November

Bagolwane ba etsa Jehofa ka go nna pelotlhomogi mo bathong ba ba tlositsweng mo phuthegong. Ka sekai, mo nakong e e fetileng Jehofa ga a a ka a letela Baiseraele gore ba ikwatlhaye pele a leka go ba thusa. Go na le moo, o ile a romela baporofeti ba gagwe kwa go bone le pele ga ba ikwatlhaya. Jehofa o ile a bolelela Hosea gore a itshwarele mosadi wa gagwe mme a ye go mo tsaya, tota le fa a ne a sa ntse a dira boleo jo bo masisi. (Hos. 3:1; Mal. 3:7) E re ka bagolwane ba etsa Jehofa, ba batla go thusa motho yo o dirileng boleo jo bo masisi gore a ikwatlhaye le gore a boele mo phuthegong e bile ga ba leke go mo thatafaletsa dilo. Mo setshwantshong sa ga Jesu sa rre le morwawe, rre “o ne a . . . tabogela [morwawe], a mo tlamparela a bo a mo suna.” (Luke 15:20) Ela tlhoko gore rre yoo ga a a ka a letela morwawe gore a ikopele maitshwarelo. Go na le moo, o ile a mo tabogela ka gonne a mo rata. w24.08 28 ¶7-8

Mafoko a temana ya letsatsi ya gompieno a re bontsha gore Jehofa ga a re fitlhele botlhale jwa gagwe, go na le moo o re naya jone. Gape ela tlhoko gore Jakobe o ne a re fa Jehofa a re naya botlhale, o dira jalo ‘a sa re kgobe’ kgotsa ‘a sa re tshwaye phoso.’ Ga a dire gore re ikutlwe molato fa re mo kopa gore a re thuse. Tota e bile, o batla gore re dire jalo. (Diane 2:1-6) Mme go tweng ka rona? A re ka kgona go etsa Jehofa ka go abela ba bangwe botlhale jo re nang le jone? (Pes. 32:8) Batlhanka ba ga Jehofa ba na le ditshono tse dintsi tsa go abela ba bangwe dilo tse ba di ithutileng. Ka sekai, re ka katisa baboledi ba basha mo bodireding. Bagolwane ba ka thusa batlhanka ba bodiredi kgotsa bakaulengwe ba ba sa tswang go kolobediwa gore ba ka dira dikabelo tsa bone jang mo phuthegong. Bakaulengwe le bokgaitsadi ba ba nang le bokgoni jwa go aga le go baakanya dikago, ba ka katisa ba bangwe gore ba kgone go thusa mo dikagong tse di dirisiwang mo kobamelong ya ga Jehofa. w24.09 28-29 ¶11-12

Bakaulengwe, gore lo tshwanelege go nna bagolwane, ga lo a tshwanela ‘go nna le se lo ka tshwaiwang phoso ka sone.’ Seno se raya gore bakaulengwe le bokgaitsadi ga ba a tshwanela go nna le lebaka la go lo latofatsa ka gore lo dira boitsholo jo bo sa siamang. (1 Tim. 3:2) Mo godimo ga moo, ‘lo tshwanetse go buiwa bontle ke batho ba ba kwa ntle.’ Ke boammaaruri gore batho ba ba sa direleng Jehofa ba ka nna ba lo tshwayatshwaya diphoso ka ntlha ya se lo se dumelang. Mme gone, ga ba a tshwanela go nna le lebaka la go lo latofatsa ka gore ga lo ikanyege kgotsa gore lo dira boitsholo jo bo sa siamang. (Dan. 6:4, 5) Ipotseng go re: “A bakaulengwe le bokgaitsadi le batho ba e seng Basupi ba nkitse ke le motho yo o siameng?” Fa lo “rata se se molemo” lo tla bona dinonofo tse dintle tse ba bangwe ba nang le tsone e bile lo tla ba akgola. Gape lo tla direla ba bangwe dilo tse di molemo tota le fa ba sa lo kopa. (Tito 1:8) Goreng bagolwane ba tlhoka go nna le nonofo eno? Ka gonne ba dirisa nako e ntsi ba tlhokomela bakaulengwe le bokgaitsadi le go dira dikabelo tsa bone. (1 Pet. 5:1-3) Le fa eno e le namane e tona ya tiro, ba itumelela go e dira.​—Dit. 20:35. w24.11 20-21 ¶3-5

