ኣብ ኣገልግሎት ክእለትካ ኣመሓይሽ—ንተምሃሮ መጽሓፍ ቅዱስካ ጽቡቕ ልማድ መጽናዕቲ ኼማዕብሉ ኣሰልጥኖም

ኣገዳሲ ዝዀነ ስለምንታይ እዩ፧ ተምሃሮ መጽሓፍ ቅዱስ ናብ መንፈሳዊ ብስለት ምእንቲ ኺበጽሑ፡ ንልቦምን ንኣእምሮኦም ብመሰረታዊ ትምህርትታት ቃል ኣምላኽ ጥራይ ዘይኰነስ፡ ካብኡ ንላዕሊ ብዝዀነ ነገራት ኪመልእዎ ይግብኦም። (እብ. 5:12–6:1) መጽናዕቲ ጻዕሪ ይሓትት እዩ። እዚ ድማ ንሓድሽ ሓበሬታ ምስቲ ድሮ ዝነበረካ ፍልጠት ምትሕሓዝን ነቲ ዘለዎ ግብራዊ ጥቕሚ ምስትውዓልን የጠቓልል። (ምሳ. 2:1-6) ተምሃሮ ናይ ብሕቲ ምርምር ብኸመይ ከም ዚግበር ምስ ዚምሃሩ፡ ንክርስትያናዊ ሕታማትና ተጠቒሞም ሕቶታት መጽሓፍ ቅዱስ ኪምልሱ ኪኽእሉ እዮም።። ንእተማህርዎ ነገራት ንምትግባር ልባዊ ጻዕሪ ምስ ዚገብሩ፡ ከም ክርስትያናት መጠን ንዜጋጥሞም ፈተናታት ንኺጻወርዎ ኼዕጥቖም እዩ።—ሉቃ. 6:47, 48።

እንታይ ክትገብር ኣሎካ፧

ቅድሚ ነፍሲ ወከፍ መጽናዕቲ፡ ብጸሎት ኣቢልካ ሓገዝ የሆዋ ምድላይ ንዘለዎ ኣገዳስነት ኣጕልሕ።—ዮሃ. 14:26፣ 1 ቈረ. 2:10።
ቅድሚ ዅሉ፡ ንተምሃራይካ ንመጽናዕቱ ኣቐዲሙ ኺዳሎ ኸም ዘለዎ ኣተባብዓዮ። ናትካ ጽሑፍ ኣርእዮ፡ ነቲ ቐንዲ ቓላት ወይ ሓረጋት ጥራይ ኬስምረሉ ኸም ዘለዎ ድማ ምሃሮ።
ንተምሃራይካ ነቲ ሕቶታት ብናቱ ቓላት ገይሩ ኸም ዚምልሶ ግበር። እቲ እዋን መጽናዕቲ፡ ድርቕ ዝበለን ነቲ ተመሃራይ ድማ ብቐጥታ ኻብቲ መጽሓፍ ጥራይ ከም ዚምልስ ዚገብሮን ኪኸውን የብሉን።
ንተምሃራይካ መዓልታዊ እተወሰነ ኽፋል ቃል ኣምላኽ ኬንብብ ኣተባብዓዮ። ነቲ ኣብ jw.org ዚርከብ መደብ ንባብ መጽሓፍ ቅዱስ ኣርእዮ፣ ካብኡ ድማ ኣብ ግብሪ ኼውዕሎ ዚኽእል ሓበሬታ ኺረክብ እዩ። መዓልታዊ መጽሓፍ ቅዱስ ናይ ምንባብ ልማድ ምምዕባል ቈራጽነት ዚሓትት እኳ እንተ ዀነ፡ ብዙሕ ረብሓ ኣለዎ።—መዝ. 1:2, 3።
ተምሃራይካ ዎች ታወር ላይብረሪ ወይ ቤተ መጻሕፍቲ ኢንተርነት ግምቢ ዘብዐኛ ተጠቒሙ ንሕቶታት መጽሓፍ ቅዱስ ብኸመይ መልሲ ኺረኽበሉ ኸም ዚኽእል ኣርእዮ። ነቲ ኣብ ኣኼባታት ጉባኤ እንጥቀመሉ ሕታማትና ንምሕባር እንታይ ምልክትታት ከም እንጥቀም ኣረድኣዮ። ንኣብነት፡ fg ንብሮሹር ብስራት ኣምላኽ ከም ዜመልክት ግለጸሉ።

ኣብዛ ወርሒ እዚኣ፡ ነዚ ፈትኖ፦

ኣብ መወዳእታ ንኡስ ኣርእስቲ ወይ ምዕራፍ፡ ንተምሃራይካ ነቲ እተማህሮ ብሒደት ምሉእ ሓሳባት ጸሚቝ ኬቕርቦ ሕተቶ። ተምሃራይ ዘይብልካ እንተ ደኣ ዀይኑ፡ እተወሰነ ጥቕስታት መጽሓፍ ቅዱስ ወይ ድማ ካብ ግምቢ ዘብዐኛ ሓንቲ ሕጡብ ጽሑፍ ብሒደት ምሉእ ሓሳባት ጽሙቝ ኣቢልካ ብምቕራብ፡ ናይ ርእስኻ ናይ ምንባብ ክእለት ኣመሓይሽ።