Go Lemoga Dikgang

Tshiamiso ya Motlhaselwa

“Bongwe jwa mathata a rona a magolo ke molao wa bokebekwa wa go lefa batlhaselwa,” go boletse jalo Moatlhodi Michael Beal wa North Carolina, U.S.A. Jaaka mongwe le mongwe yo o kileng a thubelwa ntlo, a kgothotshwa, a thukhuthwa kana gongwe a kile a senyediwa a itse, ga se fela gantsi go sa diragaleng gore motlhaselwa a seka a duelwa tse di mo latlhegetseng mme e nna ene a duelang ka makgetho a gagwe go re go tlhokomelwe dikebekwa fa di ne di ka latlhelwa mo kgolegelong. Jo ke boemo jwa tshiamiso ya bokebekwa.

Jaanong, go ya ka The New York Times, thulaganyo ya go baakanya bothata jono e lekiwa kwa North Carolina. Go na le go ba romela kwa kgolegelong kana sekolong sa go ba baakanya, disenyi tsa thaka e tshesane di romelwa ka Matlhatso le maitapoloso go bereka kwa dipolaseng, go lema masimo kana go rema dikgong. Bogolo jwa tuelo ya sesinyi bo ya go motlhaselwa, mme karolo e potlana e beelwa kwa thoko e le seabe seo a se amogelang morago ga motlhasedwi a sena go duelwa ka botlalo. Mo ngwageng wa yone wa ntlha, thulaganyo e ne ya tsaya basimane ba le 34, ba dingwaga tse 10 go ya go tse 15. Mme botlhe kwantle ga a le mongwe, yo o neng a tsamaya, ba ne ba duela batlhaselwa ba bone ka botlalo. Labofelo, tshiamiso ya batlhaselwa!

Lefa go ntse jalo, tshiamiso e e ntseng jalo, e ne e le karolo e e kopanyelediwang mo Molaong o Modimo o neng a o neile morafe wa Iseraele. Mo mabakeng a bogodu kana tshenyo ya dithoto, Molao o ne o batla gore fa mosenyi a ka se duele motlhaselwa madi a a beilweng, o ne a ka rekisiwa jaaka lelata, ka jalo a busetsa motlhaselwa le go dira gore tiro ya bokebekwa e mo tlhokomele. (Ekesodo 22:1-6) Melao eno e bontsha tshiamiso le botlhale jwa “Moatlhodi,” “Motlhōma molaō” le “Kgosi,” e e itekanetseng Jehofa Modimo.—Isaia 33:22.

Boitseanape kana Phoraetso?

Kgatlhego ya botshelo jo eseng jwa lefatshe e ile ya latelwa thata mo dingwageng tsa bosheng jaana, segolo bogolo e le ka ntlha ya go iwa kwa lefaufaung, phoraetso ya boitseanape le madirelo a dibaesekopo. Eleruri, dibaesekopo tse pedi tse di tumileng thata mo ditiragalong—Star Wars le E.T. The Extra-Terrestrial—ka bobedi di mo kgannyeng eno. Ka nako e e tshwanang, dithulaganyo tse di turu tsa boitseanape di tsweletse pele ka tlhoafalo e kgolo thata go batla botshelo kana botlhale bongwe mo lefaufaung ka kwantle. Matswela e nna gore mo bathong ba bantsi, bogolo jang basha, go ntse go thatafalela pele go bolela gore boitseanape bo felela fa kae le gore phoraetso e simolola fa kae. Go nna gone ga botshelo jo eseng jwa lefatshe le kgonego ya go tlhaeletsana le bone le go tlhotlhelediwa ke bone e tle ka bokukuntshwane ya kukunela mo maikutlong a batho, re ka re, ka seherwana.

E rile a akgela mo tiragalong e e sa tlwaelegang eno, Jack Catran, moitseanape mo madirelong a tsa lefaufau, o ne a kwala mo makasineng wa Newsweek mo setlhogong se se reng “E.A. = Enough Already”: “Bakwadi le badiri ba dibaesekopo ba na le tshwanelo ya go hopholetsa mo kgannyeng epe fela ya boitseanape, mme a re e bitseng seo e leng sone: phoraetso ya boitseanape, eseng boitseanape. Mme a re bitseng maikaelelo a bone seo a leng sone: papadi le dithekiso, eseng thuto.” Eleruri, kgakololo ya Bibela ya go farologanya magareng ga mabaka le seo se “bidiwañ kicō, me e se eōna” ke tsela ya botlhale.—1 Timotheo 6:20.

Baefangele ba Gompieno

Ngogola ka Morule National Conference of Catholic Bishops (NCCB) e ne ya dumalana go fedisa thulaganyo ya yone ya dingwaga tse tlhano le komiti ya go rotloetsa tiro ya boefangele. “Go anamisa ‘mafoko a a molemo’ ga e sa tlhole e le kgang ya pele pele mo setšhabeng mo phuthegong ya ba-bishopo,” go bolela jalo National Catholic Reporter. “E ne ya kaiwa e se ya sepe ebile e na le go diragala ka kotsi fela.”

Mme ke ka ntlha yang fa NCCB e tlogetse boiteko jwa yone jwa boefangele? “Nako ga e ise e fitlhe ya gore bontsi jwa Makatoliki ba amogele gore ba bileditswe go dira boefangele jaaka karolo ya tlholego ya tumelo ya bone,” go bolela jalo Reporter, e oketsa ka gore “go ne go sena temogo e kgolo ya gore boefangele e ne e le tiro e nngwe ya konokono eo sengwe le sengwe seo kereke e se dirang e ne e tshwanetse go tsena sentle mo teng.”

Abo seno e le phapaano e kgolo ya moya o o gotetseng wa boefangele jwa Bakeresete ba lekgolo la ntlha la dingwaga! Le eleng baganetsi ba ne ba tlhotlhelediwa go ka re: “Bōnañ, lo tladitse Yerusalema ka thutō ea lona.” (Ditihō 5:28) Go na le gore ba go tlogelele “go diragala ka kotsi fela,” moaposetoloi Paulo o ne a bolela ka gore: “Gonne kgorobelelo e mo godimo ga me: gonne go ka bo go latlhega nna fa ke sa rere efangele e.”—1 Bakorintha 9:16, Catholic Douay Version.

Gompieno, karabelong ya mafoko a ga Jesu mo go Mathaio 24:14 le Mt 28:19, 20, Basupi ba ga Jehofa eleruri ba dirile thero ya mafoko a a molemo a Bogosi jwa Modimo “tiro e nngwe ya konokono” mo botshelong jwa bone. Phuthego ya bone ke ya boefangele jwa lefatshe ka bophara.