ትምህርቲ 55

ንጉባኤኻ ደግፋ

ብወረቐት ኣብ እተሓትመ

ኣብ ብዘላ ዓለም፡ ሚልዮናት ሰባት ኣብ ኣሽሓት ጉባኤታት ተጠርኒፎም ንየሆዋ ብታሕጓስ የምልኽዎ ኣለዉ። ንሳቶም ከኣ ነቲ ዚውሃቦም መምርሒ የመስግኑሉ፡ ንጉባኤኦም እውን ብብዙሕ መገድታት ይድግፉ እዮም። ንስኻኸ ብዛዕባ ጉባኤኻ ኸምኡ ድዩ ዚስምዓካ፧

1. ገለ ኻብቲ ብግዜኻን ብጕልበትካን ኣቢልካ ንክርስትያናዊት ጉባኤ እትድግፈሉ መገድታት እንታይ እዩ፧

ኵላትና ኣብ ገጉባኤና እጃምና ኸነበርክት ንኽእል ኢና። ንኣብነት፡ ገሊኦም ኣብ ጉባኤና ዘለዉ ክርስትያናት፡ ኣረጋውያን ወይ ጸገም ጥዕና ዘለዎም ድዮም፧ ናብ ኣኼባታት ንምኻድ ክትሕግዞምዶ ትኽእል፧ ወይ ከኣ ብኻልእ ግብራዊ መገድታት፡ ንኣብነት ኣስቤዛ ብምትዕድዳግ ወይ ኣብ ገዛ ዚዕየ ነገራት ብምዕያይ ክትሕግዞምዶ ትኽእል፧ (ያእቆብ 1:27 ኣንብብ።) ኣዳራሽ መንግስቲ ኣምላኽ ኣብ ምጽራይን ኣብ ምክንኻንን እውን ብፍታውና ኽንሳተፍ ንኽእል ኢና። ከምኡ ኽንገብር፡ ዋላ ሓደ ኣይግድደናን እዩ። ንኣምላኽናን ንኣሕዋትናን ዘላትና ፍቕሪ እያ ‘ፈቲና ኽንመጽእ’ እትድርኸና።—መዝሙር 110:3።

ጥሙቓት ናይ የሆዋ መሰኻኽር ንጉባኤኦም ብኻልእ መገድታት ኪድግፉ ይኽእሉ እዮም። መንፈሳዊ ብቕዓት ዘለዎም ኣሕዋት፡ ኣገልገልቲ ጉባኤ ዀይኖም ኬገልግሉ፡ ጸኒሖም ከኣ ሽማግለታት ኰይኖም ኬገልግሉ ይኽእሉ እዮም። ኣሕዋትን ኣሓትን ፈለምቲ ዀይኖም ብምግልጋል፡ ኣብ ዕዮ ስብከት ኪድግፉ ይኽእሉ እዮም። ገሊኦም ናይ የሆዋ መሰኻኽር ቦታታት ኣምልኾ ብምህናጽ ወይ ሓገዝ ናብ ዜድልያ ጉባኤ ብምግዓዝ ኪሕግዙ ይኽእሉ እዮም።

2. ስጋዊ ጥሪትና ንክርስትያናዊት ጉባኤ ንምድጋፍ ብኸመይ ክንጥቀመሉ ንኽእል፧

‘ንየሆዋ ብጥሪትና ኸነኽብሮ’ ንኽእል ኢና። (ምሳሌ 3:9) ንጉባኤናን ንዓለምለኻዊ ዕዮ ስብከትን ገንዘባዊ ውጽኢት ምግባር ኰነ ብኻልእ መገዲ ጥሪትና ምውፋይ ከም ፍሉይ ክብሪ ኢና እንቘጽሮ። (2 ቈረንቶስ 9:7 ኣንብብ።) ወፈያታትና ንዕዮ ረድኤት እውን ይድግፍ እዩ። ብዙሓት ክርስትያናት ኣዘውቲሮም ንምውፋይ ገንዘብ ‘ኣዋህሊሎም የቐምጡ’ እዮም። (1 ቈረንቶስ 16:2 ኣንብብ።) ንሕና ኸኣ ኣብቲ ኣብ ቦታታት ኣምልኾና ዘሎ ሳጹን ውጽኢት ወይ ኣብቲ ኣብ ኢንተርነት ዚርከብ donate.jw.org ወፈያ ኽንገብር ንኽእል ኢና። የሆዋ በቲ ንስጋዊ ጥሪትና እንጥቀመሉ መገዲ ኣቢልና ፍቕርና ኽንገልጸሉ ኣጋጣሚ ይህበና እዩ።

ኣዕሚቝካ ዅዓት

ንክርስትያናዊት ጉባኤ ኽትድግፈሉ እትኽእል ገለ መገድታት ርአ።

3. ስጋዊ ጥሪትና ኽንውፊ ንኽእል ኢና

የሆዋ ሕጉስ ወሃቢ እዩ ዚፈቱ፣ የሱስ እውን ተመሳሳሊ ስምዒት እዩ ዘለዎ። ንኣብነት፡ የሱስ ንሓንቲ ድኻ መበለትን ነቲ ወፈያ ንምሃብ ዝገበረቶ ጻዕርን ኣስተብሂሉሉ እዩ። ሉቃስ 21:1-4 ኣንብብ፡ ድሕሪኡ በዚ ሕቶታት ተመያየጡ፦

ንየሆዋ ባህ ንምባል ብዙሕ ገንዘብዶ ኽንውፊ ኣሎና እዩ፧
የሆዋን የሱስን ብዛዕባ እቲ ኻብ ልቢ እንህቦ ወፈያ እንታይ ይስምዖም፧

ወፈያና ኣብ ምንታይ መዓላ ኸም ዚውዕል ንምፍላጥ፡ ቪድዮ ኣጻውት። ድሕሪኡ በዚ ሕቶ ተመያየጡ፦

ቪድዮ፦ ‘ንየሆዋ ዚውሃብ ኣብ ኢድና ዘሎ ህያብ’ (4:47)

ወፈያታት ነተን ኣብ ብዘላ ዓለም ዘለዋ ጉባኤታት ንምጥቃም ብኸመይ እዩ ኣብ መዓላ ዚውዕል፧

4. ሓገዝ ንምሃብ፡ ወለንተኛታት ክንከውን ንኽእል ኢና

ብግዜ መጽሓፍ ቅዱስ፡ ኣምለኽቲ የሆዋ ንቦታታት ኣምልኾኦም ንምክንኻን ብቕንኣት ዓይዮም እዮም። እዚ ግና ገንዘብ ካብ ምውፋይ ንላዕሊ እውን የጠቓልል ነይሩ እዩ። 2 ዜና መዋእል 34:9-11 ኣንብብ፡ ድሕሪኡ በዚ ሕቶ ተመያየጡ፦