Go Rera ka Bogosi—Go Anamisa Dikgang Tse di Molemo Lefatshe ka Bophara

KE MO mosong wa letsatsi le o sa yang tirong mme o ipaakanyetsa go ya bodireding. O okaoka go se kae ka gonne o ikutlwa o lapile. O utlwa e kete mo mosong oo o ka ikhutsa! Mme gone, o rapela ka kgang eo o bo o swetsa ka gore o tsamaye. O bereka tshimo le kgaitsadi yo o godileng, o amiwa pelo ke boitshoko le bopelonomi jwa gagwe. Mme fa lo ntse lo rera molaetsa wa boammaaruri ka ntlo le ntlo, o gopola gore bakaulengwe le bokgaitsadi ba gago lefatshe ka bophara ba rera one molaetsa o o tshwanang, ba dirisa dikgatiso tse di tshwanang e bile botlhe ba solegelwa molemo ke thapiso e e tshwanang. Fa o fitlha kwa gae, o ikutlwa o le mafolofolo. O itumetse fela thata ka gonne ga o a ka wa tlhola fela mo gae!

Gone jaanong, bodiredi jwa Bokeresete ke tiro ya konokono ya Bogosi jwa Modimo. Jesu o ne a bolelela pele gore mo metlheng ya bofelo, tiro ya go rera e ne e tla dirwa ka selekanyo se segolo. (Math. 24:14) Boporofeti jono jwa gagwe bo ntse bo diragadiwa jang? Mo karolong eno, re tla bua ka batho, mekgwa le didirisiwa tse di ileng tsa nna botlhokwa mo bodireding jwa Bokeresete, tse di thusang dimilionemilione tsa batho lefatshe ka bophara go bona gore Bogosi jwa Modimo ke jwa mmatota.