ሳጹን ሕቶ

◼ ቈልዑ ናብ መንፈሳዊ ብስለት ምእንቲ ኺበጽሑ፡ እንታይ ኪመሃሩ ኣለዎም፧

ክርስትያን ወለዲ፡ ንደቆም “ብተግሳጽን ብምዕዶን የሆዋ” ንኼዕብይዎም ይጽዕሩ እዮም። (ኤፌ. 6:4) ንኣብነት፡ ምስ ደቆም ኰይኖም ንግሆ ንግሆ ብዛዕባ ጥቕሲ ዕለት ምምይያጥ፡ ጠቓሚ ዀይኑ ረኺቦምዎ እዮም። ስድራ ቤታት ኣብ እዋን ኣምልኾ ስድራ ቤትን ኣብ ካልእ ኣጋጣሚታትን ብሓባር ቪድዮ ኺርእያን ኪመያየጣን፡ ብዛዕባ እተወሰነ ኽፋል እታ መንእሰያት ዚሓትዎ ዘርእስታ መጽሓፍ ኪዘራረባ፡ ንሓደ ጸብጻብ መጽሓፍ ቅዱስ ብተዋስኦ መልክዕ ኬቕርብኦ፡ ወይ ከኣ ወይ ልምምድ ኪገብራ ይኽእላ እየን። ይኹን እምበር፡ ቈልዑ ‘ናብ ብስለት ምእንቲ ኺግስግሱ፡’ ዓሚቝ ሓቅታት መጽሓፍ ቅዱስ እውን ኪመሃሩ ኣለዎም።—እብ. 6:1።

ነቶም ኣብ ክልና እንረኽቦም ሰባት እንታይ ከም እንምህሮም እስከ ንሕሰብ። ኣብ ናይ ፈለማ ምብጻሕ ወይ ድማ ኣብ ተኸታታሊ ምብጻሓት፡ ነታ መጽሓፍ ቅዱስ ብሓቂ እንታይ እዩ ዚምህር፧ ዘርእስታ መጽሓፍ ተጠቒምና መጽናዕቲ መጽሓፍ ቅዱስ ከነጀምሮም ኢና እንጽዕር። ነዛ ሕታም እዚኣ ምስ ወዳእናያ ድማ፡ ነታ “ንርእስኹም ብፍቕሪ ኣምላኽ ሓልውዋ” ዘርእስታ መጽሓፍ ኢና እንጥቀም። ስለምንታይ፧ እታ መጽሓፍ ቅዱስ ዚምህር እትብሃል መጽሓፍ፡ ንተመሃሮ መሰረታዊ ፍልጠት ቅዱሳት ጽሑፋት እያ እትህቦም። መጽሓፍ “ፍቕሪ ኣምላኽ” ድማ ንስርዓታት መጽሓፍ ቅዱስ ኣብ መዓልታዊ ህይወቶም ብኸመይ ኣብ ግብሪ ኸም ዜውዕልዎ ትምህሮም። ሓደስቲ ሰባት ነዘን ክልተ ሕታማት እዚአን ምጽንዖም፡ ኣብ ክርስቶስ ‘ሱር ንኺሰድዱን ብእምነት ንኺጸንዑን’ ይሕግዛኦም እየን። (ቈሎ. 2:6, 7) እዚ ጽሑፋት እዚ፡ ንደቅና እውን ዚጠቅም ደይኰነን፧ ንሳቶም እውን ብዛዕባ በጃን ብዛዕባ መንግስቲ ኣምላኽን ብዛዕባ ዅነታት ምዉታትን ኪመሃሩ የድልዮም እዩ። ኣምላኽ ስለምንታይ መከራ ኺህሉ ኸም ዝፈቐደን ዳሕሮት መዓልትታት እዚ ስርዓት ዓለም እዚ ብኸመይ ከም ዚልለን ኪፈልጡ ኣለዎም። ሓቂ ምስ ናይ የሆዋ መሰኻኽር ከም ዘላ ኺኣምኑ ድማ ይግብኦም። ቈልዑ፡ ስርዓታት መጽሓፍ ቅዱስን ን“ልቦናኦም” ብኸመይ ኬላምዱ ኸም ዘለዎምን ኪርድኡ እውን የድልዮም እዩ። (እብ. 5:14) ሓቂ እዩ፡ ወለዲ ንዕድመን ንደረጃ ምስትውዓልን ደቆም ኣብ ግምት ኬእትዉ ኣለዎም። ይኹን እምበር፡ ብዙሓት ቈልዑ፡ ብንኣሽቶኦም እውን ከይተረፈ፡ ዓሚቚ ሓቅታት መጽሓፍ ቅዱስ ኪመሃሩ ይኽእሉ እዮም።—ሉቃ. 2:42, 46, 47።