Leina la Modimo mo “Testamenteng e Ntšha”

DITHANOLO ka bontsi tsa “Testamente e Ntšha” ga di dirise leina lepe le le tlhomologileng la Modimo Mothatayotlhe. Ke ka ntlha yang? A ke ka go bo ka tolamo ba latetse mokwalo wa Segerika? Mo mabakeng a mantsi eo ga se yone kamego ya bone e kgolo, ka go bo ba sa dirise leina la Jehofa mo “Testamenteng e Kgologolo” le gone. Lefa go le jalo mo Sehebereng sa tlholego, mo godimo ga go nna le mafoko Morena le Modimo, leina la tlhamalalo la Modimo le bonala ka makgetlo a ka nna 7 000.

Baranodi ba bangwe ba ile ba lemoga gore, lefa go le jalo, leina la bomodimo le teng mo “Testamenteng e Ntšha,” ntle le lebaka la gore e tshotse ditsopolo tse di tlhamaletseng go tswa mo Dikwalong tsa Sehebera koo leina leo le dirisiwang teng. Ka jalo go a kgatlhisa gore, mo puong ya Sejeremane, bobotlana go na le dithanolo di le tlhano tsa “Testamente e Ntšha” tse di nang le leina la bomodimo.

E nngwe ya tseno, thanolo ka Dominikus von Brentano ka 1796, e e dirisang leina la bomodimo gabedi mo mokwalong wa yone o mogolo, go nnile ga lebisiwa go yone mo dinakong tse di fetileng mo dibukeng tsa Watch Tower. Dithanolo tse dingwe tse pedi gape di dirisa leina leo mo go Mareko 12:29—thanolo e nngwe ka Stolz, e e gatisitsweng kwa Zurich, Switzerland, ka 1781, mme e nngwe, thanolo ka Professor Dr. Johann Babor, e e gatisitsweng kwa Vienna, kwa Austria, ka 1805. Go na gape le mo go tweng ke Bonner Bible, e e ranotsweng ke Profesor D. P. Dausch mme ya gatisiwa kwa Bonn, kwa Jeremane, ka 1932, e e dirisang “Jahve” mo go Luke 20:37.

Thanolo e nngwe ya Jeremane e dirisa leina, Jehofa, gasome mo “Testamenteng e Ntšha.” Eno ke thanolo ya dibolumo tse pedi ya New Testament of the Holy Scriptures e e neng ya bonala kwa Munich, kwa Jeremane, ka 1789 le ka 1790. Lefa leina la moranodi wa yone le sa bontshiwa, buka ya Die Bibel in Deutschland (Bibela kwa Jeremane), mo tsebeng ya 281, e re: “Thanolo e ka [Sebastian] Mutschelle. O tsetswe ka January 18, 1749, kwa Allershausen bei Freising, o na tsena kereke ya Jesuit a sa ntse a le monana.”

Leina la bomodimo le bonala mo diphetolong tsa “Testamente e Ntšha,” eseng fela mo puong ya Sejeremane mme le mo dipuong tse dingwe tse di masome matlhano, go akaretsa le Sehebera.

[Lebokoso mo go tsebe 6]

Le go Ama ka Eng

‘Mme ke pharologano efe e e nnang gone a e kane re dirisa leina la Modimo kana nnyaa?’ motho o ka nna a botsa. Go na le pharologano e ntsi! Akanyetsa: Mo “Testamenteng e Ntšha” go bolelwa gore Modimo o tla “lekola Badichaba, gore o tlhaolèlè leina ya ōna batho mo go bōnè.” (Ditiho 15:14) Fa o sa itse ebile o sa dirise leina leo, a o ka akarediwa mo bathong bao Modimo o ba ikgethelang go nna ba gagwe? Ga re a tshwanela fela go itse leina la Modimo mme re le galaletse pele ga ba bangwe, fela jaaka go dirile Jesu Keresete fa a ne a le mo lefatsheng.—Mathaio 6:9; Yohane 17:6, 26.