Batlhanka ba bodiredi ba dira ditiro tsa botlhokwa thata mo diphuthegong. Moaposetoloi Paulo o ne a tsaya banna bano ba ba ikanyegang ba le botlhokwa. Ka sekai, fa a ne a kwalela Bakeresete ba kwa Filipi, o ne a dumedisa batlhanka ba bodiredi mmogo le bagolwane. (Bafil. 1:1) Bakaulengwe ba le bantsi ba basha le ba ba godileng, ba itumelela go thusa mo phuthegong e le batlhanka ba bodiredi. Ka sekai, mokaulengwe Devan o ne a tlhomiwa go nna motlhanka wa bodiredi a na le dingwaga di le 18. Mme mokaulengwe Luis o ne a nna motlhanka wa bodiredi a setse a fetile dingwaga di le 50. Mokaulengwe yono o ikutlwa jang ka go nna motlhanka wa bodiredi? A re: “Ke itumelela go thusa bakaulengwe le bokgaitsadi mo phuthegong. Ba dirile dilo tse dintsi go mpontsha gore ba a nthata, jaanong le nna ke kgona go ba bontsha gore ke a ba rata.” Fa e le gore o mokaulengwe yo o kolobeditsweng mme ga o ise o nne motlhanka wa bodiredi, a o ka ipeela mokgele wa gore o nne motlhanka wa bodiredi? w24.11 14 ¶1-3

Fa Kgosi Hesekia wa kwa Juda a ne a na le dingwaga di le 39, o ne a lwala fela thata. Jehofa o ne a laela moporofeti Isaia gore a ye go mmolelela gore o ne a se kitla a fola, go na le moo o ne a tla swa. (2 Dikg. 20:1) Hesekia o ne a felelwa ke tsholofelo. Dikgang tseo tse di ngomolang pelo di ne tsa dira gore a lele. Ka jalo, o ile a rapela Jehofa a mo kopa gore a mo thuse. Jehofa o ne a utlwa botlhoko thata fa a bona Hesekia a lela. O ne a mo raya a re: “Ke utlwile thapelo ya gago. Ke bone dikeledi tsa gago. Bona, ke a go fodisa.” O ne a laela moporofeti Isaia gore a mmolelele gore o tla oketsa botshelo jwa gagwe le gore o tla golola Jerusalema mo seatleng sa Baasiria. (2 Dikg. 20:4-6) Ke eng se o ka se dirang fa o lwala thata e bile seo se dira gore o felelwe ke tsholofelo? Rapela Jehofa, o a go utlwa le fa o bua le ene o lela. Baebele e re tlhomamisetsa gore “Rara yo o kutlwelobotlhoko le Modimo yo o re gomotsang ka ditsela tsotlhe,” o tla re gomotsa mo ditekong tsotlhe tse di re welang.​—2 Bakor. 1:3, 4. w24.12 24 ¶15-17

Re tlile go itumelela go amogela batho ba ba tla bong ba tsositswe. Gape leka go akanya gore go tla bo go itumedisa jang go ithuta ka Jehofa mo dilong tse dintsi tse a di bopileng. (Pes. 104:24; Isa. 11:9) Mo godimo ga moo, re tla itumelela go direla Jehofa re se na boleo e bile re sa tlhoke go mo kopa gore a re itshwarele maleo a rona. A o ka batla gore botshelo jono jo bo monate bo go tswe dinaleng fela ka gonne o batla gore o tshele botshelo jwa go ikgotsofatsa? (Baheb. 11:25) Nnyaa le e seng! Botshelo joo bo tla bo bo le botoka thata go feta jo re bo tshelang gone jaanong. Nna o gopotse gore go tshela kwa lefatsheng la Paradaise ga se go ijesa dijo tsa ditoro. Dilo tseno tsotlhe di tlile go direga ka gonne Jehofa o ntshitse Morwawe gore e nne thekololo. w25.01 29 ¶12

Buka ya Bahebera e bua ka batho ba le bantsi ba ba neng ba na le tumelo mo go Jehofa. Mongwe wa bone ke Moshe. (Baheb. 3:2-5; 11:23-25) Tumelo ya gagwe e ne e se ya lefela ka gonne Jehofa o ile a tlamela Baiseraele ka dijo le metsi, tota le fa ba ne ba le mo nageng e e sa tlhogeng sepe. (Ekes. 15:22-25; Pes. 78:23-25) Le fa gone Moshe a ne a na le tumelo e e nonofileng, mo e ka nnang ngwaga morago ga gore Jehofa a golole Baiseraele kwa Egepeto, o ne a belaela gore Jehofa o tla ba naya nama. O ne a sa akanye gore Jehofa o tla kgona go ba naya nama mo nageng e e kgakgabetseng. Jehofa o ne a mmotsa go re: “A seatla sa ga Jehofa se sekhutshwane thata?” (Dipa. 11:21-23) Tota re ka re fa Jehofa a ne a botsa Moshe potso eo o ne a re: “A o akanya gore nka se kgone go dira se ke neng ke re ke tla se dira?” w25.03 26 ¶1-2

