ብስራት ኢና እንሰብኽ
1 ኣወጅቲ እቲ ‘ሰናይ ብስራት’ ብምዃንናስ ኣየ ከመይ ዝበለ ዘደንቕ መሰል ኰን ኢና ረኺብና ዘሎና! (ሮሜ 10:15) ነቶም ብህውከትን ተስፋ ምቝራጽን እተኸቡ ሰባት ዘሐድስ መልእኽቲ ሒዝና ኣሎና። ሰባት ‘ሰናይ ብስራት’ ሒዝና ከም ዘሎና ንኽፈልጡ ብኸመይ ክንሕግዞም ንኽእል፧ (ሰያፍ ዝገበርናዮ ንሕና ኢና።)—ኢሳ. 52:7
2 ኣወንታዊ መልእኽቲ ከተቕርብ ተዳሎ:- ኣብ ዝሃንጽ ነገራት እንተድኣ ኣተኲርና እቲ ኣብ ኣገልግሎት እንገብሮ ዝርርብ ጽቡቕ ጽልዋ ክህልዎ ኢዩ። ስለዚ: ኣቀራርባ ክንዳሎን ነቲ እንዕድሎ ጽሑፍ ክንምርምሮን ከሎና: ናይቲ መልእኽቲ ኣወንታዊ ጐንታት ከነጕልሕ ኣሎና። ነቲ ኣብ መጽሓፍ ቅዱስ እተመስረተ ተስፋና ብምትእምማንን ብውዕዉዕ ስምዒትን ምስ እነካፍል: ዘተባብዕ ፍረ ክንጽበ ንኽእል ኢና።—ምሳ. 25:11
3 ሰባት በዚ እናኸፍአ ዝኸይድ ዘሎ ኵነታት ዓለም ክሳዕ ክንደይ ከም እተተንከፉ ክገልጹልና ከለዉ እንድንግጸሎም እኳ እንተዀንና: ንሽግር ደቅሰብ ናይ ሓቂ መፍትሒ እተምጽእ መንግስቲ ኣምላኽ ምዃና ክንሕብሮም ኣሎና። ብዛዕባ እታ እትመጽእ ዘላ “መዓልቲ ሕነ” የሆዋ ክንመያየጥ ከሎና: እዚ ብኸመይ “ንትሑታት ብስራት” ከም ዝዀነ ክንገልጸሎም ኣሎና። (ኢሳ. 61:1, 2) ኵሉ እቲ የሆዋ ዝገብሮ ነገራት ኣብ መወዳእታ ዝዓበየ ሓጐስን ዝበለጸ ውጽኢትን ከም ዘምጽእ ንሰማዕትና ከነረጋግጸሎም ንኽእል ኢና።
4 ንሓቂ ብልባዊ ሓጐስ ኣቕርባ:- ሰባት ነቲ ፍሕሹው ገጽናን ምትእምማን ዝመልኦ ቃና ድምጽናን ምስ ዝዕዘቡ ዝያዳ ናብ ምስማዕ የተኵሩ ኢዮም። ብሩህ ኣረኣእያ እንተድኣ ኣንጸባሪቕና: ሰማዕትና ‘በቲ ተስፋ ከም እንሕጐስ’ ክርድኦም ኢዩ። (ሮሜ 12:12) ስለዚ ኸኣ ነቲ ብስራት ምላሽ ንምሃብ ዝያዳ ይድረኹ ይዀኑ። ኣብ ኵሉ መዳያት ኣገልግሎትና ኵሉ ሳዕ ኣወንታውን ባህ ዘብልን ኣረኣእያ ንኸነንጸባርቕ ብቑዕ ምኽንያት ከም ዘሎና እተረጋገጸ ኢዩ።
5 ከም ኣገልገልቲ ናይቲ ብስራት መጠን ሓበሬታ ጥራይ ኣይኰንናን እንህብ። ስብከትና ብዛዕባ እቲ ሕጂ ዘሎን ኣብ መጻኢ ዝህሉን ዝሓሸ ህይወት ዝገልጽ ኢዩ። (1 ጢሞ. 4:8) ምስ ነፍሲ ወከፍ ሰብ ክንዛረብ ከሎና ኣወንታዊ ኣረኣእያና በቲ እንብሎ ነገራት ይንጸባረቕ ኢዩ: እዚ ኸኣ ሰባት ነቲ ብስራት ንኽቕበልዎ ይሕግዞም። እንታይ ከም እንብልን ብኸመይ ከም እንዛረብን ጥንቃቐ ብምግባር: ነቶም ቅኑዕ ዝልቦም ሰባት ነቲ እንሰብኮ ዘደንቕ ብስራት ንኽቕበልዎ ነለዓዕሎም!