2023፦ ዓመት ጭንቀት—መጽሓፍ ቅዱስ እንታይ ይብል፧

ኣብ 2023 ኣብ ዓለም ዘጋጠመ ፍጻመታት፡ ኣብተን “ዳሕሮት መዓልትታት” ንነብር ከም ዘለና ዘይከሓድ መርትዖ ኣቕሪቡልና እዩ። (2 ጢሞቴዎስ 3:1) ኣብዚ ግዜና ዘሎ ዅነታት ከምቲ መጽሓፍ ቅዱስ ብዛዕባ እዚ ግዜና እተነበዮ ምዃኑ ርአ።

መጽሓፍ ቅዱስን ዓለምለኻዊ ፍጻመታትን

“ውግእን ወረ ውግእን።”—ማቴዎስ 24:6።

• “ግጭት ኣብ ሓያሎ ኽፍልታት ዓለም ይውስኽ ኣሎ።”a

“ኣብ በቦታኡ ምንቅጥቃጥ ምድሪ።”—ማርቆስ 13:8።

• “ካብ መጀመርታ 2023 ኣትሒዙ፡ ኣብ መላእ ዓለም ልዕሊ 7 ዝዓቐኑ 13 ምንቅጥቃጥ ምድሪ ኣጋጢሙ እዩ፣ እዚ ድማ ካብቲ ብዛዕባ እዚ ኺምዝገብ ዝጀመረሉ እዋን ኣትሒዙ ሓደ ኻብቲ ዝለዓለ መጠን እዩ።”b

“መፍርህታት።”—ሉቃስ 21:11።

• “ዓለም እትመቘሉ ዘመን ሓሊፍናስ፡ ዓለም እትጥጠቐሉ ዘላ ዘመን ኢና በጺሕና ዘለና።”—ኣንቶንዮ ጉተሬዝ፡ ዋና ጸሓፊ ውድብ ሕቡራት ሃገራት።c

“ጥሜት።”—ማቴዎስ 24:7።

• “2023፦ ነቶም ንስድራኦም ንምዕንጋል ዚቃለሱ ዘበሉ ኣዝያ ሓደገኛ ዝዀነት ካልእ ዓመት።”d

“ጽንኩር ግዜ።”—2 ጢሞቴዎስ 3:1።

• “ኣብ ዓለም፡ ሓደ ኻብ ሸሞንተ ሰባት፡ ጸገም ኣእምሮኣዊ ጥዕና ኣለዎም።”e

ኣብ 2024 እንታይ ክንጽበ ንኽእል፧

2024 እንታይ ሒዛ ኸም እትመጽእ፡ ኣፉ መሊኡ ኺዛረብ ዚኽእል የልቦን። ኵነታት ዓለም ከም ዚእምቶ ግና፡ ኣብ ቀረባ ግዜ እታ ኣብ ሰማይ ቈይማ ዘላ መንግስቲ ኣምላኽ ንመንግስትታት ሰባት ክትትክአን፡ ንዅሉ መከራን ጭንቀትን እውን ከም ዜብቅዕ ክትገብር እያ።—ዳንኤል 2:44፣ ራእይ 21:4።

ክሳዕ ሽዑ ግና፡ ጭንቀት ኪስምዓና ኸሎ፡ ሓገዝ ንምርካብ ናብ ኣምላኽ ክንጽጋዕ ንኽእል ኢና። ኣብዚ መዳይ እዚ፡ መጽሓፍ ቅዱስ ከምዚ ይብለና፦

“ምስ ዝፈርህ፡ ብኣኻ እእመን እየ።”—መዝሙር 56:3።

እሞ ደኣ ብኣምላኽ ከም እንእመን ብኸመይ ከነርኢ ንኽእል፧ ከምኡ ንምግባር፡ ብዛዕባ እቲ መጽሓፍ ቅዱስ ዘተስፈዎ ኻብ መከራ ናጻ እንዀነሉ እዋን ተምሃር። ካብቲ ኣብ መጽሓፍ ቅዱስ ዚርከብ ተስፋታት ንስኻን ስድራ ቤትካን ብኸመይ ከም እትጥቀሙ ንምፍላጥ ነዚ ናጻ ኣሳታፊ ትምህርቲ መጽሓፍ ቅዱስ ፈትኖ።