Mopesalema O Opela Dipako Tsa ga Jehofa

“Dipako.” Seno ke se se bolelwang ke leina la Sehebera go raya buka ya Dipesalema, mme a bo le tshwanela jang ne! Tota, buka yotlhe, ke mokgosi o moleele wa pako go Jehofa Modimo. Dipesalema di anela ka dinonofo tsa ga Jehofa le ditiro tsa gagwe tse dikgolo. Di tshotse dipolelelopele mme ebile di re bolelela gape kaga maikutlo a bakwadi ba ba tlhotlheleditsweng fa ba ntse ba itshokela pogiso, go okiwa, go kgobega marapo, mme le e leng segakolodi se se bosula. Bakeresete ba le bantsi ba ba bogang diteko tse di tshwanang ba ile ba bona nonofo go tswa mafokong a Dipesalema.

Buka ya Dipesalema e kgaogantswe ka dikarolo di le tihano. Fano re buisanya ka ya ntlha mo go tseno. Dipesalema 1 go ya go 41.

Go Ineela mo Maikaelelong a ga Jehofa

Tsweetswee Bala Dipesalema 1 go ya go 14. Setlhopha seno sa Dipesalema se bua ka dingwe tsa ditlhogo tse dikgolo tsa buka ya Dipesalema: botlhokwa jwa Molao, dipolelelopele kaga go tla ga Kgosi ya Bomesia, le go rapelela thuso fa motho a lebaganye le dikgatelelo tse di botlhoko. Mme gape, re ithuta gore, go sa kgathalesege go atlanegelwa ke dilo ga baikepi ga nakwana, basiami ba tla segofadiwa.

◆ 2:1​—Ke eng “selō sa boithamakō” seo merafe e nnelang go se ‘tlhatlhanya’?

Merafe e ne ya nnela go ‘tlhatlhanya’ ka go tsweledisa taolo ya yone, mo boemong jwa go amogela Motlodiwa wa ga Jehofa. Mafoko ao a ne a dira mo lekgolong la ntlha la dingwaga C.E., fa balaodi ba Roma le ba Bajuda ba ne ba dirisanya mmogo go bolaya Kgosi e e tloditsweng ke Jehofa, Jesu Keresete. (Ditihō 4:26-28) Lefa go ntse jalo, tiragatso e kgolwane e ile ya nna fa e sale ka 1914, fa merafe yotlhe e ne e gana Kgosi e e tlhomilweng mo setilong sa bogosi ke Modimo mme e leka go etleetsa bolaodi jwa yone.

◆ 2:12​—Ke goreng taolo e ne e re, “Atlañ Morwa”?

Mo metlheng ya Bibela, go atla e ne e le pontsho ya botsalano mme go ne go dirisiwa go amogela baeng ka tsela ya go ba tsholela mo legaeng. Mo temaneng eno, Jehofa o laela merafe go atla, kana go amogela, Morwawe jaaka Kgosi ya gagwe e a e tloditseng.​—Pesalema 2:2, 6-8.

◆ 9:12​—Ke ka ntlhayang fa Jehofa a ‘lefetsa madi’?

Jaaka moatlhodi yo o atlholang, Jehofa o senka ba ba nang le molato wa madi ka ntlha ya go bo ba tsholotse madi a batho ba gagwe ba ba senang molato. (Genesise 9:5, 6; Luke 11:49, 50) Mme ebile gape o otlhaya ba ba molato. Mme dikotlhao tsa gagwe ga se tse di sa tlhaoleng. Mopesalema Dafide o a re tlhomamisetsa: “Ga a lebale go goa ga bahumanegi.”​—Bapisa 2 Petere 2:9.

◆ 11:3​—“Methèō” e e senngwang ke eng?

Metheo eo ke tshiamiso, molao, le thulaganyo​—metheo eo batho ka kakaretso ba ikaegileng mo go yone. Fa thulaganyo ya leago e senyega, go sena tshiamiso, motho yo o boifang Modimo o tshwanetse go dirang? O tshwanetse go ikanya Jehofa. O ntse mo setilong sa gagwe sa bogosi sa selegodimo, a bona sengwe le sengwe se se diragalang, mme ga a kitla a re latlha.

