ካብ ገንዘብ ዝኸብር ነገር

ብወኪል ንቕሑ! ኣብ ካናዳ

ኣብ ብሪጅታውን: ኖቫ ስኮሺያ እትሕተም ዘ ሞኒተር ዘርእስታ ጋዜጣ (እንግሊዝኛ) ኣብ ዓምዳ “ካብ ዝዀነ ይኹን ብዝሒ ገንዘብ ኣዝዩ ዝኸብር ውህበት ንጓላ ሂባታ” ብምባል ኣፍልጦ ሃበት። እቲ ውህበት እንታይ ኢዩ ነይሩ፧ እዚ እቲ ንጓላ ዘርኣየታ “ዘደንቕ ኣብነት ናይ ቅንዕና” ኢዩ።

ኣና ከምኡውን ታንያ ጓላ እናኸዳ ከለዋ እግረ⁠-​መገደን ኣብ ሓደ ሓራጅ ተኣልየን ንታንያ መትሓዚ መጽሓፍ ቅዱስ እትኸውን ጻዕዳ ቦርሳ ዓደጋ። ኣብ ገዝአን ምስ ከዳ: ታንያ ኣብ ውሽጢ እቲ ቦርሳ ዝርከብ ሻርኔራ ከፈተት እሞ 1,000 ዶላር ካናዳ ምስ ረኸበት ደንጸዋ። ብኡንብኡ: ኣደን ጓልን ናብቲ ዝገዝኣሉ ቦታ ከይደን እቲ ገንዘብ ነታ እቲ ቦርሳ ዝሸጠትለን ሰበይቲ መለሳላ። እታ ቦርሳ ናይታ ኦልዘይመርስ ብዝበሃል ሕማም ምርሳዕ ትሳቐ ዝነበረት: ቅድሚ ሓጺር እዋን ድማ ዝሞተት ኣደ እታ ሸያጢት ነበረት: ብዙሕ እውን ኣይትጥቀመላን ኢያ ነይራ። እታ ቦርሳ ንመሸጣ ቅድሚ ምቕራባ ብጥንቃቐ ከም ዘይተፈተሸት ንጹር ኢዩ። እታ ሰበይቲ ነቲ እተገብረላ ነገር ኣጸቢቓ ኣማሰወትሉ: “እዚ ነቲ ኣብ ሰባት ዘሎኒ እምነት ከም ዘዐሪ ገይሩኒ . . . ቅኑዓት ሰባት ከም ዘለዉ ምፍላጥ ዘተባብዕ ኢዩ” ድማ በለት።

እታ ኣብቲ ዓዲ እትሕተም ጋዜጣ ኣብ ቀዳማይ ገጻ: ኣና ከምዚ ከም ዝበለት ጠቐሰት:- “ከም ናይ የሆዋ መሰኻኽር መጠን: ከምዚ ምግባርና ሓድሽ ነገር ኣይኰነን። ብመጽሓፍ ቅዱስ ዝሰልጠነ [ሕልና] ኣሎና። ንታንያ እውን ቅኑዕ ዘበለ ክንምህራ ንደሊ ኢና።” እታ ሓዳስ ጻዕዳ ቦርሳ ንታንያ ነቲ ብዛዕባ ቅንዕና ንእተማህረቶ ነገር ብፍላይ ከተዘኻኽራ ኢያ።