Kgopolo E E mo Bibeleng

Go Itshwarela O bo O Lebala—Go ka Kgonega Jang?

“KE TLAA BA ITSHWARELA BOIKEPO JWA BONE, LE BOLEO JWA BONE GA NKETLA KE TLHOLA KE BO GAKOLOGELWA GOPE.”—JEREMIA 31:34.

MAFOKO ao a a neng a kwalwa ke moperofeti Jeremia a supa sengwe se se kgatlhang ka boutlwelobotlhoko jwa ga Jehofa: O itshwarela a bo a lebala. (Isaia 43:25) Gape Baebele e bolela jaana: “Fela jaaka [Jehofa] a lo itshwaretse, le lona lo dire fela jalo.” (Bakolosa 3:13) Ka jalo, jaaka Bakeresete re tshwanetse go etsa tsela e Jehofa a itshwarelang ka yone.

Lefa go ntse jalo, go tlhaga dipotso dingwe tse di botlhokwa. Fa Jehofa a itshwarela, a tota o lebala maleo a rona gotlhelele? E bile, a fa re itshwarela batho, re tshwanetse go a lebala ka tsela ya gore re se ka ra tlhola re a gakologelwa? A go ka twe fa re sa lebalele batho ka tsela eo tota re a bo re sa ba itshwarela?

Kafa Jehofa a Itshwarelang ka Teng

Go itshwarela go akaretsa go se tlhole o galefile. Fa Jehofa a re itshwarela, o dira jalo ka botlalo.a Mopesalema Dafite o ne a kwala jaana: “[Jehofa] ga a ketla a omana ka metlha yotlhe; le fa e le go nna ka bogale ka bosenabokhutlo. Jaaka botlhabatsatsi bo le kgakala le bophirimatsatsi; le ene o re tloseditse ditlolo tsa rona bokgakala jo bo kalo. Jaaka rrabana a tle a utlwele bana ba gagwe botlhoko; Jehofa le ene o tlhomogela ba ba mmoifang pelo jalo.”—Pesalema 103:9, 12, 13.

Gape go tlhalosiwa tsela e Modimo o itshwarelang ka botlalo ka yone mo go Ditiro 3:19: “Ke gone, ikwatlhayeng, lo sokologe, gore dibe tsa lona di phimolwe.” Polelo e e reng, “di phimolwe” e tswa mo lediring la Segerika (e·xa·leiʹpho) le le kayang “go tlosa sengwe ka go se sutlha.” (Bona Tshenolo 7:17; 21:4.) The New International Dictionary of New Testament Theology e tlhalosa jaana: “Go ka direga thata gore mogopolo o o tlhagisiwang ke lediri leno fano gongwe le mo dikarolong tse dingwe o kaya go rethefatsa lemati la go kwalela le le dirilweng ka bonota gore o le dirise gape ([bapisa le go] ‘phimola seleite’).” Fa re ikwatlhaya, Jehofa o phimola rekoto ya maleo a rona gotlhelele. A go kaya gore ga a tlhole a gakologelwa maleo a rona? Mma re sekaseke sekai sengwe se se kwadilweng mo Baebeleng.

Fa Kgosi Dafite a sena go dira boaka le Bathešeba a bo a leka go bipa seo ka go rulaganya gore monna wa gagwe a bolawe, Jehofa o ne a romela moperofeti wa gagwe Nathane go ya go kgalema Dafite. (2 Samuele 11:1-17; 12:1-12) Go ne ga felela jang? Dafite o ne a ikwatlhaya tota, mme Jehofa o ne a mo itshwarela. (2 Samuele 12:13; Pesalema 32:1-5) A Jehofa o ne a lebala maleo a ga Dafite? Legoka! Bakwadi ba Baebele e bong Gade le Nathane moragonyana ba ne ba kwala tiragalo eo yotlhe mo bukeng ya 2 Samuele (e e neng ya konelwa mo e ka nnang ka 1040 B.C.E.) pele fela ga loso lwa ga Dafite.

Ka jalo, pego ya maleo a ga Dafite—mmogo le pego ya boikwatlhao jwa gagwe le go itshwarelwa ke Jehofa—di santse di le teng gore di solegele babadi ba Baebele molemo go fitlha le gompieno. (Baroma 15:4; 1 Bakorinthe 10:11) E bile tota, e re ka “lefoko la ga Jehofa [le re le fitlhelang mo Baebeleng] le ntse ka bosakhutleng,” pego ya boleo jwa ga Dafite ga e kitla e bo e lebalwa!—1 Petere 1:25.

Mme he, go tewang fa go twe Jehofa o phimola seleite sa maleo a rona fa re a ikwatlhaela? Re tshwanetse go tlhaloganya jang mafoko ano a ga Jehofa: “Ke tlaa ba itshwarela boikepo jwa bone, le boleo jwa bone ga nketla ke tlhola ke bo gakologelwa gope”? (Mokwalo o o sekameng ke wa rona.)—Jeremia 31:34.