A re tshwanetse go akanya gore sengwe le sengwe se se neng se direga mo motlheng wa ga Noa, se ne se bontsha se se tla diregang mo nakong e e tlang? Nnyaa. Goreng re rialo? Ka gonne Baebele ga e bue sepe ka kgang eo. Ke boammaaruri gore Jesu o ile a bapisa ‘motlha wa ga Noa’ le go nna gone ga gagwe. Le fa go ntse jalo, ga a a ka a re sengwe le sengwe se se neng se direga mo motlheng wa ga Noa, se ne se bontsha se se tla diregang mo nakong e e tlang. Gape ga a a ka a re fa Jehofa a ne a tswala kgoro ya araka, seo se ne se tshwantshetsa sengwe. (Math. 24:37-39) Noa o ile a dira eng fa Jehofa a sena go mmolelela gore o tlile go fedisa lefatshe? O ile a bontsha gore o na le tumelo ka go aga araka. (Baheb. 11:7; 1 Pet. 3:20) Ka tsela e e tshwanang, fa batho ba sena go utlwa dikgang tse di molemo tsa Bogosi Jwa Modimo, ba tshwanetse go bontsha gore ba na le tumelo ka go dirisa se ba se ithutang. (Dit. 3:17-20) Petere o ne a re Noa ke “moreri wa tshiamo.” Le rona gompieno re dira sotlhe se re ka se kgonang go rerela batho dikgang tse di molemo tsa Bogosi mo lefatsheng lotlhe. Mme gone, ga re ka ke ra kgona go rerela batho botlhe pele bokhutlo bo tla. w24.05 9-10 ¶3-5

Re tshwanetse go batla ditsela tse re ka bontshang ka tsone gore re tlotla ditsala tsa ga Jehofa. (Bar. 12:10) Re ka dira seo jang? Pesalema 15:4 e a re motho yo o mo tenteng ya ga Jehofa “o diragatsa se a se solofeditseng, tota le fa seo se dira gore dilo di se ka tsa mo tsamaela sentle.” Fa motho a sa dire se a se solofeditseng, seo se ka utlwisa batho ba bangwe botlhoko. (Math. 5:37) Ka sekai, Jehofa o lebeletse gore banna le basadi ba dire se ba se solofeditseng fa ba ne ba nyalana, gape o batla gore batsadi ba dire se ba se solofetsang bana ba bone. E re ka re rata Jehofa le batho ba bangwe, re tla leka ka natla go dira se re se solofeditseng. Gape re ka bontsha gore re tlotla ditsala tsa ga Jehofa ka go amogela baeng le go abela ba bangwe. (Bar. 12:13) Fa re fetsa nako le bakaulengwe le bokgaitsadi ka dinako tse dingwe, e seng kwa dipokanong le kwa bodireding fela, re tla atamalana le bone le Jehofa. Mo godimo ga moo, fa re amogela baeng re etsa Jehofa. w24.06 12 ¶15-16

Jehofa o senolela batho ba ba ikokobeditseng boammaaruri. (Math. 11:25) Re ile ra rutiwa boammaaruri ka gonne re le boikokobetso. (Dit. 8:30, 31) Le fa go ntse jalo, re tshwanetse go nna kelotlhoko gore re se ka ra ikgogomosa. Boikgogomoso bo ka dira gore re tseye gore se re se akanyang se botlhokwa go feta melaometheo e e mo Baebeleng le kaelo e phuthego ya ga Jehofa e re nayang yone. Gore re tswelele re le boikokobetso, re tshwanetse go nna re gopotse gore re bannye thata fa re bapisiwa le Jehofa. (Pes. 8:3, 4) Gape re tshwanetse go kopa Jehofa gore a re thuse gore re tswelele re le boikokobetso le gore re ikemisetse go dira se a batlang gore re se dire. Jehofa o tla re thusa gore re tseye kaelo e e tswang mo Lefokong la gagwe le e e tswang mo phuthegong ya gagwe e le botlhokwa thata go feta se re se akanyang. Fa o bala Baebele, batla dintlha tse di bontshang gore Jehofa o rata batho ba ba ikokobeditseng, mme o tlhoile ba ba ikgogomosang, ba ba itseelang kwa godimo le ba ba mabela. Gape fa o na le ditshiamelo dingwe, dira sotlhe se o ka se kgonang gore o tswelele o ikokobeditse. w24.07 10 ¶8-9

Fa e sa le go tloga ka 1919, Jesu o ntse a dirisa Bakeresete bangwe ba ba tloditsweng go rulaganya tiro ya go rera le go naya balatedi ba gagwe ditaelo tse di tswang mo Lefokong la Modimo ka nako e e tshwanetseng. (Luke 12:42) Ntle le pelaelo Jehofa o segofatsa tiro ya batlhanka bao ba gagwe. (Isa. 65:13, 14) Re ne re ka se kgone go dira tiro ya go rera e Jesu a re neileng yone fa e ne e sa rulaganngwa. (Math. 28:19, 20) Ka sekai, go ne go tla direga eng fa go ne go sa rulaganngwa gore re rera kae, mme mongwe le mongwe a rera kwa a batlang teng? Boammaaruri ke gore re ne re tla rera mo mafelong mangwe kgapetsakgapetsa, mme re sa rere gotlhelele mo go a mangwe. Tsela e phuthego ya ga Jehofa e rulagantsweng ka yone, e re tswela mosola ka ditsela di le dintsi. A go na le dingwe tse o akanyang ka tsone? Fa Jesu a ne a le mo lefatsheng, o ile a thusa barutwa ba gagwe gore ba dire dilo ka tsela e e rulaganeng, mme o sa ntse a dira jalo le gompieno. w24.04 8-9 ¶2-4

