2 | “లేఖనాలు ఇచ్చే ఊరట”
బైబిల్లో ఇలా ఉంది: “మన సహనం వల్ల, లేఖనాలు ఇచ్చే ఊరట వల్ల మనం నిరీక్షణ కలిగివుండాలని పూర్వం రాయబడినవన్నీ మనకు బోధించడానికే రాయబడ్డాయి.”—రోమీయులు 15:4.
అంటే . . .
నెగిటివ్ ఆలోచనల్ని తట్టుకోవాలంటే చాలా శక్తి కావాలి. బైబిల్లో ఉన్న ఊరటనిచ్చే మాటలు మనకు ఆ శక్తినిస్తాయి. భవిష్యత్తులో ఒక కాలం వస్తుందని, అప్పుడు మానసిక వేదన పడాల్సిన పరిస్థితే ఉండదని కూడా బైబిలు చెప్తుంది.
దానివల్ల ఉపయోగం
అప్పుడప్పుడు అందరికీ బాధగా అనిపిస్తుంది; కానీ డిప్రెషన్, ఆందోళన ఉన్నవాళ్ల పరిస్థితి వేరు. బాధ, వేదన, ఒంటరితనం, వెలితి లాంటివి వాళ్లను ప్రతీ నిమిషం వెంటాడుతూ ఉంటాయి. అలాంటి వాళ్లకు బైబిలు ఎలా సహాయం చేస్తుంది?
నెగెటివ్ ఆలోచనల్ని దూరం చేసే ఎన్నో పాజిటివ్ విషయాలు బైబిల్లో ఉన్నాయి. (ఫిలిప్పీయులు 4:8) అవి మనసుకు ప్రశాంతతను ఇస్తాయి. ఎమోషన్స్ని కంట్రోల్లో ఉంచుకోవడానికి సహాయం చేస్తాయి.—కీర్తన 94:18, 19.
మనం ఎందుకూ పనికిరామనే ఆలోచనను తీసేసుకోవడానికి బైబిలు సహాయం చేస్తుంది.—లూకా 12:6, 7.
మనం ఒంటరి వాళ్లం కాదని, మనల్ని పుట్టించిన దేవుడు మన ఫీలింగ్స్ని పూర్తిగా అర్థం చేసుకుంటాడని బైబిలు చెప్తుంది. ఇలా మనలో ధైర్యాన్ని నింపే విషయాలు బైబిల్లో ఇంకా చాలా ఉన్నాయి.—కీర్తన 34:18; 1 యోహాను 3:19, 20.
మన మనసుకు తగిలిన గాయాలు ఎప్పటికీ గుర్తుకు రాకుండా చేస్తానని దేవుడు బైబిల్లో మాటిస్తున్నాడు. (యెషయా 65:17; ప్రకటన 21:4) గతం తాలూకా చేదు జ్ఞాపకాలు తేనెటీగల్లా మనమీద దాడి చేసినప్పుడు, ధైర్యం తెచ్చుకుని జీవితంలో ముందుకెళ్లడానికి ఈ మాట సహాయం చేస్తుంది.