THUTO 13
Dikereke Tse di sa Ruteng Boammaaruri ga di Tlotle Modimo
Fa e le gore Modimo ke lorato, goreng dikereke tse di reng di a mo emela di dira ditiro tse di bosula? Dikereke tseno di ruta batho maaka. Se di se buang le se di se dirang se dira gore batho ba dumele maaka a a buiwang ka Modimo. Di buile maaka jang ka Modimo? Modimo o ikutlwa jang ka seo e bile o tla dira eng?
1. Dikereke di ruta dithuto dife tsa maaka ka Modimo?
Dikereke di ne tsa ‘fetola boammaaruri jwa Modimo mme tsa bo dira maaka.’ (Baroma 1:25) Ka sekai, dikereke di le dintsi ga di rute maloko a tsone leina la Modimo. Le fa go ntse jalo, Baebele e a re leina la Modimo le tshwanetse go dirisiwa. (Baroma 10:13, 14) Baruti ba re fa sengwe se se bosula se direga ke thato ya Modimo. Mme seo ke maaka a matala. Modimo ga se ene a dirang gore dilo tse di bosula di direge. (Bala Jakobe 1:13.) Ka maswabi, maaka ano a ile a dira gore batho ba se ka ba tlhola ba rata Modimo.
2. Dikereke di dira eng go bontsha gore ga di tlotle Modimo?
Dikereke ga di tshware batho jaaka Jehofa a ba tshwara. Baebele ya re “maleo a [dikereke] a mantsintsi mo e bileng a fitlha kwa legodimong.” (Tshenolo 18:5) Dikereke ga di bolo go leka go tlhotlheletsa dipuso, di tshegetsa dintwa e bile di letlelela gore batho ba le bantsi ba bolawe. Baeteledipele bangwe ba dikereke ba batla go huma, ka jalo ba kopa balatedi ba bone gore ba ba neye madi. Dilo tseno di bontsha gore ga ba itse Modimo e bile ga ba tshwanelege go nna baemedi ba gagwe.—Bala 1 Johane 4:8.
3. Modimo o ikutlwa jang ka dikereke tse di sa ruteng boammaaruri?
Fa e le gore dilo tse di dirwang ke dikereke di a go galefisa, o akanya gore Jehofa ene o ikutlwa jang ka tsone? O rata batho, mme gone o galefisiwa ke baeteledipele ba dikereke tse di sa mmueng sentle e bile ba sa tshware balatedi ba bone sentle. O solofetsa gore dikereke tse di sa ruteng batho boammaaruri di tlile go fedisiwa e bile ‘ga di kitla di tlhola di bonwa gape.’ (Tshenolo 18:21) Mo bogautshwaneng, Modimo o tla fedisa dikereke tseno.—Tshenolo 18:8.
ITHUTE MO GO OKETSEGILENG
Ithute gore Modimo o ikutlwa jang ka dikereke tse di sa ruteng batho boammaaruri. Ithute gore di dirile eng, mme o bone lebaka la go bo seo se sa tshwanela go go thibela go ithuta ka Jehofa.
4. Modimo ga a amogele dikereke tsotlhe
Batho ba le bantsi ba dumela gore dikereke di tshwana le ditsela tse di farologaneng tse di go isang kwa Modimong. A mme seo ke boammaaruri? Bala Mathaio 7:13, 14, lo bo lo tlotla ka potso eno:
Baebele e a re eng ka tsela e e isang botshelong?
Tshameka BIDIO eno, lo bo lo tlotla ka potso e e latelang.
A Baebele e a re go na le dikereke di le dintsi tse di itumedisang Modimo?
5. Dikereke tse di sa ruteng batho boammaaruri ga di bontshe gore Modimo o lorato
Dikereke ga di bue Modimo sentle ka ditsela di le dintsi. Tsela e nngwe ke seabe se di nang le sone mo ntweng. Go bona sekai sa seno, Tshameka BIDIO eno, lo bo lo tlotla ka dipotso tse di latelang.