Kaine e ne e le morwa wa ntlha wa ga Adame le Efa. Le ene o ne a na le boleo fela jaaka batsadi ba gagwe. Mo godimo ga moo, Baebele e a re: “Dilo tse a neng a di dira di ne di le bosula.” (1 Joh. 3:12) Gongwe leo ke lone lebaka la go bo Jehofa a sa amogela setlhabelo sa gagwe. Baebele e a re Jehofa “ga a ka a amogela Kaine le setlhabelo sa gagwe.” Go na le gore Kaine a tlogele go dira dilo tse di bosula, o ile a “galefa fela thata, mme o ne a se ka a itumela.” Jehofa o ile a dira eng? O ile a bua le ene. (Gen. 4:3-7) Ela tlhoko gore Jehofa o ile a bua le ene a le bonolo e bile o ile a mmolelela gore o tla mo segofatsa fa a ka dira se se siameng. Gape Jehofa o ile a tlhagisa Kaine gore fa a ne a ka tswelela a galefile, o ne a tla feleletsa a dirile sengwe se se sa siamang. Ka maswabi, Kaine ga a a ka a reetsa Jehofa e bile ga a a ka a mo letla gore a mo thuse go ikwatlhaya. A seo se ile sa dira gore Jehofa a dire tshwetso ya gore ga a kitla a tlhola a thusa ope go ikwatlhaya? Nnyaa! w24.08 10 ¶8

Moshe o ile a gopotsa Baiseraele gore Jehofa o ne a tlile go ba direla dilo tse dintle mo nakong e e tlang. Jehofa o ne a ka dira gore ba tshele lobaka lo loleele kwa lefatsheng le a neng a ba solofeditse lone. Lefatshe leo le ne le le lentle e bile le na le dijo di le dintsi. Moshe o ile a ba raya a re lefatshe leo le na le “matlo a a tletseng dilo tse di molemo tsa mefuta yotlhe tse [ba] sa di berekelang, dikhuti tsa go bolokela metsi tse [ba] sa di epang le masimo a morara le ditlhare tsa motlhware tse [ba] sa di jalang.” (Dute. 6:10, 11) Gape Moshe o ile a tlhagisa Baiseraele gore ba tshwanetse go ikobela Jehofa gore ba tshele mo lefatsheng leo le lentle. O ile a rotloetsa Baiseraele gore ba ‘tlhophe botshelo’ ka go reetsa Jehofa le ka go mo “ngaparela.” (Dute. 30:20) Mme ga ba a ka ba dira jalo. Ka jalo fa nako e ntse e tsamaya, Jehofa o ile a letla Baasiria le Bababelona gore ba ba fenye le gore ba ba ise botshwarwa.​—2 Dikg. 17:6-8, 13, 14; 2 Ditir. 36:15-17, 20. w24.11 9 ¶5-6

Batho ba le bantsi ba ba tsenang dikereke ba re ba dumela mo go Jesu e bile ba re ke mmoloki wa bone. (Joh. 6:29) Mme gone, seo ga se sone fela se se tlhokegang. Bangwe ba batho ba kwa Galalea ba ba neng ba dumela mo go Jesu ba ile ba mo tlogela. Goreng ba ile ba dira jalo? Batho ba le bantsi ba Jesu a ileng a ba fepa, ba ne ba ikemiseditse go nna balatedi ba gagwe fa fela a ne a ka ba naya se ba neng ba se batla. Ba ne ba itumelela go bona Jesu a ba fodisa ka kgakgamatso, a ba naya dijo tsa mahala e bile a ba ruta dilo tse ba neng ba batla go di utlwa. Mme gone, Jesu o ile a ba bolelela gore go na le dilo tse dingwe tse ba tshwanetseng go di dira gore e nne balatedi ba gagwe. Fa a ne a tla mo lefatsheng, o ne a sa tlela go naya batho dilo tse ba neng ba di batla. Go na le moo, o ne a tletse go ba thusa gore e nne balatedi ba gagwe. Ba ne ba tshwanetse go “tla” kwa go ene, mo go rayang gore ba ne ba tshwanetse go mo reetsa le go ikobela sengwe le sengwe se a neng a se ba ruta.​—Joh. 5:40. w24.12 12 ¶12-13

Ke eng se se ka thusang monna gore a se ka a sotla mosadi wa gagwe kgotsa a mo tlontlolola? A ka leka ka natla go etsa Jesu. Tsela e a neng a tshwara barutwa ba gagwe ka yone e ne e bontsha gore banna ba tshwanetse go tshwara basadi ba bone jang. Ela tlhoko se banna ba ka ithutang sone mo tseleng e Jesu a neng a tshwara baaposetoloi ba gagwe ka yone le e a neng a bua le bone ka yone. Jesu o ne a dirisana le baaposetoloi ba gagwe sentle e bile o ne a ba tlotla. O ne a sa ba galefele e bile o ne a sa ba gatelele. O ne a sa dire gore ba mmoife kgotsa gore ba ikutlwe e se batho ba sepe. Go na le moo, o ne a ba direla dilo tse di molemo. (Joh. 13:12-17) O ile a raya barutwa ba gagwe a re: “Lo ithute mo go nna, ka gonne ke bonolo e bile ke boikokobetso, mme lo tla lapologelwa.” (Math. 11:28-30) Ela tlhoko gore Jesu o ne a le bonolo. Motho yo o bonolo ga a bokoa, go na le moo o boikgapo. Fa a utlwisiwa botlhoko o a ritibala e bile ga a tseege maikutlo. w25.01 10 ¶10-11

