THUTO 28

Lebogela se Jehofa le Jesu ba go Diretseng Sone

E e Gatisitsweng

O ikutlwa jang fa tsala ya gago e go naya mpho e ntle? Ga go pelaelo gore o itumelela mpho eo e bile o batla go bontsha tsala ya gago gore o a e lebogela. Jehofa le Jesu ba go neile mpho e e di gaisang tsotlhe. Mpho eo ke efe, mme re ka bontsha jang gore re a e lebogela?

1. Tsela nngwe e re ka bontshang gore re lebogela se Modimo le Keresete ba re diretseng sone ke efe?

Baebele e a re “mongwe le mongwe yo o dumelang mo go [Jesu]” a ka kgona go tshelela ruri. (Johane 3:16) Go dumela mo go Jesu go kaya eng? Ga go kaye fela go bua re re re dumela mo go ene. Re tshwanetse go bontsha tumelo eo ka ditshwetso tsa rona le ka ditiro tsa rona. (Jakobe 2:17) Fa re bontsha gore re na le tumelo ka se re se dirang le se re se buang, re tla nna ditsala tsa ga Jesu le Rraagwe e bong Jehofa.—Bala Johane 14:21.

2. Ke tiragalo efe e e kgethegileng e e ka re thusang go bontsha gore re lebogela se Jehofa le Jesu ba se dirileng?

Mo bosigong jwa pele ga Jesu a swa, o ne a bolelela balatedi ba gagwe tsela e nngwe e ba ka bontshang gore ba lebogela setlhabelo sa gagwe ka yone. O ne a ba kopa gore ba kopane mmogo kwa tiragalong nngwe e e kgethegileng, e Baebele e e bitsang “Dijo Tsa Morena Tsa Maitseboa.” Tiragalo eo gape e bidiwa Segopotso sa loso lwa ga Keresete. (1 Bakorintha 11:20) Jesu o ne a batla gore baaposetoloi ba gagwe, le Bakeresete botlhe ba boammaaruri ba ba neng ba tla nna teng morago ga bone, ba gopole gore o re swetse. Ka jalo, o ne a ba laela a re: “Nnang lo dire seno e le go nkgopola.” (Luke 22:19) Fa o nna gone kwa Segopotsong, o a bo o bontsha gore o lebogela lorato lo logolo lo Jehofa le Jesu ba re ratang ka lone.

ITHUTE MO GO OKETSEGILENG

Ithute ditsela tse dingwe tse o ka bontshang ka tsone gore o lebogela lorato lo Jehofa le Jesu ba re bontshitseng lone. Ithute gore ke eng fa Segopotso sa loso lwa ga Keresete se le botlhokwa thata.

3. Re ka dira eng go bontsha gore re a leboga?

Akanya o le mo metsing o thuma o le gaufi le go nwela, mongwe a bo a tla go go thusa. A o ka lebala se motho yoo a go diretseng sone, kgotsa a o tla batla ditsela tsa go mmontsha gore o a mo leboga?

Jehofa o bolokile botshelo jwa rona. Bala 1 Johane 4:8-10, lo bo lo tlotla ka dipotso tseno:

Ke eng fa setlhabelo sa ga Jesu e le mpho e e kgethegileng?
O ikutlwa jang ka se Jehofa le Jesu ba go diretseng sone?

O ka bontsha jang gore o lebogela se ba go diretseng sone? Bala 2 Bakorintha 5:15 le 1 Johane 4:11; 5:3. Fa lo sena go bala temana nngwe le nngwe, tlotlang ka potso eno:

Go ya ka temana eno, ke eng se re ka se dirang go bontsha gore re a leboga?

4. Etsa Jesu

Tsela e nngwe e re ka bontshang gore re a leboga, ke ka go etsa Jesu. Bala 1 Petere 2:21, lo bo lo tlotla ka potso eno:

O ka latela sekao sa ga Jesu gaufiufi ka ditsela dife?