Dikereke di le dintsi di nnile le seabe sefe ka Ntwa ya Bobedi ya Lefatshe?
O ikutlwa jang ka seabe sa tsone?
Bala Johane 13:34, 35 le 17:16. Go tswa foo, lo bo lo tlotla ka dipotso tseno:
O akanya gore Jehofa o ikutlwa jang fa dikereke di nna le seabe mo ntweng?
Dikereke tse di sa ruteng boammaaruri di dirile dilo di le dintsi tse di bosula. O bone di sa bontshe lorato lwa Modimo ka ditsela dife?
Dikereke tse di sa ruteng boammaaruri ga di bontshe gore Modimo o lorato
6. Modimo o batla go thusa batho gore ba tswe mo dikerekeng tse di sa ruteng boammaaruri
Bala Tshenolo 18:4,a lo bo lo tlotla ka potso eno:
Go itse gore Modimo o batla go thusa batho ba ba tsieditsweng ke dikereke go dira gore o ikutlwe jang?
7. Tswelela o ithuta ka Modimo wa boammaaruri
A dilo tse dikereke tse di sa ruteng boammaaruri di di dirang, di tshwanetse go fetola tsela e o ikutlwang ka yone ka Modimo? Akanya ka morwa yo o ganang kaelo ya ga rraagwe. Ngwana yoo o tswa mo gae a bo a simolola go itaola. Rraagwe ga a amogele tsela e a tshelang ka yone. A go tla bo go siame go tshwaya rraagwe phoso ka ntlha ya tsela e e sa siamang e ngwana yono a tshelang ka yone?
A go tla bo go siame go tshwaya Jehofa phoso, o bo o tlogela go ithuta ka ene ka ntlha ya dilo tse di bosula tse dikereke di di dirang?
BATHO BANGWE BA RE: “Ga ke batle go itse ka Modimo ka gonne dikereke ke tsone di dirang gore go nne le mathata a mantsi.”
A le wena o ikutlwa jalo?
Goreng dilo tse dikereke di di dirang di sa tshwanela go fetola tsela e re ikutlwang ka yone ka Jehofa?
O ITHUTILE ENG?
Dikereke tse di sa ruteng boammaaruri ga di tlotle Modimo ka dilo tse di di rutang le ka dilo tse di bosula tse di di dirang. Modimo o tlile go di fedisa.
Poeletso
O ikutlwa jang ka dilo tse dikereke tse di sa ruteng boammaaruri di di rutang le ka dilo tse di di dirang?
Jehofa o ikutlwa jang ka dikereke tse di sa ruteng boammaaruri?
Modimo o tla dira eng ka tsone?
DINTLHA TSE DINGWE
Bona ditsela tse pedi tse madumedi a maaka a sa itumediseng Modimo ka gone.
“A Modimo o Amogela Madumedi Otlhe?” (Setlhogo se se mo website)
Goreng Jehofa a batla gore re mo obamele re na le ba bangwe?
“A go a Tlhokega Gore o Nne Leloko la Kereke Nngwe?” (Setlhogo se se mo website)
Moruti o ne a tshwenngwa ke se se rutiwang kwa kerekeng ya gagwe. Mme seno ga se a ka sa mo thibela go ithuta boammaaruri ka Modimo.
“Goreng Moruti a Tlogetse Kereke?” (Tsogang!, February 2015)
Dikereke ga di bolo go bua maaka ka Modimo mme maaka ao a dira gore batho ba dumele gore Modimo ga a ba kgathalele le gore o setlhogo. Bona boammaaruri ka maaka ao.
“Maaka a a Dirang Gore Modimo a Lebege a sa Ratege” (Tora ya Tebelo, November 1, 2013)
a Fa o batla go bona gore re itse jang gore mosadi yo o bidiwang Babelona yo Mogolo o emela dikereke tsotlhe tse di sa ruteng boammaaruri, bala Ntlha e e Kwa Bofelong ya 1.