E re ka re tshela mo malatsing a bofelo, mathata a rona a tlile go nna a oketsega ka ntlha ya dipuso tse di nnang di fetoga, dintwa, masetlapelo a tlholego kgotsa malwetse a a nnang gone a leroborobo. Re ka latlhegelwa ke tiro le dilo tse re nang le tsone kgotsa re ka tshwanelwa ke go fuduga mo lefelong le re nnang mo go lone go bo go nna thata le go feta go bona dilo tse re di tlhokang. Ke eng se se ka re thusang go dira ditswetso tse di bontshang gore re tshepa Jehofa? Sengwe sa botlhokwa se o tshwanetseng go se dira ke go bolelela Jehofa se se go tshwenyang. Mo kope gore a go neye botlhale gore o dire ditshwetso tse di siameng le gore o nne o ritibetse gore o tlogele “go tlhobaela thata.” (Luke 12:29-31) Kopa Jehofa gore a go thuse go kgotsofalela dilo tse o nang le tsone. (1 Tim. 6:7, 8) Dirisa dikgatiso tsa rona go bona dikakantsho tse di ka go thusang fa o na le mathata a madi. Batho ba le bantsi ba re ba ile ba thusiwa ke dibidio le ditlhogo tse di mo jw.org tse di buang ka mathata a madi. w25.03 28-29 ¶10-11

Baditšhaba ba ba sa rupang ba ile ba letlelelwa gore ba nne karolo ya lelapa la ga Jehofa. Moaposetoloi Petere o ile a laelwa gore a rerele Korenelio. Korenelio o ne a le mo setlhopheng sa ntlha sa Baditšhaba ba ba ileng ba nna Bakeresete. E re ka Bajuda le Baditšhaba ba ne ba sa nosane metsi, Petere o ne a tlhoka go thusiwa pele a dira kabelo e a neng a e neilwe. Fa Petere a lemoga tsela e Jehofa a akanyang ka yone ka kgang eno, o ile a fetola tsela e a neng a akanya ka yone. Ka jalo, fa Korenelio a ne a mo kopa gore a mo etele, o ile a dira jalo a “sa belaele sepe.” (Dit. 10:28, 29) O ile a mo rerela mmogo le ba ntlo ya gagwe e bile ba ile ba kolobediwa. (Dit. 10:21-23, 34, 35, 44-48) Dingwaga moragonyana, Petere o ile a kgothaletsa Bakeresetemmogo le ene gore ba ‘nne le mogopolo o o tshwanang.’ (1 Pet. 3:8) Rona mmogo le bakaulengwe le bokgaitsadi re ka nna le mogopolo o o tshwanang fa re ithuta tsela e Jehofa a akanyang ka yone mo Lefokong la gagwe re bo re mo etsa. w25.03 9-10 ¶7-8

Tsela e batho ba akanyang ka yone e farologane thata le e Jehofa a akanyang ka yone. (Diane 17:15) Ka jalo, go botlhokwa thata gore re lemoge dikakanyo tse di sa siamang mme re se ka ra di amogela. Ga re a tshwanela go letla batho ba ba re ganetsang gore ba re kgobe marapo le go dira gore re tlogele go direla Jehofa. Moaposetoloi Paulo o ne a kgothaletsa Bahebera gore ba tswelele ba gola, le rona re tshwanetse go dira jalo. Seno se raya gore re tshwanetse go ithuta Baebele ka kelotlhoko gore re kgone go itse Jehofa botoka le tsela e a akanyang ka yone. Re tshwanetse go tswelela re dira jalo tota le fa re sena go kolobediwa. Rotlhe fela re tshwanetse go bala Lefoko la Modimo le go le ithuta, le fa re ka tswa re na le dingwaga di le dintsi re itse boammaaruri. (Pes. 1:2) Go ithuta Baebele ka metlha go tla re thusa gore re nne le tumelo e e nonofileng, Paulo o ile a bolelela Bakeresete ba Bahebera gore ba tshwanetse go nna le tumelo e e ntseng jalo.​—Baheb 11:1, 6. w24.09 10 ¶7-8

