ንመርኣዪ ዚኸውን ኣቀራርባታት

ኣብታ ወርሒ፡ ኣብ ቀዳመይቲ ቐዳም፡ መጽናዕቲ መጽሓፍ ቅዱስ ንኸተጀምር ከምዚ ዚስዕብ ክትብል ትኽእል ኢኻ፦

“ብዛዕባ ሓንቲ ባህ እትብል ሕቶ ኸነመያይጠካ ኢና መጺእና። [ነቲ ብዓል ቤት፡ ነታ ኣብ ዳሕረዋይ ገጽ ናይ 1 ሰነ ሕታም ግምቢ ዘብዐኛ ዘላ ቐዳመይቲ ሕቶ ኣርእዮ።] ንስኻኸ እንታይ ይመስለካ፧” መልሲ ተጸበ። ኣብ ትሕቲ እታ ናይ መጀመርታ ሕቶ ንዘሎ ሓሳባትን እንተ ወሓደ ንሓደ ኻብቲ ጥቕስታትን ተመያየጡሉ። ነተን መጽሔታት ኣበርክተሉ፣ ነቲ ቐጺሉ ዘሎ ሕቶ ተመሊስካ ንኽትመያየጠሉ ኸኣ መደብ ግበር።

ግምቢ ዘብዐኛ 1 ሰነ

“ምትካኽ ሽጋራ፡ ኣብ ሓደ ዓመት ዳርጋ 6,000,000 ዚዀኑ ሰባት ይቐትል። ነዚ ለብዒ እዚ ንምንካይ ገለ ነገር ኪግበር ዚከኣልዶ ይመስለካ፧ [መልሲ ተጸበ።] ሓያሎ ሰባት ነቲ ኣምላኽ ብዛዕባ እዚ ጕዳይ እዚ ዘለዎ ኣረኣእያ ምስ ሓሰቡሉ፡ ንምትካኽ ሽጋራ ኼቋርጽዎ ኽኢሎም እዮም። ንኣብነት፡ እዛ ጥቕሲ መጽሓፍ ቅዱስ እዚኣ ንገሊኦም ሰባት፡ ምትካኽ ሽጋራ ንኻልኦት ብኸመይ ኪጐድኦም ከም ዚኽእል ንኺሓስቡ ሓጊዛቶም እያ። [1 ቈረንቶስ 10:24 ኣንብብ።] እዛ መጽሔት እዚኣ፡ ሓደ ሰብ፡ ነቲ ኣምላኽ ብዛዕባ ምትካኽ ሽጋራ ዘለዎ ኣረኣእያ ምስ ዜስተንትነሉ፡ ንምትካኽ ሽጋራ ንኺሓድጎ ኺድረኽ ከም ዚኽእል ትገልጽ።”

ንቕሑ! ሰነ

“ማሕበራዊ መራኸቢ፡ ሰባት ካብ ቅድሚ ሕጂ ብዝያዳ ብዙሓት ከም ኣዕሩኽ ጌርካ ዚረኣዩ ሰባት ንኼጥርዩ ኣኽኢልዎም እዩ። ሓደ ናይ ሓቂ ዓርኪ ኺህልዎ ዚግባእ ኣዝዩ ኣገዳሲ ባህርይ እንታይ እዩ ምበልካ፧ [መልሲ ተጸበ።] ንዕርክነት ዚምልከት ኣብ መጽሓፍ ቅዱስ ዚርከብ ሓደ ግብራዊ ምኽሪ ኸርእየካ። [ያእቆብ 1:19 ኣንብብ።] እዛ መጽሔት እዚኣ፡ ካልኦት ሰባት ዓርኪ ኪዀኖም ዚደልይዎ ዓይነት ሰብ ክንከውን ዜኽእለና ኣርባዕተ ስርዓታት ትገልጽ።”