Jesu o bala Lefoko la Modimo mo momenong. — Jesu o ne a rata Lefoko la Modimo, a rera dikgang tse di molemo e bile a thusa ba bangwe

Jesu o bua le mosadi wa Mosamarea kwa sedibeng. — Jesu o ne a rata Lefoko la Modimo, a rera dikgang tse di molemo e bile a thusa ba bangwe

5. Nna gone kwa Segopotsong sa loso lwa ga Keresete

Fa o batla go bona gore go ne ga direga eng kwa tiragalong ya ntlha ya Dijo Tsa Morena Tsa Maitseboa, bala Luke 22:14, 19, 20. Go tswa foo, lo bo lo tlotla ka dipotso tseno:

Go ne ga direga eng kwa Dijong Tsa Morena Tsa Maitseboa?
Senkgwe le beine di tshwantshetsa eng?—Bona temana 19 le 20.

Jesu o ne a batla gore barutwa ba gagwe ba gopole loso lwa gagwe gangwe fela mo ngwageng, ka letlha le a suleng ka lone. Ka jalo, Basupi ba ga Jehofa ba kopana mmogo ngwaga le ngwaga gore ba gopole loso lwa ga Keresete ka tsela e a e laetseng. Fa o batla go ithuta ka tiragalo eno ya botlhokwa, tshameka BIDIO eno. Go tswa foo, lo bo lo tlotla ka potso e e latelang.

BIDIO: Gopola Loso Lwa ga Jesu (1:41)

Se se diregang mo dibiong ya ‘Gopola Loso Lwa ga Jesu.’ Basupi ba ga Jehofa ba kopane mmogo gore ba gopole loso lwa ga Jesu.

Go diragala eng kwa Segopotsong?

Sejana se se nang le senkgwe se se se nang sebediso le galase e e nang le beine.

Senkgwe le beine di tshwantshetsa sengwe. Senkgwe se tshwantshetsa mmele wa ga Jesu o o itekanetseng, o a ileng a o ntsha setlhabelo. Beine e tshwantshetsa madi a gagwe

Go fetisiwa beine kwa Dijong Tsa Morena Tsa Maitseboa.

BATHO BANGWE BA RE: “Gore o bolokwe, o tlhoka fela go dumela mo go Jesu.”

O ka dirisa jang Johane 3:16 le Jakobe 2:17 go mmontsha gore go tlhokega se se fetang seo?

O ITHUTILE ENG?

Re bontsha gore re lebogela se Jesu a re diretseng sone ka go dumela mo go ene le ka go nna gone kwa Segopotsong sa loso lwa gagwe.

Poeletso

Go dumela mo go Jesu go kaya eng?
O ka bontsha jang gore o lebogela se Jehofa le Jesu ba go diretseng sone?
Goreng go le botlhokwa thata gore o nne gone kwa Segopotsong sa loso lwa ga Keresete?

Ke feditse thuto eno ka letlha le:

Leka go Dira Seno

Nna gone kwa Segopotsong sa loso lwa ga Keresete se se latelang. Botsa motho yo o go rutang Baebele gore Segopotso se se latelang se tla nna leng, o bo o kwala letlha leo gore o se ka wa le lebala.

Gape o ka dira seno:

Se sengwe gape se o ka se dirang

DINTLHA TSE DINGWE

Loso lwa ga Keresete lo re tlhotlheletsa go dira eng?

O ne A Dirisa Mmele wa Gagwe go Tlotla Jehofa (9:28)

Ithute mo go oketsegileng ka tumelo, le gore re ka bontsha jang gore re na le yone.

“Bontsha Gore o Dumela Ditsholofetso Tsa ga Jehofa” (Tora ya Tebelo, October 2016)

Bala pego e e reng, “Ke Ikutlwa ke le Phepa, Ke na Le Botshelo e Bile ke sa Tlhaele Sepe,” mme o utlwe gore botshelo jwa mosadi mongwe bo ile jwa tokafala jang fa a sena go ithuta ka setlhabelo sa ga Keresete.

“Baebele e Fetola Matshelo a Batho” (Tora ya Tebelo, August 1, 2011)

Bona lebaka la go bo go ja batho ba le mmalwa fela kwa Segopotsong.

“Goreng Basupi ba ga Jehofa ba Tshwara Selalelo ka Tsela e e Farologaneng le ya Madumedi a Mangwe?” (Setlhogo se se mo website)