Thuto mo go Rona: Pesalema 4:5 e kgothaletsa batho ba ba boifang Modimo go ‘isa ditlhabelo tsa tshiamo.’ Mo motlheng wa ga Dafide, Baiseraele ba ne ba tshwanelwa ke go ntsha ditlhabelo mo sebesong sa ga Jehofa. Mme gape ba ne ba tshwanetse go nna le boikutlo jo bo siameng le go nna ba ba ikotlhaileng ka mmatota. (Isaia 1:11-17) Fa Bakeresete ba ntsha ditlhabelo tsa bone tsa semoya, le bone, ba tshwanetse go nna le maikutlo a mantle mme ba tshwanetse go tshela go ya ka ditekanyetso tse di kwa godimo tsa ga Jehofa.​—Bahebera 13:4, 5, 15, 16; 1 Petere 2:1, 5.

Modimo o o Senang Bolekanngo

Bala Dipesalema 15 go ya go 24. Setlhopha seno sa Dipesalema se tshotse ditlhaloso di le mmalwanyana tse di bakang Jehofa. Ke Mosireletsi wa batho ba gagwe (18), Mmopi le Monei-molao (19), Mmoloki (20), Mosireletsi wa Kgosi e a e itihophetseng (21), Modisa yo Mogolo (23), le Kgosi e e Galalelang (24).

◆ 16:10​—“Moitshepi” [moikanyegi] yo o umakiwang fano ke mang?

Baithuti bangwe ba Bibela ba dirisetsa temana eno go baikanyegi ka kakaretso, ba kaya gore ba tshegediwa ke go bo mo mekwalong mengwe ya Sehebera lefoko “moikanyegi” le mo bontsing. Lefa go ntse jalo, fa temana eno e tsopolwa mo Dikwalong tsa Bokeresete tsa Segerika, lefoko le mo bongweng, e le mo go supang gore ke “moikanyegi” a le mongwe fela fela. Ene ke mang? Mo lekgetlong la ntlha, e ka ne e le Dafide ka boene. Mme ka tsela ya boperoteti, Petere le Paulo boobabedi ba dirisetsa temana eno go Jesu.​—Ditihō 2:25-32; 13:35-37.

◆ 21:3​—“Serwalō sa gouda e e bontlè bogolo” e ne e le eng?

Gongwe seno e ne e le serwalo sa bogosi sa sebele, jaaka se se neng sa rolwa modimo wa disetwa Malekame. (Bapisa 2 Samuele 12:29, 30.) Kana gongwe serwalo ke sa tshwantshetso tela, tshwantshetso ya lebaka la go bo phenyo ya ga Dafide e ne e ile ya kgabisa bogosi jwa gagwe jo bo galalelang. Lefa go le jalo, ka tsela ya seperofeti, pesalema eno e supa ka tsela eo Jehofa a neng a neela Jesu serwalo sa bogosi ka 1914 ka yone. “Serwalō sa gouda e e bontlè bogolo” se supa bonneteng jwa gore puso ya gagwe e ne e tla nna ya boleng jo bo kwa godimodimo.

◆ 22:1​—A Modimo o ne a latlhile Dafide?

Nnyaa, mme e ne ya re fa Dafide a le mo kgatelelong e kgolo ya baba ba gagwe, go ne ga bonala ekete go ntse jalo. Lefa go ntse jalo, boitshwaro jwa ga Dafide jaaka motho fa a ne a le mo botlhokong bo ne bo sa supe gore o tlhaela tumelo, ka jaana a tswelela ka go rapelela kgololo ka tsholofelo. (Pes 22 Ditemana 16-19) Ka mo go kgatlhisang, Jesu o ne a tsopola Pesalema eno pele ga fela a swela mo mokgorong wa tlhokotatso. Ka go botsa a re “Ka ntlhayang”? Jesu o ne a bontsha kgatelelo e kgolo e a neng a le mo go yone, fa gone a ntse a supa kafa a senang molato ka gone mo ditatofatsong tsa maaka tse di neng tsa baka gore a bolawe.