Fa re atamalane le Jehofa, go tla nna motlhofo gore re tswelele re ikanyega mo go ene. Seo ke se Josefa a ileng a se dira. O ile a gana go dira boitsholo jo bo sa siamang. O ne a itse gore Jehofa o bona sengwe le sengwe se a se dirang e bile o ne a sa batle go mo utlwisa botlhoko. (Gen. 39:9) Fa re batla go atamalana le Jehofa, re tshwanetse go ipha nako ya go mo rapela le go ithuta Lefoko la gagwe. Go dira jalo go tla dira gore botsala jwa rona bo nonofe. Fela jaaka Josefa, fa re atamalane le Jehofa, ga re kitla re batla go dira sepe se se ka mo utlwisang botlhoko. Fa re ka lebala gore Jehofa ke Modimo yo o tshelang, re ka feleletsa re katogetse kgakala le ene. Akanya ka se se ileng sa diragalela Baiseraele fa ba ne ba le kwa nageng. Ba ne ba itse gore Jehofa o gone, mme ba ile ba simolola go belaela gore a o tla ba naya dilo tse ba di tlhokang. (Ekes. 17:2, 7) Morago ga moo, ba ile ba tlhanogela Jehofa. Boammaaruri ke gore, ga go na ope wa rona yo o batlang go dira se ba se dirileng.​—Baheb. 3:12. w24.06 24 ¶14-15

Fa lefatshe leno le ntse le ya bokhutlong, re ka lebelela gore go nne le dilo di le dintsi tse di dirang gore re lele. Jehofa o a re bona fa re lela e bile seo se mo utlwisa botlhoko. O a re rata ka gonne re ikanyega mo go ene e bile o gopola dilo tsotlhe tse di dirang gore re lele. Ka jalo fa re na le mathata, re tshwanetse go bolelela Jehofa kafa re ikutlwang ka gone. A re direng sotlhe se re ka se kgonang gore re nne re atamalane le bakaulengwe le bokgaitsadi ka go ya dipokanong. Gape a re tsweleleng re bala Baebele gore Jehofa a re gomotse. Re ka tlhomamisega gore fa re tswelela re ikanyega, Jehofa o tla re segofatsa. O tla phimola dikeledi tsotlhe mo matlhong a rona fela jaaka a solofeditse. Dikeledi tseo di ka tswa di bakilwe ke go utlwisiwa botlhoko, go tsiediwa kgotsa go lwala. (Tshen. 21:4) Mo nakong e e tlang re tla bo re lela fela ka gonne re itumetse. w24.12 20 ¶3; 25 ¶19

Jehofa o re neile tshiamelo e e seng kana ka sepe ya go nna Basupi ba gagwe e bile o solofetsa gore o tla re thusa go nna pelokgale. (Isa. 43:10, 11) Go na le dilo di le nnê tse a re thusang ka tsone. Sa ntlha, Jesu o ne a re o tla nna le rona fa re rera dikgang tse di molemo. (Math. 28:18-20) Sa bobedi, Jehofa o dirisa baengele go re thusa. (Tshen. 14:6) Sa boraro, Jehofa o dirisa moya o o boitshepo go re thusa go gopola dilo tse re di ithutileng. (Joh. 14:25, 26) Sa bonê, Jehofa o re neile bakaulengwe le bokgaitsadi gore ba bereke le rona mo tshimong. Ka jalo, re ka kgona go atlega ka gonne Jehofa le bakaulengwe ba re ema nôkeng. Fa e le gore o kgobega marapo fa o sa fitlhele batho mo matlong fa o le mo tshimong, ipotse go re: ‘Batho ba tshimo ya rona ba kwa kae gone jaanong?’ (Dit. 16:13) ‘A ba kwa tirong kgotsa ba ile dishopong?’ Fa go le jalo, leka go dira bodiredi jwa phatlalatsa. w24.04 17 ¶10-11

Fa e le gore o nyetse e bile o batla go nna mogolwane, ba lelapa la gago ba tshwanetse go tlhomela ba bangwe sekao se se molemo. O tshwanetse go ‘okamela ba lelapa la gago sentle.’ Seno se raya gore o tshwanetse go ba tlhokomela le go dira ditshwetso tse di tla ba tswelang mosola. Gape o tshwanetse go tshwara kobamelo ya lelapa, go netefatsa gore ba nna gone kwa dipokanong ka metlha le go ba thusa gore ba nne gone kwa tshimong. Fa e le gore o na le bana ba dingwaga tse di ka fa tlase ga 18, ba tshwanetse go go ‘reetsa e bile ba itshware sentle.’ (1 Tim. 3:4) O tshwanetse go ba ruta le go ba katisa ka lorato. Ke boammaaruri gore o batla gore ba itumele, ba tshege le gore ba tshameke fela jaaka bana ba bangwe. Mme gone, o tshwanetse go ba ruta gore ba go ikobele, ba tlotle batho ba bangwe le gore ba itshware sentle. Gape o tshwanetse go dira sotlhe se o ka se kgonang go thusa bana ba gago gore ba atamalane le Jehofa, ba dirise melaometheo ya Baebele le gore ba ipeele mekgele ya go kolobediwa. w24.11 22 ¶10-11

