మాకు యెహోవాసాక్షులు అనే పేరు ఎలా వచ్చింది?

యెహోవాసాక్షులది ఒక కొత్త మతం అని చాలామంది అనుకుంటారు. కానీ 2,700 కన్నా ఎక్కువ సంవత్సరాల క్రితమే, ఏకైక సత్యదేవుని సేవకులు ఆయన “సాక్షులు” అని పిలవబడ్డారు. (యెషయా 43:​10-12) మమ్మల్ని 1931 వరకు “బైబిలు విద్యార్థులు” అని పిలిచేవాళ్లు. మరైతే యెహోవాసాక్షులు అనే పేరు మాకు ఎలా వచ్చింది?

ఆ పేరు మా దేవుడు ఎవరో చెప్తుంది. ప్రాచీన రాతప్రతుల ప్రకారం, యెహోవా దేవుని పేరు బైబిల్లో వేలసార్లు ఉంది. కానీ చాలా అనువాదాల్లో ఆ పేరు తీసేసి “ప్రభువు” లేదా “దేవుడు” అని పెట్టారు. అయితే సత్యదేవుడే స్వయంగా తన పేరు యెహోవా అని మోషేకు చెప్పి, “ఎప్పటికీ నా పేరు ఇదే” అన్నాడు. (నిర్గమకాండం 3:15) అలా, తాను అబద్ధ దేవుళ్లకు వేరుగా ఉన్నానని ఆయన చూపించాడు. దేవుని పవిత్రమైన పేరు పెట్టుకున్నందుకు మేము చాలా గర్వపడుతున్నాం.

ఆ పేరు మా బాధ్యత ఏంటో చెప్తుంది. నీతిమంతుడైన హేబెలుతో మొదలుపెట్టి, పూర్వకాలంలో జీవించిన ఎంతోమంది దేవుని సేవకులు యెహోవా మీద తమకున్న విశ్వాసం గురించి సాక్ష్యమిచ్చారు. ఈ ‘పెద్ద సాక్షుల సమూహంలో’ నోవహు, అబ్రాహాము, శారా, మోషే, దావీదు వంటివాళ్లు ఉన్నారు. (హెబ్రీయులు 11:4–12:1) న్యాయస్థానంలో నిర్దోషి తరఫున ఒక వ్యక్తి సాక్ష్యం చెప్పినట్టు, మేము కూడా మా దేవుని గురించిన సత్యం చెప్పాలని తీర్మానించుకున్నాం.

మేము యేసును అనుసరిస్తున్నాం. బైబిలు యేసును “నమ్మకమైన సత్యసాక్షి” అని పిలుస్తుంది. (ప్రకటన 3:14) తాను ‘దేవుని పేరును తెలియజేశానని,’ దేవునికి సంబంధించిన ‘సత్యం గురించి సాక్ష్యం ఇస్తూ వచ్చానని’ యేసే స్వయంగా చెప్పాడు. (యోహాను 17:26; 18:37) కాబట్టి క్రీస్తును నిజంగా అనుసరించేవాళ్లు యెహోవా పేరును ధరించి, ఆ పేరును అందరికీ చెప్పాలి. యెహోవాసాక్షులు అదే చేస్తున్నారు.

• బైబిలు విద్యార్థులకు యెహోవాసాక్షులు అనే పేరు ఎలా వచ్చింది?

• యెహోవాకు భూమ్మీద ఎప్పటినుండి సాక్షులు ఉన్నారు?

• యెహోవా గురించి అందరికన్నా గొప్పగా సాక్ష్యమిచ్చింది ఎవరు?