Thuto mo go Rona: Moaposetoloi Paulo o tsopola Pesalema 22:22 a bo a e dirisetsa tseleng eo ka yone Jesu Keresete a etelelang pele bomonnawe ba ba tloditsweng mo go boleleng leina la ga Jehofa. (Bahebera 2:11, 12) Pesalema 22:27 e supa nakong ya fa “ditshika cotlhe tsa merahe” di tla kopanelang le batho ba ga Jehofa mo go mmakeng. Gompieno, boidiidi jo bogolo, jwa merafe yotlhe bo obamela Modimo mmogo le bonnake ba ga Jesu. (Tshenolō 7:9) Re tshwanetse go ikatamalanya thata le phuthego eno e e rulagantsweng ka tsela ya bomodimo.

Nonofo e Kgolo ya ga Jehofa

Bala Dipesalema 25 go ya go 34. Mo Dipesalemeng 25 le 26, Dafide o bua kaga keletso ya gagwe ya go tsamaya mo bothokgaming. Go tswa foo go latela ditlhaloso tsa go ikanya mo go Jehofa ka bopelokgale mme, mo Pesalemeng 33, ke tlhaloso e e botswerere kaga nonofo ya ga Jehofa.

◆ 28:8​—“Motlodiwa” wa ga Jehofa ke mang?

Mo temaneng eno “motlodiwa” ke batho ba Jehofa a ba ikgethetseng, jaaka go bonwa mo tselaneng e e bapileng le yone e e reng “Yehofa ke thata ea bōnè.” Mafoko ano a botlhokwa kafa boperofeting fela jaaka a Habakuke 3:13. A supa kafa Jehofa a tla bolokang masalela a batlodiwa ba gagwe mo ntweng ya Hara-Magedona.

◆ 29:5, 6.​—Lentswe la ga Jehofa le roba jang ditlhare tsa masedara?

Mo pesalemeng eno nonofo ya ga Jehofa e supiwa ka phepafalo ka go tshwantsha lentswe la gagwe le setsuatsue. Setsuatsue se tsubutla go tloga kwa Lebanona kwa bokone go ya borwa kwa dikgaolong tsa sekaka, se lere poifo e kgolo fa se ntse se feta. (Pes 29 Temana 9b) Diphefo tsa sone di tsubutletsa masedara a Lebanona, di dira gore a ‘kalape jaaka namane,’ mme dikgadima tsa sone di ratha ditlhare dingwe, ‘di di robe.’ Ka tsela e e tshwanang, diphefo tsa setsuatsue ‘di roromisa naga’ (Pes 29 temana 8), se fudua metlhaba e e mo sekakeng gore e bo e bonale jaaka ekete e roroma mo botlhokong.

◆ 33:6​—‘Moya wa molomo wa ga Jehofa’ ke eng?

Moya, kana mohemo, fano go tewa moya o o boitshepo wa ga Jehofa, kana maatla a a dirang. Ereka mafoko a rona le mohemo di tswa mo melomong ya rona ka nako e le nngwe, go ntse fela jalo, lefoko la ga Jehofa, kana taolo, fano di pataganngwa le mohemo, kana moya. Modimo o ne a dirisa moya wa gagwe o o boitshepo fa a ne a bopa letsatsi, kgwedi, le dinaledi, ke gore, masomosomo otlhe a tshwantshetso a magodimo a re a bonang.​—Bapisa Genesise 1:1, 2.

Thuto mo go Rona: Go Pesalema 26:5, Dafide o rile o ile a ila phuthego ya baikepi. Basupi ba ga Jehofa gompieno ka mo go tshwanang ba tila go ikopanya le ba ba bosula. (1 Bakorintha 15:33) Fela jaaka Dafide a ne a bontsha kgatlhego e kgolo mo ntlong ya ga Jehofa, Bakeresete bano ba boammaaruri ba ipelela go kopana mmogo mo phuthegong ya ga Jehofa.​—Pesalema 26:6-8; 122:1.

“Go Bakwè Yehofa”

Bala Dipesalema 35 go ya go 41. Pesalema e e tlhomologileng mo setlhopheng seno ke Pesalema 36, eo e tlhaolang Jehofa jaaka Motswedi wa botshelo, mme Pesalema 37, e re tlhomamisetsa ka dituelo tse di tla bonwang ke ba ba rutegang. Gape, se se tshwaegang segolo-bogolo, ke Pesalema 40, e e tshotseng ditlhaloso tsa boperofeti kaga Jesu Keresete.

