Guillet o kwala a re, “Selo se le sengwe se bonala sentle, Jesu o ne a rapela, e bile thapelo e ne e le selo sa botlhokwa mo botshelong le mo ditirong tsa gagwe. O ne a rapela jaaka batho ba rapela, mme gape a rapelela le batho. Mme jaanong, dithapelo tsa batho ga di utlwale fa di sa patiwa ke tumelo. A mme dithapelo tsa ga Jesu e ne e ka nna tse di sa utlwaleng le tse di sa patiwang ke tumelo?”

Pelenyana fela ga loso lwa gagwe fa a ne a le mo koteng ya tlhokofatso, Jesu o ne a goa ka lentswe le legolo, a umaka pesalema nngwe ya ga Dafite. Mme ka go bontsha tumelo o ne a rapelela kwa godimo labofelo a re: “Rra, ke neela mowa wa me mo diatleng tsa gago.” (Luke 23:46; Mathaio 27:46) Thanolo nngwe ya Setadiana e e tlhakanetsweng ke dikereke, ya Parola del Signore, e re Jesu o ne a ‘neela botshelo jwa gagwe’ go Rara.

Jacques Guillet o akgela jaana: “Ka go re bontsha Keresete a le mo koteng ya tlhokofatso, a goela kwa go Rraagwe ka dipesalema tsa Iseraele, bakwadi ba Diefangele ba re tlhomamisetsa gore selelo seo, selelo sa Morwa yo o tsetsweng a le esi, selelo sa botlhoko jo bo feletseng, selelo sa go tlhomamisega mo go feletseng, ke selelo sa tumelo, selelo sa go swela mo tumelong.”

Lefa ba bona bosupi jono jo bo bonalang sentle le jo bo gakgamatsang jwa tumelo, baithutabomodimo bangwe ba leka go farologanya tumelo le “go tlhomamisega.” Lefa go ntse jalo, pharologanyo e e ntseng jalo ga e kafa Dikwalong.

Mme tota, diteko tse di botlhoko tse Jesu a neng a di itshokela di supa eng ka ga tumelo ya gagwe?

“Mowetsi Wa Tumelo Ya Rona” O Ne A Dirwa Boitekanelo

Mo kgaolong ya bo11 ya lokwalo lwa gagwe go Bahebere, moaposetoloi Paulo o umaka boidiidi jo bogolo jwa banna le basadi ba ba ikanyegang ba dinako tsa pele ga metlha ya Bokeresete. O digela ka go supa go sekao se segolo le se se itekanetseng sa tumelo: “Re ntse re lebile kwa go Jesu, mosimolodi le mowetsi wa tumelo ya rona, yo e rileng ka boitumelo jo o bo beetsweng pele a itshokela mokgoro, a nyatsa ditlhong . . . A lo ke lo akanyeng ene yo o itshoketseng kganelo e e kalokalo ya baleofi ba ba ikganetsang, gore lo tle lo se ka lwa lapa, lwa ngodiega mo meweng ya lona.”—Bahebere 12:1-3.

Bontsi jwa baithutabomodimo ba re temana eno ga e bue ka ga “tumelo ya ga Jesu ka namana” mme gore ke ene “mosimolodi kana mothei wa tumelo.” Lereo la Segerika te·lei·o·teś le le tlhagelelang mo temaneng eno, le kaya motho yo o kgonang sengwe, yo o diragatsang kana yo o swetsang sengwe. Jaaka “Mowetsi,” Jesu o ne a swetsa tumelo ka tlhaloganyo ya gore go tla ga gagwe mo lefatsheng go ile ga diragatsa boperofeti jwa Baebele mme ka jalo a tlhoma motheo o o tlhomameng tota wa tumelo. A mme seno se raya gore o ne a se na tumelo?

Ditemana tse di tswang mo lekwalong la Bahebere tse di mo bokosong e e mo tsebeng 15 di tlhomamisa seno. Jesu o ne a itekanedisiwa ke diteko le go nna kutlo ga gagwe. Lefa a ne a setse a le monna yo o itekanetseng, maitemogelo a gagwe a ne a dira gore a itekanele le gore a felele mo dilong tsotlhe, le e leng mo tumelong, gore a tle a tshwanelege sentle go nna Moperesiti Yo Mogolo yo o tla bolokang Bakeresete ba boammaaruri. O ne a rapela Rraagwe ka “merapelo le mekokotlelo e e nang le selelo se setona, le dikeledi,” o ne a “ikanyega” mo Modimong, mme o ne a “boifa Modimo.” (Bahebere 3:1, 2; 5:7-9) Bahebere 4:15 e re o ne a “raelwa mo dilong tsotlhe,” fela “jaaka rona,” ke gore, fela jaaka Mokeresete mongwe le mongwe yo tumelo ya gagwe e tleng e wele “mo ditekong di le dintsi.” (Jakobe 1:2, 3) A go a utlwala go dumela gore Jesu a ka lekwa “jaaka” balatedi ba gagwe kwantle ga go lekwa tumelo jaaka bone?

