Dipotso tse di Tswang go Babadi

◼ Ereka taolo ya ga Jehofa go Yeremia 22:30 e ne ya kganela setlogolwana sa ga Jehoiakhine (Jekonia, kana Konia) gore a seka a tlhola a nna mo setilong sa ga Dafide sa bogosi, a seno se ne se ka se tlose tshwanelo lefa e ka nna efe mo go Josefa gore o ka fetisetsa tshiamelo ya bogosi go Jesu?

Taolo ya ga Jehofa mabapi le Jehoiakhine (Konia) e balega jaana: “Kwalañ monna eo, go re, ga a na ñwana, e le monna eo o se ketlañ a tlhōgōnōlōhala mo metlheñ ea gagwè: gonne ga go na opè oa losika loa gagwè eo o tla tlhōgōnōlōhalañ, a dula mo setuloñ sa ga Dafide sa bogosi, me a tlhōla a busa gopè mo Yuda.” Taolo eno e ne thibela setlogolwana lefa e ka nna sefe sa ga Jehoiakhine gore o ka tlhola a busa a le mo setilong sa bogosi sa ga Dafide mo Juda. Mme seno se ne sa seka sa kganela moralo wa segosi le ditshiamelo tsa boswa gore di ka feta Jehoiakhine le ditlogolwana tsa gagwe mme tsa ya go Josefa mme morago go Jesu. E ne e ka se thibele Jesu gore o ka diragatsa taolo e nngwe ya ga Jehofa mabapi le serwalo sa bogosi sa ga Dafide: “Ga go ketla go tlhōla go nna, go tsamaea go tla èna eo tshiamèlō ea gōna e leñ ea gagwè: me ke tla gu mo naea.” (Esekiele 21:27) E le ka ntlha yang? Ka go bo Jesu, yo o neng a neelwa “tshiamèlō ea gōna,” a ne a se kitla a busa a le mo setilong sa bogosi mo Juda, mme e leng go tswa magodimong!

Fa a ntse a le mo botshwarong mo Babelona, Jehoiakhine o ne a tsala bana ba supa, go akareletsa Salathiele le Pedaia. Mme ereka jaana go sena setlogolwana sepe sa ga Jehoiakhine se se kileng sa nna mo setilong sa bogosi sa ga Dafide a busa mo Juda, go ntse jaaka ekete o ne a kwadilwe jaaka ‘yo o senang ngwana.’ Lefa go le jalo, Mathaio o akaretsa Jekonia (Jehoiakhine), Salathielea le Serubabele, gareng ga ba bangwe, fa a rulaganya losika lwa botsalo lwa ga Jesu. Go bo bone ka bobone ba ne ba thibetswe go ka nna mo setilong sa bogosi sa selefatshe ba busa go ne go sa reye sepe. Mme ebile, go ne go sa fe Luke le Bajuda ba bangwe mo Lekgolong la ntlha la dingwaga bothata bope gore losika lwa botsalo lwa ga Maria lo bo lo ne lo ka latedisiwa go boela kwa go Jehoiakhine ka Salathiele.​​—Mathaio 1:11, 12; Luke 3:27.

Mo go tlhomamiseng ditshwanelego tsa yo o iphakang gore ke Mesia, kana Motlodiwa wa ga Jehofa, go ne go tla bo go le botlhokwa thata gore Bajuda ba kgone go latedisa losika lwa gagwe lwa botsalo go ya kwa morago fela kwa moralong wa segosi wa dikgosi tsa ntlo ya ga Dafide. (Bapisa Yohane 7:40-42; Ditihō 2:30.) Moralo wa bogosi ka Josefa (o o neng o rulagantswe ke Mathaio) le moralo wa tlholego (o o neng o rulagantswe ke Luke), mongwe le mongwe o tsaya tsela e e farologaneng go boela kwa go Dafide, tsoo-pedi di direla jaaka bosupi jwa gore Jesu ka phepafalo o na le ditshwanelego tsa botsalo tsa gore ke Mesia, Ene yo o tla ruang setilo sa bogosi sa ga Dafide.

Luke o ne a bona fa go le botlhokwa go kwala lebaka la gore Maria ‘o ne a beeletswe ke monna yo o bidiwang Josefa, wa ntlo ya ga Dafide’ le gore o ne a le “oa kgotla le oa losika loa ga Dafide.” (Luke 1:27; 2:4) Ka gone, ke mo go tshwaegang go bo moengele wa ga Jehofa, fa a ne a neela Josefa ditaelo, a ileng a bua le ene ka mafoko ano: “Yosefa, morwa Dafide.” O ne a bolelelwa jaana mabapi le morwa yo o neng a tla tsalwa ke Maria: “U tla mo raea leina, u re, YESU,” go supa gore Josefa o ne a lebeletswe go tsaya mosimane jaaka ngwana wa gagwe le go mo rupisa jaaka morwawe. (Mathaio 1:20, 21) Mme go Maria, Gabariele o ne a tlhalosa jaana mabapi le Jesu: “Modimo o tla mo naea setulō sa bogosi sa ga Dafide rragwè: Me o tla busa ntlo ea ga Yakobe ka bosakhutleñ; me bogosi yoa gagwè ga bo ketla bo na le bokhutlō.”​—Luke 1:32, 33.

Jesu fa a le mo lefatsheng o ne a bakiwa jaaka “Morwa Dafide,” mme o ne a seka a leka go simolola puso ya gagwe fa a santse a le mo lefatsheng. (Mathaio 9:27; 21:9, 15) O ne a rua sengwe le sengwe seo bogosi jwa selefatshe jwa ga Dafide bo kileng jwa nna naso go ya kafa ditshiamelong tsa segosi, babusiwa le naga, mme o ne a rua mo gontsi thata go tswa go Rraagwe wa selegodimo. Bogosi jwa selefatshe jwa ga Dafide e ne e le motlhala fela o mmotlana wa seo Bogosi jwa selegodimo jwa ga Jesu bo neng bo tla nna sone mo go buseng lefatshe lotlhe. (Daniele 2:44; 7:13, 14) Morago ga a sena go swa le go tsoga, Jesu o ne a tlhatlosediwa setilong sa bogosi sa ga Jehofa kwa magodimong. Mme lemororo losika lwa botsalo lwa gagwe lwa selefatshe, ka Josefa le Maria boo-babedi, lo ka latedisiwa go boela kwa go Jehoiakhine, go bo Jesu a busa mo setilong sa bogosi kwa legodimong ga go ka gope go tlolang taolo eo ya ga Jehofa. Petere o ne a tiisetsa seno ka go lebisa go se Dafide a neng a se kwala a sena go tlhotlhelediwa: “Ke gōna e rileñ ka e le [Dafide] moperofeti, me a itse ha Modimo o kile oa mo ikanèla, go re, o tla baea moñwe eo e leñ oa louñō loa mankopa a gagwè mo setuloñ sa gagwè sa bogosi; Èna, o rile ka seo se a se bōnèla pele, a bua kaga go coga ga Keresete . . . [O] goledicwe ke Modimo go nna kaha cogoñ ye legolo ya ōna” koo, mo lobakeng lo lo tshwanetseng, a tla simololang go busa gareng ga baba ba gagwe ​—Ditihō 2:30-36; Pesalema 110:1, 2.

[Ntlha e e kwa tlase]