Babulatsela Ba Lere le go Amogela Masego

“BOBULATSELA bo gaisa go atlega lefa e le ka tsela efe mo tirong ya boitshediso. Ga go na sepe se se ka itumedisang motho go feta go thusa batho gore ba itse Jehofa le boammaaruri jwa gagwe.” Go ne ga bolela jalo mosadi mongwe wa Mokeresete yo o neng a tlhopha go bula tsela—go rera ka Bogosi ka nako e tletseng—jaaka tiro ya gagwe. Ke ditiro dife tse dingwe tse di ka dirang gore motho a itumele jaana?

Bobulatsela ke mokgele o o kwa godimo e bile ke tshiamelo e e botlhokwa thata. Motho a ka tlhopha jang tsela e e ntseng jalo ya botshelo? Ke eng se se tlhokegang gore motho a kgone go bula tsela ka nako e telele go fitlha a bona masego a go nna mmulatsela?

Go na le dilo tse pedi tse di botlhokwa. Sa ntlha, motho o tshwanetse gore a bo a le mo boemong jo bo siameng. Batho ba bantsi ba tshela kafa tlase ga maemo a a sa ba letleng go ka bula tsela. Sa bobedi, motho o tshwanetse go tshwanelega sentle semoyeng mme a lebe dilo ka tsela e e tshwanetseng. Lefa go ntse jalo, lefa maemo a motho a mo letla gore a ka bula tsela kana nnyaa, rotlhe re ka dira gore re nne le dinonofo tsa Bokeresete.

Lebaka la Go Bo Bangwe ba Bula Tsela

Motho o tshwanetse gore a nne le dinonofo dife gore a tle a nne mmulatsela yo o atlegang? Gone mme, go botlhokwa gore motho a nne le bokgoni jwa go rera. Babulatsela ba tshwanetse gore ba itse gore ba ka neela batho ba ba sa ba itseng jang mafoko a a molemo, ba itse go dira maeto a go boela mo bathong ba ba kgatlhegang, ba bo ba itse go tshwara dithuto tsa Bibela. Fa mmulatsela a sa kgone go dira dilo tseno a ka nna a kgobega marapo. Lefa go ntse jalo, dilo tse dingwe le tsone di botlhokwa.

Ka sekai, sengwe le sengwe sa kobamelo ya rona se ama kamano ya rona le Jehofa mmogo le phuthego ya gagwe. Seno se akaretsa go bula tsela. Mmulatsela mongwe yo mosha yo o bidiwang Rado o ne a tlhalosa jaana: “Ga go na sepe se se molemo go gaisa se mosha a ka se dirang go na le go gakologelwa Jehofa le go tsamaya mo tseleng ya gagwe ya boammaaruri.” Ee, go bula tsela ke tsela e e molemo e basha ba ka bontshang ka moo ba ratang Jehofa ka teng le ka moo ba atamalaneng le ene ka teng.—Moreri 12:1.

Kitso le temogo le tsone di botlhokwa. (Bafilipi 1:9-11) Mme tota, dilo tseno ke tsone mafura a a dirang gore enjene ya rona ya semoya e nne e tsamaye. Go ithuta ka namana ka metlha go botlhokwa gore re se ka ra lapa semoyeng, le gore re se ka ra felelwa ke tlhoafalo le gore re se ka ra belaela sepe. Ka jalo, kitso e re e bapalang ga e ya tshwanela go tsena fela mo tlhogong mme gape e tshwanetse go tsena mo pelong. (Diane 2:2) Ka jalo, mo godimo ga go ithuta ka namana, re tshwanetse gore re nne le nako ya go rapela le go tlhatlhanya gore kitso e re e amogelang e tle e ame dipelo tsa rona. Mme morago ga moo, fa maemo a rona a re letla, re tla batla go bula tsela.—Bapisa Esere 7:10.

Fa motho a tsena mo tirelong ya bobulatsela o tlhoka gape gore a nne le moya wa go intsha setlhabelo. Mosha mongwe yo o bidiwang Ron o ne a setse a dirile dithulaganyo tsa go bula tsela. O ne a letile fela gore maemo a gagwe a siame gore a tle a kgone go simolola. Se tota a neng a se batla e ne e le tiro e e neng e tla dira gore a kgone go bula tsela le gore a kgone go nna le dilo tse di manobonobo tsa botshelo. Fa a ne a bolelela kgaitsadi mongwe yo o godileng semoyeng seno, karabo ya gagwe e ne ya mo gakgamatsa. O ne a bolela jaana: “Jehofa o segofatsa ditiro e seng ditsholofetso.” Mosha yono o ne a bona tiro e e duelang madi a a kwa tlase e e neng e mo fa nako ya go bula tsela. Fa motho a dirisa Mathaio 6:25-34 go tla mo thusa gore a kgone go tshela ka madinyana a mannye.