Fa re dira mo go oketsegileng mo tshimong, re kgona go bona kafa Jehofa a re emang nôkeng ka gone, e bile re mo tshepa le go feta. (1 Bakor. 3:9) Gopola gore Jehofa ga a go bapise le batho ba bangwe. O a itse gore o a mo rata, ka jalo o itumela tota fa a bona o dira sotlhe se o ka se kgona go bontsha gore o lebogela mpho ya thekololo. (1 Sam. 16:7; Mar. 12:41-44) Thekololo e dirile gore Jehofa a re itshwarele maleo, re kgone go atamalana le ene le gore re nne le tsholofelo ya go tshelela ruri. Re tshwanetse go nna re bontsha gore re leboga Jehofa ka go bo a re rata e bile a re neile dilo tseno tsotlhe. (1 Joh. 4:19) Gape re tshwanetse go leboga go bo Jesu a ile a bontsha gore o a re rata ka go re swela. w25.01 31 ¶16-18

Akanya ka se Baebele e se buang ka mokwadi wa Pesalema 73. O ne a bona e kete batho ba ba sa direleng Jehofa ga ba lwale, ga ba na mathata e bile ba humile. (Pes. 73:3-5, 12) Seo se ne sa dira gore a akanye gore go direla Jehofa e ne e se tshwetso e e siameng. O ne a ‘tshwenyega letsatsi lotlhe.’ (Pes. 73:13, 14) Ke eng se se ileng sa dira gore a se ka a tlhola a ikutlwa jalo? Mopesalema o ne a ya kwa lefelong le le boitshepo la ga Jehofa. (Pes. 73:16-18) Fa a le koo, o ne a kgona go akanya sentle ka gonne a na le batlhanka ba bangwe ba ga Jehofa. O ne a lemoga gore le fa go lebega e kete batho ba ba sa direleng Jehofa ba tshela monate, tota ga ba na tsholofelo. Seo se ile sa mo thusa gore a se ka a tswelela a kgobegile marapo e bile o ne a tlhatswegile pelo gore o dirile tshwetso e e siameng ya go direla Jehofa. Ka jalo, o ne a ikemisetsa go tswelela a direla Jehofa.​—Pes. 73:23-28. w24.10 27 ¶11-12

Jehofa o re tlhophile gore re nne “basupi” ba gagwe. (Isa. 43:10-12) Mo dingwageng tse di fetileng, lekwalo le le tswang kwa Setlhopheng se se Laolang le ne la re: “Re na le tshiamelo e e seng kana ka sepe ya go bidiwa Basupi ba ga Jehofa.” Goreng re ka rialo? A re dire sekai. A re re mongwe o go latofatsa ka gore o dirile sengwe se se sa siamang. O ne o tla tlhopha mang gore a go buelele gore se o latofadiwang ka sone ke maaka le gore ga o ka ke wa dira selo seo se se sa siamang? Ga go pelaelo gore o ne o tla tlhopha motho yo o mo itseng e bile o mo tshepa. Gape motho yoo o tshwanetse go tshepiwa ke batho ba bangwe. Ka tsela e e tshwanang, Jehofa o re tlhophile gore re nne basupi ba gagwe ka gonne a re itse sentle e bile a re tshepa. O a itse gore re tla kgona go mmuelela gore ke ene fela Modimo wa boammaaruri. Re itumelela tshiamelo eno ya go nna Basupi ba ga Jehofa, e bile re dirisa tshono nngwe le nngwe e re nang le yone go bolelela batho ka leina la gagwe. Gape re ba tlhalosetsa gore dilo tsotlhe tse ba di boleletsweng ka ene ke maaka. Fa re dira jalo, re bontsha gore re tshelela leina le a re neileng lone.​—Bar. 10:13-15. w24.05 18 ¶13

Jesu o ne a itumelela go thusa batho ba bangwe. Nako nngwe fa a ne a thusa batho ka go ba ruta ka Modimo, gape o ne a ba thusa ka ditsela tse dingwe. O ne a dira gore go nne le dijo ka kgakgamatso, go tswa foo o ile a kopa barutwa ba gagwe gore ba ba abele dijo tseo. (Mar. 6:41) Fa a ne a dira jalo, o ne a ruta barutwa ba gagwe gore ba thuse batho ba bangwe ka dilo tse ba di tlhokang. Gape o ne a ba bontsha gore go dira ditiro tseo go botlhokwa thata. Baaposetoloi bao ba tshwanetse ba bo ba ne ba itumeletse go thusa Jesu go aba dijo go fitlha “batho botlhe ba ja ba bo ba kgora.” (Mar. 6:42) Seno ke sekai se le sengwe fela se se bontshang gore Jesu o ne a naya batho dilo tse ba di tlhokang, go na le go tlhoma mogopolo mo go se ene a neng a se tlhoka. O dirile jalo botshelo jwa gagwe jotlhe. (Math. 4:23) Jesu o ne a itumelela go ruta batho ba bangwe le go ba naya dilo tse ba neng ba di tlhoka. w24.11 16 ¶10-11

