ከምዚ ዝበለ ሰናይ መንፈሳዊ ነገራት ርኢና ኣይንፈልጥን!

¹ መብዛሕትኦም ሰባት “ከምዚ ዝበለ ሰናይ ነገራት ርኢና ኣይንፈልጥን!” ክብሉላ ዝኽእሉ መዓልቲ ሃንቀው ይብሉ ኢዮም። ብኣተሓሳስባኦም: እታ መዓልቲ እቲኣ ‘ንነፍሶም ዕረፊ: ብልዒ: ስተዪ: ተሐጐሲ’ ዝብልሉ: ኣኽል ታርፍ ዝዀነ ስጋዊ ነገራት ምስ ረኸቡ ኢያ እትመጽእ። (ሉቃ. 12:19) ምስዚ ብምንጽጻር: ሕጂ ኣብዚ እዋን እዚ ብመንፈሳዊ መገዲ ጽቡቕ ዘበለ ከም ዘይጐድለና ንምምልካት ከምኡ ክንብል ንኽእል ኢና። (መዝ. 34:10) እዚ ከመይ ኢሉ ይከኣል፧

² ምሳሌ 10:22 “በረኸት እግዚኣብሄር የሀብትም: ሽጋርውን ገለ ኣይውስኸሉን” ትብል። ንሕና እዞም ከምዚ ዝበለ መለኮታዊ ስምረት ዝረኣና ሰባት: ኣምላኽ ‘ኽንሕጐስ ኢሉ ዅሉ ብልግሲ ሂቡና’ ኢዩ ኢልና ብሓቂ ክንዛረብ ንኽእል ኢና። (1 ጢሞ. 6:​17) እዚ: ኣብ ምድሪ እቶም ዝሃብተሙ ሰባት ኢዩ ዝገብረና!

³ በረኸታትና ምጽብጻብ:- መብዛሕትና ኣኽል ታርፍ ዝዀነ ስጋዊ ነገራት የብልናን። እንተዀነ ግን: ብዛዕባ እቲ መዓልታዊ ዘድልየና መሰረታዊ ነገራት ካብ መጠን ንላዕሊ ስለ ዘይንሻቐል እተባረኽና ኢና። የሆዋ እንታይ ከም ዘድልየና ይፈልጥ ኢዩ: ነቲ ዘድልየና ነገራት ክህበና ምዃኑ ድማ ተማባጺዑልና ኢዩ። (ማቴ. 6:​31-33) እቲ ናቱ ውሕስነት ብሓቂ ኣዝዩ ክቡር ዝዀነ ናይ ኣእምሮ ሰላም ይህበና ኢዩ።

⁴ ይኹን እምበር: መንፈሳዊ በረኸታትና ካብዚ ዝዓበየ ኢዩ። ህይወትና ኣብቲ ካብ የሆዋ ዝርከብ መንፈሳዊ መግቢ እተመርኰሰ ኢዩ። (ማቴ. 4:⁠4) ንሕና ክሳዕ እንዓግብ ክንሰትን ክንበልዕን ከሎና እቶም መንፈሳዊ ዕንጋለ ንምርካብ ናብ ዓለማዊ ምንጭታት ቍሊሕ ዝብሉ ሰባት ግን ይጠምዩ ኢዮም። (ኢሳ. 65:13) እቲ ‘እሙን ባርያ’ ዘይውዳእ ቀረብ ናይቲ ናብ ዘለኣለማዊ ህይወት ዝመርሕ ፍልጠት እንረኽበሉ መገድታት ይህበና ኢዩ።​—⁠ማቴ. 24:​45፣ ዮሃ. 17:⁠3

⁵ እቲ ክቡር ዝዀነ ዓለምለኻዊ ሕውነትና ምዉቕ ብጻይነት ናይቶም ኣብ ኵሉ ክፍልታት ምድሪ ዝነብሩ ፈቃራት ኣሕዋትናን ኣሓትናን ይህበና ኢዩ። (ዮሃ. 13:35) እታ ኣብ ከባቢና ዘላ ጉባኤ ምጽንናዕን ዕረፍትን ክንረኽበላ እንኽእል ናይ ሰላም ቦታ ኢያ። ሽማግለታት ምስ ብዙሕ ዝዓይነቱ ግድላት ምግጣም ምእንቲ ኽንክእል ብምሕጋዝ: ንነፍሳትና ነቒሖም ይሕልዉ ኢዮም ዘለዉ። (እብ. 13:17) ምስ ኣሕዋትና ምቅርራብና: ንኸይንሕለል ብምብርታዕ ኣብ ንሓድሕድና ክንተባባዕ የኽእለና ኢዩ።​—⁠ሮሜ 1:​11, 12

⁶ ዕዮና እውን ከይተረፈ በረኸት ኢዩ። ብዙሕ ዓለማዊ ዕዮታት ዘሰልችዉን ዘየዕግቡን ኢዮም። እቲ ብስራት ንኻልኦት ምምቓል ግን: ንኻልኦት ባህታ ንዓና ድማ ሓጐስ ዘምጽእ ኢዩ። (ግብ. 20:35) ብሓቂ ብጻዕርና ጽቡቕ ፍረ ክንርኢ ክንክእል ኢና​—⁠መክ. 2:​24

⁷ ልዕሊ ዅሉ ድማ: ንመጻኢ ዘደንቕ ተስፋ ኣሎና። (ሮሜ 12:12) ነታ ምስ እነፍቅሮም ሰባት ብሓጐስን ሰላምን ንዘለኣለም እንነብረላ ጽድቂ ዝመልኣ ፍጽምቲ ሓዳስ ዓለም ብሃንቀውታ ንጽበያ ኢና! እዚ ተስፋ እዚ ካብቲ እዛ ዓለም እዚኣ እትህቦ ዝዀነ ይኹን ነገር ሓለፍ ዝበለ ሃብቲ ኢዩ።​—⁠1 ጢሞ. 6:​19

⁸ ሞሳና ብኸመይ ከነርኢ ንኽእል፧ ንየሆዋ በቲ ዝገበረልና ፈጺምና ክንፈድዮ ኣይንኽእልን ኢና። (1) በቲ ዘይንበቕዖ ሕያውነቱ መዓልቲ መዓልቲ ብምምስጋን (ኤፌ. 5:​20): (2) እዙዛት ኴንና ፍቕርና ብምግላጽ (1 ዮሃ. 5:⁠3): (3) ነቲ ብስራት እናሰበኽና ስሙ ብምቕዳስ (መዝ. 83:18): ከምኡውን (4) ምስታ ክርስትያናዊት ጉባኤ ብምሉእ ልብና እናተሓባበርና ብምድጋፍ ጥራይ ኢና ሞሳና ክንገልጽ እንኽእል።​—⁠1 ጢሞ. 3:​15

⁹ ኣብ ልዕሊ ምድሪ እቶም ኣዝዮም ሕጕሳት ሰባት ንኽንከውን ምሉእ ምኽንያት ኣሎና። (መዝ. 144:15ለ) ኣረኣእያና: ጠባይና: ከምኡውን ኣገልግሎትና እቲ ኣብ መንፈሳዊ ገነትና ዝስምዓና ሓጐስ ዘንጸባርቕ ይግበሮ። ከምዚ ዝበለ ሰናይ ነገራት ርኢና ኣይንፈልጥን ኢና!