Go ikokobeletsa go dirisa dikakantsho tse di molemo go ka re thusa go tsena mo tirelong ya go nna mmulatsela. Hanna o ne a tlhagolela keletso ya bobulatsela a sa le mosha mo botshelong jwa gagwe jaaka Mokeresete. Mme lefa go ntse jalo, ga a ka a bula tsela fa a ne a godisa lelapa mme moragonyana o ne a simolola kgwebo. Ka ntlha ya go utlwa kgakololo e e molemo ya bagolwane ba ba lemogang dilo, o ne a tlogela tiro ya boitshediso e e neng e mo kgatlha mme a tsena mo tirelong ya bobulatsela. Hanna jaanong o itumelela go thusa batho ba bangwe gore le bone ba ineele le go thusa batho ba ba tsidifetseng.

Go anaanela se boammaaruri bo se diretseng motho mo botshelong le gone go ka tlhotlheletsa motho go bula tsela. Akanya ka kgang ya mosadi mongwe yo o neng a hutsafetse thata yo lenyalo la gagwe le neng le thubega. Boemo jono bo ne jwa fetoga ka tsela e e gakgamatsang fa a ne a ithuta boammaaruri jwa Lefoko la Modimo mme a bo dirisa. E re ka a ne a itumeletse se boammaaruri bo neng bo se mo diretse, o ne a swetsa gore tsela e e molemolemo e a ka bontshang kanaanelo ya gagwe ka yone ke go nna mmulatsela mme a thuse batho ba bangwe. O ne a dira jalo, mme gone jaanong o amogela masego a go nna le dithuto tse dintsi tsa Bibela le botshelo jo bo itumetseng jwa lelapa.

Ba Bangwe Ba Ka Kgona go Thusa

Gantsi babulatsela ba dira gore go nne le babulatsela ba bangwe. Rado, yo o umakilweng kwa pelenyana, o ne a na le dingwaga di le thataro fa batsadi ba gagwe ba ne ba ithuta Bibela le babulatsela bangwe ba babedi. Fa a ne a sale mmotlana thata, o ne a tsamaya ka metlha le bareri bano ba nako e e tletseng mo bodiheding jwa tshimo. Rado le ene o ne a nna mmulatsela wa ka metlha fa a na le dingwaga di le 17. Mosha yo mongwe ebong Arno, o ne a godiseditswe mo lelapeng la Bakeresete mme lefa go ntse jalo o ne a koafala semoyeng. Moragonyana o ne a dira dithulaganyo tsa go nonotsha bomoya jwa gagwe, mme gone jaanong o bolela jaana: “Babulatsela ba ne ba nkgothatsa thata. Ke ne ke nna le bone segolobogolo ka nako ya malatsi a boikhutso a sekolo mme ka dinako tse dingwe ke ne ke bega diura tse di ka nnang 60 ka kgwedi mo tirelong ya tshimo. Morago ga moo, go tsena tirelong ya bobulatsela jwa ka metlha [e e batlang diura di le 90 ka kgwedi] go ne go se thata jalo.” Basha ba bantsi ba thusitswe ke go nna ba akanya ka kgakololo e e mo go 1 Bakorintha 7:29-31 e e bolelang gore ba se ka ba bapala dilo tsa lefatshe ka mo go feteletseng.

Moya wa bobulatsela o ka amogelwa ka bonako mo lelapeng leo mo go lone dilo tsa semoya di tlang pele le fa batsadi ba kgothaletsa bana ba bone go tsena mo bodiheding jwa nako e e tletseng. Philo, yo o neng a golela mo lelapeng le le ntseng jalo, o akgela jaana: “Batho ba bantsi ba ne ba nkgakolola gore ke tswelele ka dithuto tsa me gore ke tle ke itirele isagwe. Mme lefa go ntse jalo, batsadi ba me ba ne ba nthusa gore ke dire tlhopho e e botlhale go gaisa eo. Ba ne ba mpolelela gore fa e le gore tota ke batla go itirela isagwe, selo sa ntlha e tshwanetse go nna go tlhagolela go nna le kamano le Jehofa.”

Lekgarebe lengwe le le bidiwang Thamar le lone le bolela gore le mo tirelong ya bobulatsela ka ntlha ya sekao le maiteko a batsadi ba gagwe. O bolela jaana: “Tota ga ke kgone go bolela gore ke simolotse leng go nna le pono ya semoya ka botshelo, mme ke a itse gore ga ke a tsholwa ke na le yone. Go nna le seabe ka metlha mo tirelong ya tshimo go ya dipokanong ka metlha, mmogo le go rata boammaaruri tota ga batsadi ba me, go nthusitse thata gore ke lebe dilo ka tsela ya semoya.”

Go Ngaparela Tshwetso E O E Dirileng

Fa motho a sena go tsena mo tirelong ya bobulatsela, mme a itshoka mo go yone, tshwetso e e botlhale e a e dirileng e tla mo solegela molemo thata. Go na le dikgakololo tse dintsi tse di ka newang mabapi le kafa seo se ka dirwang ka teng. Ka sekai, babulatsela ba tla bo ba dira sentle fa ba ka ithuta ka moo ba ka rulaganyang nako ya bone sentle ka teng gore ba e dirise ka tsela e e molemo ka mo ba ka kgonang ka teng. Lefa go ntse jalo, selo se se botlhokwatlhokwa ke kamano ya motho le Jehofa le phuthego ya Gagwe.