Fa maemo a nna maswe le go feta “mo malatsing a bofelo,” re tla nna le ditshono tse dintsi tsa go thusa bakaulengwe le bokgaitsadi ka se ba se tlhokang. Gape re ka ba kgothatsa le go ba bontsha gore re a ba rata. Re ka dira jalo ka go bua le bone sentle fa ba le kwa Holong ya Bogosi. Re batla go ba bontsha gore re a ba rata fa ba tla kwa dipokanong. Bagolwane ba thusa bakaulengwe le bokgaitsadi ka dinako tsa mathata. Fa go nna le masetlapelo a tlholego kgotsa maemo mangwe a tsa kalafi, bagolwane ba nna bonako go thusa bakaulengwe le bokgaitsadi. Gape ba ba kgothatsa ba dirisa Baebele. Bakaulengwe le bokgaitsadi ba tla ikutlwa ba phuthologile go kopa thuso mo mogolwaneng yo o bonolo, yo o ba reetsang e bile a leka go tlhaloganya tsela e ba ikutlwang ka yone. Dinonofo tseo di dira gore batho ba bangwe ba ikutlwe ba ratiwa. Ka jalo, go motlhofo gore ba dirise kgakololo epe fela e e tswang mo Baebeleng e mogolwane yoo a ka ba nayang yone.​—1 Bathes. 2:7, 8, 11. w24.06 29 ¶12-13

Ga re a tshwanela go akanya gore Jehofa ga a na maikutlo ka gonne e le Mothatayotlhe. Baebele e a re o bopile batho mo setshwanong sa gagwe ba na le maikutlo. Ka jalo, seo se raya gore le ene o na le maikutlo. Gape Baebele e a re o utlwa “botlhoko” e bile o a “hutsafala.” (Pes. 78:40, 41) Ga go pelaelo gore Jehofa o ne a utlwile botlhoko fa Morwawe a ne a bolawa setlhogo. Thekololo e re ruta gore Jehofa o re rata go feta ba masika kgotsa ditsala tsa rona. (Bar. 8:32, 38, 39) Ga go pelaelo gore Jehofa o re rata go feta kafa re ithatang ka gone. O batla gore o tshelele ruri e bile o batla go go itshwarela maleo go feta kafa wena o batlang ka gone. Se rona re tshwanetseng go se dira ke go mmontsha gore re lebogela mpho ya thekololo e a re neileng yone, go nna le tumelo mo go ene le go mo ikobela. Thekololo ke mpho ya botlhokwa thata e e re bontshang gore Jehofa o a re rata.​—Mor. 3:11. w25.01 22-23 ¶8-9

Rotlhe re a tle re dire ditshwetso re ikaegile ka se re se bonang, se re se utlwang le tsela e re ikutlwang ka yone. Mme gone, ka dinako dingwe re ka tsiediwa ke se re se bonang le se re se utlwang. Tota le fa seo se sa direge, fa e le gore re dira ditshwetso re ikaegile ka se re se bonang, se re se utlwang le tsela e re ikutlwang ka yone, re ka nna ra feleletsa re dira sengwe se Jehofa a sa se amogeleng. (Mor. 11:9; Math. 24:37-39) Mme fa re tsamaya ka tumelo, re tla dira ditshwetso tse ‘Morena a di amogelang.’ Fa re dirisa kgakololo e Jehofa a re nayang yone, re nna le kagiso e bile re a itumela. (Pes. 16:8, 9; Isa. 48:17, 18) Gape go tsamaya ka tumelo go tla dira gore re bone botshelo jo bo sa khutleng mo nakong e e tlang. (2 Bakor. 4:18) Re ka itse jang gore re tsamaya ka tumelo kgotsa ka se re se bonang? Re tshwanetse go ipotsa dipotso tseno: Ke ikaega ka eng fa ke dira ditshwetso? A ke ikaega fela ka dilo tse ke di bonang kgotsa ke letla Jehofa gore a nkaele? w25.03 20-21 ¶3-4

Mongwe le mongwe wa rona a ka thusa batho gore ba tle mo paradaiseng ya tshwantshetso. Re ka dira jalo ka go etsa Jehofa. Ga a pateletse batho gore ba tle mo phuthegong ya gagwe. Go na le moo, o ba ‘gogela’ kwa go ene. (Joh. 6:44; Jer. 31:3) Fa batho ba ba ratang Modimo ba ithuta gore Modimo o lorato le gore o na le botho jo bo ntseng jang, ba tlhotlheletsega go mo direla. Tsela e re itshwarang ka yone e ka thusa batho ba bangwe gore ba batle go direla Jehofa. Fa re rata bakaulengwe, re dirisana le bone ka bopelonomi, e bile re itshwara sentle, re ka thusa batho gore ba tle mo paradaiseng ya tshwantshetso. Re batla gore fa ba tla kwa dipokanong ba ikutlwe ka tsela e batho ba kwa Korintha wa bogologolo ba ka tswang ba ne ba ikutlwa ka yone. Ba ne ba re: “Ruri Modimo o mo gare ga lona.” (1 Bakor. 14:24, 25; Seka. 8:23) Ka jalo re tshwanetse go dirisa kgakololo e e mo temaneng ya letsatsi ya gompieno. w24.04 23-24 ¶16-17