‘ከመይ ገይሮም ክሰምዑ ኢዮም፧’
1 የሱስ “ቅድም ንዅሎም ኣህዛብ ወንጌል ኪስበኽ ከኣ ብግዲ እዩ” ብምባል ኣትሪሩ ተዛሪቡ ኢዩ። (ማር. 13:10) ብርቱዕ ጻዕሪ እኳ እንተ ገበርና: ገና ብኣማእታት ሚልዮናት ዝቝጸሩ ብብሕቲ ምስክርነት ዘይተዋህቦም ሰባት ኣለዉ። ገሊአን መንግስታት ንዕዮና ኣጊደንኦ ኣለዋ። ናይ ብዙሓት ሃገራት ብዝሒ ህዝቢ ቕልጡፍ ወሰኽ ይገብር ኣሎ። ስለዚ ‘ከመይ ገይሮም ክሰምዑ ኢዮም፧’—ሮሜ 10:14
2 ኣብ የሆዋ እምንቶ ይሃሉኻ:- የሆዋ ንኣልባብ ሰባት ከም ዝፈልጦ ኽንዝክር ኣሎና። ኵነታት ሓደ ውልቀ-ሰብ ብዘየገድስ: ብቕንዕና ብዛዕባ ኣምላኽ ሓቂ ምእንቲ ኽፈልጥ እንተድኣ ሃሰስ ኢሉ ክረኽቦ ኢዩ።—1 ዜና. 28:9
3 ኣብርሃም ኵነታት ተቐማጦ ሶዶምን ጎሞራን ኣተሓሳሲብዎ ነበረ። ኣምላኽ ግን ሶዶም ዓሰርተ ጻድቃን እኳ እንተ ተረኺቦማ ኸም ዘየጥፍኣ ኣረጋገጸሉ። (ዘፍ. 18:20, 23, 25, 32) የሆዋ ንጻድቕ ምስቲ ረሲእ ኣጥፊኡ ኣይፈልጥን ኢዩ፣ እዚ ድማ ንሎጥን ኣዋልዱን ከድሕኖም ከሎ ተራእዩ ኢዩ።—2 ጴጥ. 2:6-9
4 ሓደ ግዜ ኤልያስ ካብቶም ነቲ ናይ ሓቂ ኣምላኽ ዘገልግሉ ንሱ በይኑ ጥራይ ዝተረፈ መሲልዎ ነይሩ። የሆዋ ግን በይኑ ኸም ዘይተረፈን እቲ ንሱ ዝጀመሮ ዕዮ ድማ ኸም ዝፍጸምን ኣረጋገጸሉ። (1 ነገ. 19:14-18) ብዛዕባ እዚ ግዜናኸ እንታይ ኢዩ ዝበሃሎ፧
5 ኣብ ኣገልግሎት ኣምላኽ ትሑዝ ኩን:- እዚ ዕዮ ስብከት ብሕጂ ኽሳዕ ክንደይ ከም ዝሰፍሕ ኣይንፈልጥን ኢና። ናይዚ ዕዮ እዚ ሓላፊ የሆዋ ኢዩ: ንመላእኽቱ ድማ ክዕዘቡ መዝነት ሂብዎም ኣሎ። (ራእ. 14:6, 7) እቲ ምስክርነት ንዅሎም ኣህዛብ ክሳዕ ክንደይ ክወሃብ ከም ዘለዎ ዝውስን ንሱ ኢዩ። የሆዋ እንተ ደልዩ: ብዙሓት ተወሰኽቲ ሰባት “ቃል ወንጌል” ምእንቲ “ኪሰምዑን ኪአምኑን” ንሕና ብዘይሓሰብናዮ መገዲ መልእኽቲ መንግስቲ ኣምላኽ ከም ዝዝርጋሕ ክገብር ይኽእል ኢዩ። (ግብ. 15:7) የሆዋ ፈቃርን ጥበበኛን ፍትሓውን ኣምላኽ ብምዃኑ ዝገብሮ ተግባራት ምስ ባህርያቱ ምሉእ ብምሉእ ዝሰማማዕ ኢዩ።
6 ኵሉ ሰብ ነቲ ብስራት ክሰምዕ ዝከኣለና ዅሉ ብምግባር ምስ ፍቓድ የሆዋ ተሰማሚዕና ምዕያይ ዓቢ መሰል ኢዩ።—1 ቈረ. 9:16