Mokgwa o Jehofa a Lebalang ka One

Lediri la Sehebera le le ranotsweng ka gore, ‘ke gakologelwa’ (sebopego sa za·kharʹ) ga le kaye fela go gakologelwa sengwe sa nako e e fetileng. Go ya ka Theological Wordbook of the Old Testament, go ka kaya “go umaka, go bolela, go boeletsa, go itsise, go kopa, go ikgopotsa, go latofatsa, o ipolela.” Theological Dictionary of the Old Testament e oketsa jaana: “Totatota, gantsi [za·kharʹ] e kaya tiro nngwe e e dirwang kana e tlhaga e kopantswe le lediri la tiro nngwe.” Ka gone, fa Jehofa a bua ka batho ba gagwe ba ba fapogileng a re, “o tlaa gakologelwa boikepo jwa bone,” o kaya gore o tla tsaya kgato kgatlhanong le bone ka go bo ba sa ikwatlhaye. (Jeremia 14:10) Go fapaana le seo, fa Jehofa a re, ‘ga a kitla a bo a tlhola a gakologelwa maleo a bone gape,’ o re tlhomamisetsa gore fa a re itshwarela maleo, ga a kitla a boa gape a re latofatsa ka one, a re atlhola kana go re a otlhaela.

Jehofa o ne a tlhalosa tsela e a itshwarelang a bo a lebala ka yone jaana ka moperofeti Esekiele: “Fa moikepi a sokologa mo maleong otlhe a gagwe a o a dirileng, mme a tshegetsa ditao tsa me, a dira sone se se laotsweng le se se siameng, ruri o tlaa tshela, ga a ketla a swa. Ga go ketla go gakologelwa dipe tsa ditlolo tsa gagwe tse o ntloletseng ka tsone; o tlaa tshedisediwa tshiamo e o e dirileng.” (Esekiele 18:21, 22, mokwalo o o sekameng ke wa rona; 33:14-16.) Ee, fa Jehofa a itshwarela moleofi yo o ikwatlhayang, o phimola seleite sa gagwe le go lebala ka tsela ya gore ga e kitla e re mo isagweng a bo a tsaya kgato nngwe kgatlhanong le motho yoo ka ntlha ya one.—Baroma 4:7, 8.

E re ka re sa itekanela, ga re kake ra kgona go itshwarela ba bangwe ka botlalo jaaka Jehofa a dira; megopolo ya gagwe le ditsela tsa gagwe di kwa godimo ga tsa rona fela thata. (Isaia 55:8, 9) Jalo he, go ka lebelelwa gore re tla itshwarela re bo re lebalela ba bangwe ka tsela e e utlwalang ka selekanyo se se kana kang?

Kafa re ka Itshwarelang Re bo Re Lebala ka Teng

“Lo itshwarelane [ka go se ipateletse, NW]” Baefeso 4:32 e kgothatsa jalo. Go ya ka W. E. Vine, mokwadi wa didikishenari, lefoko la Segerika le le ranotsweng ka gore, “lo itshwarelane ka go se ipateletse” (kha·riʹzo·mai) le kaya “go direla yo mongwe molemo o sa sadisa sepe.” Fa motho a re diretse phoso e e sa reng sepe, go ka nna ga nna motlhofo gore re mo itshwarele. Fa re gakologelwa gore le rona ga re a itekanela, go re thusa gore re itlhokomolose makoa a batho ba bangwe. (Bakolosa 3:13) Fa re itshwarela motho re lesa go tlhola re mo galefetse, kamano ya rona le motho yo o re kgopisitseng ga e ne e senyegela ruri. Fa nako e ntse e ya, re ka lebala gotlhelele gore motho yoo o kile a re direla phoso eo e e sa reng sepe.

Mme go tweng he fa batho ba bangwe ba re leofetse ka tsela e e masisi e e re utlwisang botlhoko thata? Go itshwarela motho mo dilong tse di masisi thata, tse di jaaka, go tlhakanela dikobo le wa losika, go betelelwa, maiteko a go re bolaya, go ka re tlhoka gore re akanyetse dintlha di le mmalwa tse di farologaneng. Go ka nna jalo thata fa e le gore motho yo o re leofetseng ga a ipone molato, a sa ikwatlhaye e bile a sa ikope maitshwarelo.b (Diane 28:13) Jehofa ka boene ga a itshwarele moleofi yo o sa ikwatlhayeng yo o tlhogoethata. (Bahebere 6:4-6; 10:26) Fa e le gore re ne re utlwisitswe botlhoko thata, go ka nna ga nna bokete gore re lebale se se re diragaletseng. Lefa go ntse jalo, re ka gomodiwa ke go itse gore mo lefatsheng le lesha le le tlang, “dilo tsa pele ga di ketla di gakologelwa, le fa e le go tla mo mogopolong.” (Isaia 65:17; Tshenolo 21:4) Dilo tse re tla di gakologelwang ka nako eo, di ka se re hutsafatse thata kana go re utlwisa botlhoko ka tsela e re ikutlwang ka yone gone jaanong.

