ጥምቀት—ኣገዳሲ ሸቶ!

የሱስ ክርስትያናት ኪጥመቑ ኸም ዘለዎም ምሂሩ እዩ። (ማቴዎስ 28:19, 20 ኣንብብ።) እንተዀነ ግና፡ ጥምቀት እንታይ እዩ፧ ሓደ ሰብ ናብቲ ሸቶ እቲ ንምብጻሕከ እንታይ ኪገብር ኣለዎ፧

1. ጥምቀት እንታይ እዩ፧

እታ “ምጥማቕ” እትብል ቃል፡ ኣብ ማይ “ምጥላቕ” ካብ እትብል ናይ ግሪኽኛ ቓል እያ መጺኣ። የሱስ ኣብ እተጠምቀሉ እዋን፡ ኣብ ፈለግ ዮርዳኖስ ጠለቐ፣ ድሕሪኡ፡ “ካብ ማይ . . . ወጸ።” (ማርቆስ 1:9, 10) ብተመሳሳሊ፡ ናይ ሓቂ ክርስትያናት ኣብ ማይ ምሉእ ብምሉእ ብምጥላቕ ወይ ብምጥሓል እዮም ዚጥመቑ።

2. ጥምቀት እንታይ የርኢ፧

ሓደ ሰብ ኪጥመቕ ከሎ፡ ርእሱ ንየሆዋ ኣምላኽ ከም ዝወፈየ እዩ ዜርኢ። እሞ ደኣ ኸመይ ገይሩ እዩ ርእሱ ዚውፊ፧ ቅድሚ ምጥማቑ፡ ብውልቁ ናብ የሆዋ ኣብ ዜቕርቦ ጸሎት፡ ንዕኡ ንዘለኣለም ኬገልግሎ ኸም ዚደሊ ይነግሮ። ንየሆዋ በይኑ ኸም ዜምልኾን ፍቓዱ ምግባር ኣብ ህይወቱ ቐዳማይ ቦታ ኸም ዚህቦን ከኣ ይመባጻዕ። ነቲ የሱስ “ርእሱ ቐቢጹ፡ . . . ብቐጻሊ ይስዓበኒ” ኢሉ ዝሃቦ መምርሒ ብምሕላው፡ ትምህርትታትን ኣብነትን የሱስ ንምስዓብ ይውስን። (ማቴዎስ 16:24) ወፈያኡን ጥምቀቱን ከኣ ምስ የሆዋን ምስ ክርስትያናት ብጾቱን ናብ ቀረባ ዕርክነት ኪምስርት የኽእሎ።

3. ሓደ ሰብ ከመይ ገይሩ ናብ ጥምቀት ዕቤት ኪገብር ይኽእል፧

ንጥምቀት ምእንቲ ኽትዳሎ፡ ብዛዕባ የሆዋ ኽትምሃርን ኣብኡ እምነት ክትሃንጽን ኣሎካ። (እብራውያን 11:6 ኣንብብ።) ፍልጠትካን እምነትካን እናዓበየ ምስ ከደ፡ ንየሆዋ ዘሎካ ፍቕሪ እውን ኪዓቢ እዩ። ብዛዕባኡ ንምስባኽን ብመለክዒታቱ ንምምልላስን እውን ድሌት ከተሕድር ኢኻ። (2 ጢሞቴዎስ 4:2፣ 1 ዮሃንስ 5:3) ሓደ ሰብ ‘ንየሆዋ ዚበቅዕ ኰይኑ ዚመላለስን ብዅሉ ንዕኡ ዜሐጕሶን’ እንተ ዀይኑ፡ ህይወቱ ንኣምላኽ ወፍዩ ንምጥማቕ ኪውስን ይኽእል እዩ።—ቈሎሴ 1:9, 10።a

ኣዕሚቝካ ዅዓት

4. ካብ ጥምቀት የሱስ እንረኽቦ ትምህርቲ

ብዛዕባ ጥምቀት የሱስ ብዝርዝር ንምፍላጥ፡ ማቴዎስ 3:13-17 ኣንብብ። ድሕሪኡ በዚ ሕቶታት ተመያየጡ፦

• የሱስ ኪጥመቕ ከሎ ሕጻን ድዩ ነይሩ፧

• ብኸመይ እዩ ተጠሚቑ፧ ማይ ድዩ ተነጺጉሉ፧

የሱስ ምስ ተጠምቀ፡ ነቲ ኣምላኽ ኣብ ምድሪ ዝሃቦ ፍሉይ ዕዮ ኺዓዪ ጀሚሩ እዩ። ሉቃስ 3:21-23ን ዮሃንስ 6:38ን ኣንብብ፡ ድሕሪኡ በዚ ሕቶ ተመያየጡ፦