Mekokotlelo, go nna kutlo, dipogiso, diteko, boikanyegi, le go boifa Modimo go supa tumelo e e feletseng ya ga Jesu. Di bontsha gore o ne a nna “Mowetsi wa tumelo ya rona” fela fa a se na go itekanediwa mo tumelong ya gagwe ka namana. Jalo o ne a se Modimo Morwa, jaaka thuto ya Tharonngwe e bontsha.—1 Johane 5:5.

A O Ne A Sa Dumele Lefoko La Modimo?

Thuto ya Tharonngwe e ile ya tlhotlheletsa go akanya ga baithutabomodimo mo e leng gore ba gagamalela mo go reng Jesu “ga a ka ke a dumela Lefoko la Modimo le molaetsa wa lone” ka gonne “jaaka e le ene Lefoko la Modimo tota, o ka rera ka ga lone fela.”—Angelo Amato, Gesù il Signore, buka e e kwadilweng ka tetla ya baeteledipele ba kereke.

Mme gone, go bo Jesu a ile a umaka Dikwalo gangwe le gape go supa eng? Fa a ne a raelwa o ne a araba go tswa mo Dikwalong ka makgetlho a le mararo. Karabo ya boraro ya ga Jesu e ne e bolelela Satane gore o ne a obamela Modimo fela. (Mathaio 4:4, 7, 10) Jesu o ne a bua ka makgetlho a le mantsi ka ga boperofeti jo bo neng bo bua ka ga gagwe, a bontsha gore o dumela mo go diragadiweng ga jone. (Mareko 14:21, 27; Luke 18:31-33; 22:37; bapisa Luke 9:22; 24:44-46.) Jaaka re sa tswa go sekaseka kgang eno, re tshwanetse go swetsa gore Jesu o ne a itse Dikwalo tse di neng di tlhotlheleditswe ke Rraagwe, o ne a na le tumelo mo go tsone, mme o ne a dumela gotlhelele mo boperofeting jo bo neng bo boleletswe pele ka ga diteko tsa gagwe, dipogiso, loso le go tsoga ga gagwe.

Jesu, Sekao Sa Tumelo E E Tshwanetseng Go Latelwa

Jesu o ne a tshwanelwa ke go lwa ntwa ya tumelo go ya fela kwa bokhutlong gore a tle a boloke boikanyegi jwa gagwe go Rraagwe le gore a tle a ‘fenye lefatshe.’ (Johane 16:33) Motho ga a ka ke a bona phenyo e e ntseng jalo kwantle ga tumelo. (Bahebere 11:6; 1 Johane 5:4) Ka ntlha ya tumelo e kgolo eo, o ne a nna sekao mo balateding ba gagwe ba ba ikanyegang. Ruri o ne a na le tumelo mo Modimong wa boammaaruri.

[Ntlha e e kwa tlase]

[Lebokoso mo go tsebe 15]

Jesu Ke “Mowetsi,” Yo O Neng A Dirwa Boitekanelo

Bahebere 2:10: “Go ne go tshwanetse one o dilo tsotlhe di leng ka one, le o dilo tsotlhe di nnetseng ka one, fa o isa bana ba le bantsi kgalalelong, gore o dire mosimolodi wa poloko ya bone boitekanelo ka dipogisego.”

Bahebere 2:17, 18: “Go ne go mo tshwanetse go dirwa jaaka bomonnawe mo dilong tsotlhe, gore a nne moperesiti yo mogolo, yo o boutlwelobotlhoko le boikanngo mo dilong tse e leng tsa Modimo, go direla dibe tsa batho tetlano. Gonne e re ka ene ka esi a bogisegile ka a raelwa, o nonofile go thusa ba ba raelwang.”

Bahebere 3:2: “Yo o ne a ikanyega mo go one o o mmeileng, jaaka le ene Moše a ne a ntse mo ntlong yotlhe ya one.”

Bahebere 4:15: “Moperesiti yo mogolo yo re nang nae, ga se yo o sa ka keng a angwa ke go utlwana le rona makoa a rona; mme ke yo o kileng a raelwa mo dilong tsotlhe jaaka rona, le fa go ntse jalo a se na boleo.”

Bahebere 5:7-9: “E bong Jesu yo e rileng mo metlheng ya gagwe a le mo nameng, a sena go isa merapelo le mekokotlelo e e nang le selelo se setona, le dikeledi, kwa go ene yo o nonofileng go mo golola mo losong; ya re a sena go utlwiwa ka ntlha ya go boifa Modimo ga gagwe; le fa a le ngwana, le fa go ntse jalo, a ithuta kutlo ka dilo tse o di bogileng. Mme e rile a sena go dirwa boitekanelo, a tswa mosimolodi wa poloka e e sa khutleng.”