◆ 35:19​—Ke ka ntlhayang fa baba ba ga Dafide ba ne ba tla ‘soka leitlho’?

Mokwalo ono wa Sehebera ka sebele fela o ba bitsa “baba ba me ba maaka.” Ke gore, kilo ya bone e ne e tlhaga fela mo maikutlong a a sa siamang. Dafide o ne a sa dira sepe se se neng se tlhoka gore ba mo tlhoe, mme o ne a rapelela gore ba seka ba bona sebaka sa go ipela kana go itumela kaga gagwe. (Temana 19a) Go tswa foo, o ne a kopa gore baba ba gagwe ba ba bosula ba se bone lebaka la gore ba “shoke leitlho,” ka go bo go soka leitlho ga sebele go ne go tla fa bosupi jwa gore ba ne ba itumela thata thata ka ntlha ya go atlega ga maano a bone a a boikepo. (Diane 10:10; 16:29, 30) Jesu o ne a tsopola temana eno a bo a e dirisa mo go bao ba neng ba mo tlhoile.​—Yohane 15:24, 25.

◆ 36:3​—A baikepi bao pele ba ne ba le botlhale?

Se se kaiwang ke gore go ne go na le phetogo mo boitshwarong jwa motho yo o ntseng jalo le gore o ne a sa tlhole a le seo pele a neng a ipolela gore o sone. Gongwe nako nngwe o ne a supa botlhale mme a dira dilo tse di molemo. Mme o ne a tlogetse seo, a nna motenegi. Kgosi Saulo ke ene yo o neng a tlogela go nna botlhale, ka go tlhoa Dafide. (1 Samuele, kgaolo 18) Batlhotlhomisi bangwe ba ile ba ikutlwa le e leng gore Dafide o ne a kwala Pesalema 36 a gopotse ka Saulo.

◆ 40:6​—Ke eng se se bolelwang ke mafoko a a reng, “ditsèbè tsa me u di kabolotse”?

Seno se ka raya gore Jehofa o ne a dirile gore ditsebe tsa ga Dafide di utlwe dikaelo tsa Modimo, kana le e leng gore Jehofa o ne a bopile ditsebe tseo Dafide a neng a ka utlwa ditaolo tsa Gagwe ka tsone. Ka mo go kgatlhisang, go Septuagint mafoko ano a kwalwa ka go re: “O mpaakanyeditse mmele.” E ka ne motswedi wa thanolo eno e le ofe, o ntse o tshotse mogopolo o o tshwanang wa konokono le wa Sehebera. Ke gore, o otlelela kafa kutlo e tlhokafalang ka gone. (Bapisa 1 Samuele 15:22; Hosea 6:6.) Paulo o ne a dirisa temana eno go Jesu Keresete. (Bahebera 10:5-10) Ereka Paulo a ne a dirisa tlhaloso ya Septuagint, mafoko a a reng “o mpaakanyeditse mmele” jaanong ke karolo ya “Lokwalōo loñwe le loñwe” lo lo “kwadilweñ ka tlhotlheleco ea Modimo.”​—2 Timotheo 3:16.

Thuto mo go Rona: Pesalema 37 e re tsholetse dithuto di le dintsi, jaaka fa re tshela mo losikeng lo lo boikepo. Lemororo badira-bosula ba atlega, ga re a tshwanela go ba fufegela mme re leke go ba etsa. Go na le moo, re tshwanetse go ‘itapolosa mo go Jehofa,’ re sa tshwaye diphoso, go na le moo, ka tidimalo re ikantse mo go ene gore a re thuse mo nakong e e leng ya gagwe.​—Pesalema 37:5, 7.

Ee, Dipesalema di na le mafoko a le mantsi a a tlhotlheletsang le a a gomotsang. Dipesalema tseno tse 41 tsa ntlha di ile tsa bontsha gangwe le gape gore, lefa maemo a ka tlhola a le bokete go le kana kang, Jehofa ga a kitla a re latlha. Tota ruri, morago ga go di bala, re tshwanetse go tlhotlhelediwa go boeletsa mafoko ao a digelang Pesalema 41: “A go nnè go bakwè Yehofa, Modimo oa Iseraela, go cwa kwa go senañ tshimologō go ea kwa bosakhutleñ. A go nnè yalo, hèla yalo.”