• የሱስ ምስ ተጠምቀ፡ ኣብ ህይወቱ ነየናይ ዕዮ እዩ ቐዳምነት ሂብዎ፧

5. ጥምቀት ኪብጻሕ ዚከኣል ሸቶ እዩ

ወፈያን ጥምቀትን ዚብል ሓሳብ፡ ፈለማ ልዕሊ ዓቕምካ ኺመስለካ ይኽእል እዩ። ኰይኑ ግና፡ በብቝሩብ ዕቤት ምስ እትገብር፡ ብምትእምማን ነዚ ኣገዳሲ ውሳነ እዚ ኽትገብር ትኽእል ኢኻ። ገለ ኻብቶም ከምኡ ዝገበሩ ሰባት ንምርኣይ፡ ቪድዮ ኣጻውት።

ቪድዮ፦ ምስ የሆዋ ርክብ ህነጽ (1:11)

ዮሃንስ 17:3ን ያእቆብ 1:5ን ኣንብብ፡ ድሕሪኡ በዚ ሕቶ ተመያየጡ፦

• ሓደ ሰብ ንጥምቀት ድሉው ምእንቲ ኪኸውን እንታይ ኪሕግዞ ይኽእል፧

1. ሀ. ንየሆዋ ንዘለኣለም ከነገልግሎ ኸም እንደሊ ብምንጋር፡ ርእስና ንዕኡ ንውፊ ኢና

2. ለ. ክንጥመቕ ከለና፡ ርእስና ንኣምላኽ ከም ዝወፈና፡ ንተዓዘብቲ ነርኢ ኢና

6. ምስ ተጠመቕና፡ ክፍሊ ስድራ ቤት የሆዋ ንኸውን

ምስ ተጠመቕና፡ ክፍሊ እቲ ሓድነት ዘለዎ ዓለምለኻዊ ስድራ ቤት ኢና እንኸውን። ካብ እተፈላለየ ዓድታት ወይ ድሕረ ባይታ ዝመጻእና እኳ እንተ ዀንና፡ ብሕደ ስነ ምግባራዊ ስርዓታት ኢና እንመላለስ። መዝሙር 25:14ን 1 ጴጥሮስ 2:17ን ኣንብብ፡ ድሕሪኡ በዚ ሕቶ ተመያየጡ፦

• ጥምቀት ነቲ ሓደ ሰብ ምስ የሆዋን ምስ ካልኦት ኣምለኽቲ የሆዋን ዘለዎ ብሕታዊ ርክብ ዚጸልዎ ብኸመይ እዩ፧

ጽማቝ

የሱስ ክርስትያናት ኪጥመቑ ኸም ዚግባእ ምሂሩ። ሓደ ሰብ ነቲ ሸቶ እቲ ንምብጻሕ፡ ኣብ የሆዋ ድልድልቲ እምነት ኪሃንጽ፡ ብመለክዒታት የሆዋ ኺመላለስ፡ ርእሱ እውን ንየሆዋ ኺውፊ ኣለዎ።

ክለሳ

• ጥምቀት እንታይ እዩ፧ ኣገዳሲ ዝዀነኸ ስለምንታይ እዩ፧

• ኣብ መንጎ ወፈያን ጥምቀትን እንታይ ምትእስሳር ኣሎ፧

• እንታይ ስጕምትታት እዩ ናብ ወፈያን ጥምቀትን ዜብጽሕ፧

ዳህስስ

ጥምቀት እንታይ ከም ዝዀነን እንታይ ከም ዘይኰነን ተምሃር።

“ጥምቀት እንታይ እዩ፧” (ዓንቀጽ ወብ)

ሰብ ናብ ጥምቀት ዕቤት ኪገብረሉ ዚኽእል መገድታት ከልስ።

“ንየሆዋ ዘሎና ፍቕርን ሞሳን ናብ ጥምቀት ይመርሕ” (ግምቢ ዘብዐኛ፡ መጋቢት 2020)

ሓደ ሰብኣይ ንጥምቀት ዝገበሮ ውሳነ ኣብ ስምዒት ጥራይ እተመርኰሰ ኸም ዘይኰነ ኣንብብ።

“ንሓቂ ኽምርምራ እዮም ዚደልዩኒ ነይሮም” (ግምቢ ዘብዐኛ፡ 1 ለካቲት 2013)

ጥምቀት ስለምንታይ ኣገዳሲ ሸቶ ኸም ዝዀነን ንዕኡ ብኸመይ ክትዳሎ ኸም እትኽእልን ርአ።

“ክጥመቕዶ፧” (መንእሰያት ዚሓትዎ ሕቶታትን ተግባራዊ መልስታቱን፡ 2ይ ጥራዝ፡ ምዕራፍ 37)