ኣርኣያ​—ዳዊት

ዳዊት ሙዚቃ ይፈቱ ነበረ። ክኢላ ሙዚቀኛን ደራስን እዩ ነይሩ። መሳርሒ ሙዚቃ እውን ኪሰርሕ ይኽእል ነበረ። (2 ዜና መዋእል 7:6) ኣዝዩ ኽኢላ ኻብ ምዃኑ እተላዕለ፡ ንጉስ እስራኤል ኣብ ቤተ-መንግስቲ ኺወቅዕ ጸውዖ። (1 ሳሙኤል 16:15-23) ዳዊት ነቲ ጻውዒት ተቐበሎ። በዚ ግን ኣይተመክሐን፡ ሙዚቃ ንህይወቱ ኺቈጻጸሮ እውን ኣየፍቀደን። ኣብ ክንዳኡስ፡ ብኽእለቱ ተጠቒሙ ንየሆዋ ወደሶ።

ሙዚቃ ትፈቱዶ፧ ክኢላ ሙዚቀኛ ኸይትኸውን ትኽእል ኢኻ፣ ኰይኑ ግን፡ ኣብነት ዳዊት ክትቀድሕ ትኽእል ኢኻ። ብኸመይ፧ ሙዚቃ ንህይወትካ ኺቈጻጸሮ ብዘይምፍቃድ ወይ ንኣምላኽ ዘየኽብር ነገር ንኽትሓስብ ወይ ንኽትገብር ኪድርኸካ ስቕ ኢልካ ብዘይምርኣይ። ኣብ ክንዳኡስ፡ ሙዚቃ ንህይወትካ መቐረት ከም ዚውስኸላ ንምግባር ተጠቐመሉ። ሙዚቃ ናይ ምፍጣርን ብእኡ ናይ ምሕጓስን ውህበት ካብ ኣምላኽ እዩ። (ያእቆብ 1:17) ዳዊት ነዚ ውህበት እዚ ንየሆዋ ብዜሐጕሶ መገዲ ተጠቐመሉ። ንስኻኸ ኸምኡ ኽትገብር ዲኻ፧