“ካበይ ኢየ ግዜ ዝረክብ፧”
1 ናብራና ብእተፈላለየ ጕዳያት እተዋጠረ ስለ ዝዀነ: ብዙሓት ሰባት ከምዚ ኣብ ላዕሊ ዘሎ ኢሎም የማርሩ ኢዮም። ግዜ ካብ ኵሉ ንላዕሊ ዝኸበረን ቀልጢፉ ዝሓልፍን ጥሪት ምዃኑ ይዝረበሉ ኢዩ። ስለዚ: ነቲ ኸም ቃል ኣምላኽ ምንባብን ምጽናዕን ዝኣመሰለ ብሓቂ ኣገዳሲ ዝዀነ ነገራት ዘድሊ ግዜ ኻበይ ኢና ኽንረክብ እንኽእል፧—ፊል. 1:10
2 መፍትሒኡ ዝያዳ ግዜ ንኽትረክብ ምጽዓር ዘይኰነስ: ኣብታ ዘላትና ግዜ እንታይ ኽንገብር ከም ዘሎና ምውሳን ኢዩ። ኵላትና ኣብ ሰሙን 168 ሰዓታት ኣሎና: ካብዚ እቲ 100 ዝኸውን ኣብ ድቃስን ስራሕን ኢና እነሕልፎ። ስለዚ ነቲ ተሪፉ ዘሎ ሰዓታት ብኸመይ ኣብ ጽቡቕ መዓላ ኸነውዕሎ ንኽእል፧ ኤፌሶን 5:15-17 ‘ፍቓድ ጐይታ እንታይ ምዃኑ እናስተውዓልና ግዜ ብምዕዳግ: ከም ለባማት እምበር: ከም ዓያሱ ዘይኰነ’ ብጥንቃቐ ኽንመላለስ ትላበወና። እዚ ኸኣ ነቲ የሆዋ ኣድላዪ ኢዩ ዝብሎ ነገራት ንምግባር ንዅሉ ኣጋጣሚታት ምሉእ ብምሉእ ኽንጥቀመሉ ኸም ዘሎና ዝሕብር ኢዩ።
3 የሱስ ንግዜና ምስ ግዜ ኖህ ኣመሳሲልዎ ኢዩ። (ሉቃ. 17:26, 27) ኣብቲ ግዜ እቲ ዝነበሩ ሰባት በቲ ኣብ መዓልታዊ ናብርኦም ዝገብርዎ ንጥፈታት ተዋሒጦም ነበሩ። ይኹን እምበር: ኖህ ሓንቲ ዓባይ መርከብ ንኽሰርሕን ጽድቂ ንኽሰብኽን ግዜ ረኺቡ ኢዩ። (እብ. 11:7፣ 2 ጴጥ. 2:5) ብኸመይ፧ ንፍቓድ ኣምላኽ ቀዳምነት ብምሃብን ከምቲ እተኣዘዞ ‘ከምኡ ብምግባርን’ ኢዩ።—ዘፍ. 6:22
4 ቀዳምነት ክወሃቦ ዝግባእ እንታይ ኢዩ፧ የሱስ “ሰብ ካብ ኣፍ ኣምላኽ ብዚወጽእ ኵሉ ቓል እምበር: ብንጌራ ጥራይ ኣይነብርን” ኢሉ ኢዩ። (ማቴ. 4:4) ኣብ ሰሰሙን: መንፈሳዊ ‘ቐለብና በብግዜኡ’ ይወሃበና ኢዩ። (ሉቃ. 12:42) ካብዚ ብሓቂ ኽንጥቀም እንተድኣ ዄንና: ንዅሉ እቲ ትምህርቲ ኣብ ልብና ምእንቲ ኽሰርጽ ናይ ብሕቲ ስሩዕ መደብ ንባብን መጽናዕትን ምግባር ይሓተና ኢዩ። ንመንፈሳዊ መግቢ ሞሳ ስለ ዘሎና: ከምቲ ንእግረ መገድኻ ዝብላዕ ዓይነት ስጋዊ መግቢ ብሃታሃታ ኽንምገቦ ኣይንደልን ኢና። ኣብ ክንድኡስ: እቲ ዘሎና ሞሳ ንመንፈሳዊ ነገራት ግዜ ወሲድና ንኸነጽንዖን ንኸነስተማቕሮን ይድርኸና ኢዩ።
5 መንፈሳዊ መግቢ ምምጋብ ናብ ዘለኣለማዊ ህይወት ክመርሕ ይኽእል ኢዩ። (ዮሃ. 17:3) ኣብ መዓልታዊ መደባትና ቐዳምነት ክወሃቦ ዝግባእ ኢዩ። ንመዓልታዊ ንባብ መጽሓፍ ቅዱስን ንክርስትያናዊ ኣኼባታት ንምድላውን ግዜ ኽንረክብ ንኽእል ዲና፧ እወ: ንኽእል ኢና። ከምዚ እንተድኣ ገይርና: ፍቓድ ኣምላኽ ካብ ምፍላጥን ምግባርን ዝመጽእ “ዓብዪ ኻሕሳ” ኽንረክብ ኢና።—መዝ. 19:7-11