సృష్టి నిజంగా ఆరు రోజుల్లోనే జరిగిందని యెహోవాసాక్షులు నమ్ముతారా?

లేదు. దేవుడు సమస్తాన్ని సృష్టించాడని యెహోవాసాక్షులు నమ్ముతారు. కానీ సృష్టి నిజంగా ఆరు రోజుల్లోనే జరిగిందని మేము నమ్మం. ఎందుకంటే ఆ నమ్మకానికీ, బైబిలు చెప్పేదానికీ పొంతన లేదు. ఈ రెండు ఉదాహరణలు పరిశీలించండి:

1. ఆరు సృష్టి దినాల నిడివి. ఆరు సృష్టి దినాలు 24 గంటలు ఉండే మామూలు రోజులని కొందరు వాదిస్తారు. అయితే, “దినం” అని బైబిలు అంటున్నప్పుడు, కొన్నిసార్లు అది ఒక కాల నిడివిని సూచిస్తుంది.—ఆదికాండము 2:4; కీర్తన 90:4.

2. భూమి వయసు. సృష్టి నిజంగా ఆరు రోజుల్లో జరిగిందని నమ్మేవాళ్లు, భూమి వయసు కొన్ని వేల సంవత్సరాలు మాత్రమేనని బోధిస్తారు. కానీ ఆరు సృష్టి దినాలకు ముందే మన భూమి, విశ్వం ఉనికిలో ఉన్నాయని బైబిలు చెబుతుంది. (ఆదికాండము 1:1) అందుకే, భూమి వయసు వందల కోట్ల సంవత్సరాలు ఉండవచ్చని శాస్త్రజ్ఞులు పరిశోధించి చెప్పేదాన్ని యెహోవాసాక్షులు వ్యతిరేకించరు.

యెహోవాసాక్షులు దేవుడు సమస్తాన్ని సృష్టించాడని నమ్మినా, మేము విజ్ఞానశాస్త్రానికి వ్యతిరేకులం కాదు. నిజమైన విజ్ఞానశాస్త్రం, బైబిలు ఎప్పుడూ పొందిక కలిగివుంటాయని మేము నమ్ముతాం.