Mo maemong mangwe go ka nna ga tlhokega gore e nne rona re tsayang kgato pele go itebaganya le yo o re leofetseng gongwe re buisana le ene pele ga re mo itshwarela. (Baefeso 4:26) Seno se ka re thusa go rarabolola kgotlhang, sa dira gore a ikope maitshwarelo mme re bo re mo itshwarela. Mme go tweng ka go lebala? Re ka nna ra se ka ra kgona go tlosa se a se re dirileng gotlhelele mo megopolong ya rona, mme gone, re ka se lebala ka tsela ya gore re se ka ra mo tshwara ka pelo, kana go mo latofatsa ka sone mo nakong e e tlang. Ga re kitla re seba ka sone, kana go tila go kopana le yo o re diretseng phoso. Lefa go ntse jalo, go ka nna ga tsaya nako gore re boele gape re tsalane le yo o re leofetseng e bile re ka nna ra se ka ra atamalana thata le ene jaaka pele.

Akanyetsa setshwantsho seno: A re re o ne o kile wa bolelela tsala ya gago e o e ikanyang thata sephiri sengwe sa gago, mme moragonyana go bo go utlwala gore o ile a se bolelela ba bangwe mo go neng ga go swabisa thata kana ga go utlwisa botlhoko. O ya kwa go ene o bo o fitlha o buisana le ene ka gone, mme o maswabi ka seo; o a ikwatlhaya a bo a kopa gore o mo itshwarele. Fa o sena go utlwa kafa a ikopelang maitshwarelo ka pelo yotlhe ka teng, o ikutlwa o batla go mo itshwarela. A go tla nna motlhofo gore o lebale se se diragetseng? Go lebega go ka se ka ga nna jalo; kwantle ga pelaelo o tla nna kelotlhoko gore o se ka wa mmolelela sephiri sepe mo nakong e e tlang. Lefa go ntse jalo, gone o a mo itshwarela; ga o nnele go mo gakolola kgang eo gangwe le gape. Ga o nne ka pelo e e lefuto, kana o nna o seba le batho ba bangwe ka gone. O ka nna wa bo o sa tlhole o na le kamano e e atamalaneng le ene jaaka pele, mme gone, o santse o mo rata jaaka mokaulengwe wa gago wa Mokeresete.—Bapisa Diane 20:19.

Mme go tweng fa motho yo o go leofetseng a sa ipone molato e bile a sa go kope maitshwarelo le mororo o ile wa dira maiteko a go rarabolola kgang le ene? A o ka mo itshwarela ka tsela ya gore o se ka wa tlhola o mo galefela? Go itshwarela batho ba bangwe ga go kaye gore re rotloetsa se ba se dirileng kana gore re a se nyenyefatsa. Go nna ka pelo e e lofuto e ka nna morwalo o o bokete mo go rona; go ka tshwenya mogopolo wa rona go dira gore re se ka ra nna le kagiso. Re tla tlalelwa le go feta ke go nna re letile motho yoo gore a tle go kopa maitshwarelo mme a sa tle. Totatota, re a bo re letla motho yo o re leofetseng gore a laole maikutlo a rona. Ka gone, re tshwanetse go itshwarela ba bangwe, kana go lesa go nna ka pelo e e lofuto, re sa direle bone molemo fela, mme gape le go solegelwa molemo ka borona gore re tswelele pele gape ka botshelo jwa rona.

Ga go motlhofo go itshwarela ba bangwe. Lefa go ntse jalo, fa motho a ikwatlhaya ka pelo yotlhe, re ka leka go etsa tsela e Jehofa a itshwarelang ka yone. Fa a itshwarela baleofi ba ba ikwatlhayang, o lesa go tlhola a le pelo e e lofuto—o phimola seleite a bo a lebala ka tsela ya gore ga a kitla a tlhola a ba latofatsa ka gone mo nakong e e tlang. Le rona re ka leka go itlwaetsa go lesa go nna ka pelo e e lofuto fa motho yo o re leofetseng a ikwatlhaya. Lefa go ntse jalo, go ka nna ga nna le maemo mangwe a re sa patelesegeng go itshwarela mongwe ka one. Ga go na motho ope yo o ileng a tshwarwa ka tsela e e sa siamang kana yo o ileng a direlwa bosetlhogo bongwe yo o tshwanetseng go patelediwa gore a itshwarele moleofi yo o sa ikwatlhayeng. (Bapisa Pesalema 139:21, 22.) Mme mo maemong a le mantsi re ka itshwarela batho ba ba re leofetseng ka tsela ya gore re se ka ra ba tshwara ka pelo, e bile re ka lebalela mokaulengwe wa rona ka tsela ya gore re se ka ra tlhola re mo latofatsa ka se a neng a se re dirile.

[Dintlha tse di kwa tlase]

[Setshwantsho mo go tsebe 9]

Josefa le bomorwarraagwe