Selo se sengwe gape ke go rapela ka metlha. “Fa ke tsena mo boammaaruring, ke ne ke batla go bula tsela tota,” go bolela jalo Cor. Lefa go ntse jalo, rraagwe o ne a batla gore a fetse pele khoso nngwe kwa Yunibesithing ya Temothuo. Morago ga moo, Cor o ne a simolola go bula tsela. Fa nako e ntse e ya o ne a nyala mme mosadi wa gagwe a mo pata mo tirong ya bobulatsela. Fa a ne a nna moimana, o ne a lebana le kgang ya gore a ka nna a tlogela tiro ya bobulatsela. “Ke ne ka rapela Jehofa ka metlha ke mmolelela ka moo ke eletsang ka teng go tswa pelong go tswelela pele ka go bula tsela,” go bolela jalo Cor. Kgabagare Cor o ne a bona tiro e e neng ya dira gore a kgone go bula tsela a ntse a godisa bana.

Go kgotsofalela dilo tse di bonalang tse o di tlhokang ke nngwe ya dilo tse di ka thusang motho gore a nnele ruri mo bodiheding jwa bobulatsela. Moaposetoloi Paulo o ne a kwala jaana: “Lo ikgolole mo go rateñ khumō ea madi; lo nnè boitumèlō ka dilō tse lo nañ nacō: gonne go buile èna ka esi, a re, Ga nketla ke gu tlhōkahalèla gopè, le gōna ga nketla ke gu latlha gopè.” (Bahebera 13:5) Go kgotsofala ka dilo tse ba nang natso go ile ga thusa Harry le Irene gore ba tswelele pele ba bula tsela. Irene yo o foufetseng o na le dingwaga di le robedi a ntse a bula tsela. “Le ka motlha ga re ise re ko re lebe boemo jwa rona jwa tsa madi e le bothata,” a bolela jalo. “Re ne re tlhokomela fela gore re se ka ra ithwesa morwalo o o sa tlhokegeng wa madi. Re ne re sekaseka maemo ka metlha. Ka metlha re ne re tshela botshelo jo bo lekalekaneng, mme lefa go ntse jalo e le jo bo itumedisang, le jo bo nang le masego a mantsi.”

Boitumelo jo Bogolo le Masego a Mantsi

Fa a leba kwa morago mo dingwageng tse robongwe tse a ntseng a bula tsela ka tsone, Thamar o bolela jaana: “O atamalana thata le Jehofa, mo o ka reng o go tshwere ka letsogo.” (Pesalema 73:23) Go na le diteko dingwe tse a di gakologelwang. “Go sa itekanela ga me le ga ba bangwe go ne go ntshwenya ka metlha,” Thamar o oketsa jalo. “Mo godimo ga moo, ke ne ke a tle ke lebe bakaulengwe le bokgaitsadi ba ba tlhophileng tsela ya botshelo ya go nna le dilo tse di bonalang tse di oketsegileng, mme go ne go bonala tsela e ba e tlhophileng e le monate thata fa ke ne ke tsamaya ka ntlo le ntlo ka nako ya dipula le serame. Mme lefa go ntse jalo, mo pelong ya me ke ne ke se kitla ke ananya se ke se dirang le se sengwe. Ke selo sefe kwantle ga bobulatsela se se ka tlisetsang motho boitumelo jo bo ntseng jalo, go kgotsofala semoyeng, le masego a a ntseng jalo?” A le wena o ka tseela boitumelo le masego a a ntseng jalo kwa godimo jalo?

E re ka babulatsela ba dirisa nako e ntsi ba le mo bodiheding jwa Bokeresete, ba kgona go thusa batho ba le mmalwa go nna le kitso ya boammaaruri ya Bibela. Harry le Irene ba ba umakilweng kwa pelenyana, ba bolela jaana: “Go na le ditshiamelo tse dintsi tse motho a ka di bonang mo phuthegong ya ga Jehofa, mme go thusa motho yo mongwe gore a gatele pele gore a bo a nne motlhanka wa ga Jehofa ke tshiamelo e kgolo go di gaisa tsotlhe.”

Mmulatsela mongwe o ne a tlhalosa sentle fa a ne a bolela jaana: “Mafoko a a mo go Diane 10:22 a diragetse mo go nna: ‘Tshegofatso ya ga Jehofa—e a humisa, mme ga a ke a e oketsa ka bohutsana.’ Lekwalo leno le ne le diragala mo go nna gangwe le gape mo dingwageng tsa fa ke ntse ke direla Jehofa.”

Batsadi, a lo tsenya keletso ya go bula tsela mo baneng ba lona? Babulatsela, a lo leka go tsosa keletso eno mo go ba bangwe? Bagolwane, a lo ema babulatsela ba ba mo phuthegong ya lona nokeng mme a lo thusa ba bangwe gore ba nne le moya wa bobulatsela? E kete go ka nna le batho ba ga Jehofa ba ba oketsegileng ba ba tla tlhotlheletsegang gore le bone ba iponele masego a mantsi ao fa ba ntse ba le mo tirelong ya bobulatsela.