ኣብ ኣገልግሎት ክእለትካ ኣመሓይሽ—ንመገላግልትኻ ደግፎ

ኣገዳሲ ዝዀነ ስለምንታይ እዩ፦ የሱስ ምስ መገላግልቲ ዄንካ ዚግበር ስብከት ጠቓሚ ምዃኑ ይፈልጥ ነይሩ እዩ። ስለዚ፡ ነቶም 70 ደቀ መዛሙርቱ ቀቅድሚኡ ኸይዶም ንኺሰብኩ ኺልእኮም ከሎ፡ በብኽልተ ገይሩ እዩ ሰዲድዎም። (ሉቃ. 10:1) ሓደ መገላግልቲ፡ እቲ መገላግልቱ ዝዀነ ኣስፋሒ ኣጸጋሚ ዅነታት ወይ ንሓደ ብዓል ቤት ብኸመይ ከም ዚምልሰሉ ርግጸኛ ኣብ ዘይኰነሉ እዋን፡ ኣድላዪ ሓገዝ ኪገብረሉ ይኽእል እዩ። (መክ. 4:9, 10) ተመክሮኡን ሓድሓደ ግዜ ድማ ነቲ መገላግልቱ ውጽኢታ ወንጌላዊ ኪኸውን ዜኽእሎ ሓሳባትን ኬካፍሎ ይኽእል እዩ። (ምሳ. 27:17) ብዘይካዚ፡ ኣብ መንጎ ኣገልግሎቶም ሃናጺ ዝርርብ ብምግባር ኬተባብዖ ይኽእል እዩ።—ፊል. 4:8።

እንታይ ክትገብር ኣሎካ፧

መገላግልትኻ ኣብ ዚምስክረሉ እዋን ኣቕልብ። (ያእ. 1:19) ጥቕሲ ኺንበብ ከሎ፡ መጽሓፍ ቅዱስካ ገንጺልካ ተኸታተል። ከምዚ ምግባር፡ ኣብ ዜድልየሉ እዋን፡ ዚከኣለካ ሓገዝ ንኽትህቦ ኣጋጣሚ ኽትረክብ ኢኻ።
ኣብቲ ምይይጥ ክትሳተፍ ኣድላዪ እንተ ዀይኑን መዓስ ክትሳተፍ ከም ዘሎካን ኣመዛዚንካ ወስን። (ምሳ. 25:11) ሓደ ኣስፋሒ መጽናዕቲ መጽሓፍ ቅዱስ ኪመርሕ ከሎ ኽትሓብሮ እንተ ደኣ ሓቲቱካ፡ እቲ ሳሕቲ እትህቦ ሓሳባት ጠቓሚ እዩ። ይኹን እምበር፡ ኣብ በቤት ክትሰብኽ ከለኻ፡ መገላግልትኻ ተራኡ ምስ ምስ በጽሐ በይኑ ኪዛረብ ይመርጽ ይኸውን። ሓቂ እዩ፡ ሓድሽ ኣስፋሒ እንተ ዀይኑ ወይ ድማ ንዚቐርበሉ ሕቶ ወይ ተቓውሞ ብኸመይ ምላሽ ከም ዚህብ ርግጸኛ እንተ ዘይኰይኑ፡ ነቲ እትገብረሉ ሓገዝ ኬማስወሉ እዩ። እንተ ዀነ ግና፡ ኣብ በቤት፡ ተመላሊስካ ምብጻሕ ኣብ ምግባር፡ ወይ መጽናዕቲ መጽሓፍ ቅዱስ ኣብ ምምራሕ ምስ ሓደ ኣስፋሒ ዄንካ ኸተገልግል ከለኻ፡ ንመገላግልትኻ ኣይተቋርጾ፡ ኣብቲ ዝርርብ ኣይትዓብልል ወይ ድማ እተፈልየ ርእሰ ነገር ኣይተምጽእ።
ተመክሮኻ ንገሮ። ሓድሓደ ግዜ፡ ንመገላግልትኻ ኣብ ኣገልግልቱ ዝያዳ ውጽኢታዊ ንኪኸውን ዚሕግዞ ርእይቶ እንተ ደኣ ኣልዩካ፡ ካብ ምክፋል ዓዲ ኣይትውዓል። (ምሳ. 3:27) ኣድላዪ ኣብ ዚዀነሉ እዋን፡ ከምዚ ዚስዕብ ክትብል ትኽእል ኢኻ፦ “ኣገልግሎት ከመይ ረኺብካዮ፧” ወይ “ሓንቲ ርእይቶዶ ኽህበካ፧” ወይ “ኣነ ኸኣ ከምዚ ኽገብር ፈቲነ።” ገሊኦም ነቲ ሓድሓደ ግዜ ዚውሃቦም ሓሳብ ዜማስዉሉ እኳ እንተ ዀኑ፡ ንዅሉ ጌጋታቶም መአረምታ ዚውሃቦም እንተ ደኣ ዀይኑ፡ ተስፋ ኪቘርጹ ይኽእሉ እዮም።

ኣብዛ ወርሒ እዚኣ፡ ነዚ ፈትኖ፦

ምስ ሓደ ኣስፋሒ ኣብ ኣገልግሎት ድሕሪ ምክፋልካ፡ እቲ ኣስፋሒ ንእተዛረቦ ወይ ዝገበሮ ነገር ጠቒስካ ንፉዕ መገላግልቲ ኸም ዝዀነ ንገሮ።