ధరలు పెరిగిపోతుంటే బ్రతికేదెలా?
డబ్బును తెలివిగా ఖర్చు పెట్టండి
రేట్లకు రెక్కలు వచ్చి ఎగిరిపోతుంటే వాటిని అందుకోవడం మనందరికి కష్టంగానే ఉంటుంది. అలాగని మనం డీలా పడిపోవాల్సిన అవసరం లేదు. కొన్ని పనులు చేస్తే ఉన్నదాంట్లోనే చక్కగా సర్దుకుపోవచ్చు.
ఎందుకు తెలివిగా ఖర్చు పెట్టాలి?
ఒకవైపేమో రేట్లు ఆకాశాన్ని అంటుతున్నాయి. ఇలాంటి పరిస్థితుల్లో మీరు డబ్బును జాగ్రత్తగా ఖర్చు పెట్టకపోతే చివరికి మీ చేతిలో చిల్లిగవ్వ కూడా మిగలదు. మూలిగే నక్క మీద తాటికాయ పడినట్టు మీ ఆందోళనలు, టెన్షన్లు ఇంకా ఎక్కువౌతాయి. మీ ఆదాయం తక్కువే అయినా, డబ్బును పొదుపుగా వాడుకోవడానికి కొన్ని పనులు చేయవచ్చు.
మీరేం చేయవచ్చు?
ఉన్నదాంట్లో సర్దుకుపోండి. మీ ఆదాయానికి తగ్గట్టే ఖర్చులు చేస్తూ, కాస్త పొదుపు చేయడం నేర్చుకుంటే అనవసరమైన తలనొప్పుల్ని తప్పించుకోవచ్చు. ఇలా జీవించడం అలవాటు చేసుకుంటే, ఉన్నట్టుండి పెద్ద ఖర్చులు మీదపడినా మీరు ధైర్యంగా ఉంటారు.
ఉన్నదాంట్లో సర్దుకొని జీవించాలంటే, ముందుగా బడ్జెట్ వేసుకోవాలి. అంటే మీకు ఆదాయం ఎంత వస్తుంది, ఖర్చు ఎంత అవుతుంది అని లెక్కలు వేసుకోవాలి. అలా వేసుకునేటప్పుడు, నిజంగా మీ అవసరాలు ఏంటో ఆలోచించుకోండి. రేట్లు గానీ, మీ ఆదాయం గానీ కాస్త అటు-ఇటు అయినా కొన్ని మార్పులు చేసుకుంటూ మీ ప్లాన్ ప్రకారమే ఖర్చు చేయడానికి ప్రయత్నించండి. ఒకవేళ మీకు పెళ్లయి ఉంటే, మీ ఇద్దరూ కలిసి బడ్జెట్ వేసుకోండి.
ఇలా చేసి చూడండి: క్రెడిట్ కార్డుతో లేదా ఈయమ్ఐ (EMI) పద్ధతిలో వస్తువుల్ని కొనే బదులు మీ దగ్గరున్న డబ్బులతో కొనడానికి చూడండి. అలా చేయడం వల్ల కొంతమందికి తాము డబ్బుల్ని జాగ్రత్తగా ఖర్చు పెడుతున్నామని, అనవసరంగా అప్పులు చేయకుండా ఉంటున్నామని అనిపించింది. టైం తీసుకుని మీ బ్యాంక్ స్టేట్మెంట్లని, బ్యాలెన్స్ని ఎప్పటికప్పుడు చూసుకోండి. అప్పుడు మీ దగ్గర ఎంత ఉందో, దేనికి ఎంత ఖర్చు చేస్తున్నారో తెలుస్తుంది. దానివల్ల డబ్బును పొదుపుగా వాడతారు, ప్రశాంతంగా ఉంటారు.
మీ ఆదాయంలోనే ఖర్చులన్నీ సరిపెట్టుకోవడం కాస్త కష్టమే. కానీ బాగా ఆలోచించి, మంచిగా ప్లాన్ చేసుకుంటే ఉన్నదాంట్లోనే సర్దుకుపోవచ్చు. ప్రతీసారి డబ్బుల గురించి దిగులుపడాల్సిన అవసరం ఉండదు.
ఉద్యోగాన్ని నిలబెట్టుకోండి. దానికోసం మీరు ఈ పనులు చేయవచ్చు: ఉద్యోగానికి సమయానికి వెళ్లండి. ఇష్టంగా పని చేయండి. ఇతరులకు సహాయం చేయడానికి ముందుండండి, కష్టపడి పని చేయండి. మర్యాదగా ఉండండి. రూల్స్ పాటించండి, మీ నైపుణ్యాల్ని పెంచుకోవడానికి ప్రయత్నించండి.
డబ్బును దుబారా చేయకండి. ఇలా ప్రశ్నించుకోండి: నేను ఖరీదైన వాటికోసం, చెడు అలవాట్ల కోసం డబ్బును దుబారా చేస్తున్నానా? కొంతమందికి డ్రగ్స్, పేకాట, సిగరెట్ లాంటి అలవాట్లు ఉంటాయి. ఇంకొంతమందికి పీకలదాకా మందు తాగే అలవాటు ఉంటుంది. వీటికోసం వాళ్లు రెక్కలు-ముక్కలు చేసుకొని కష్టపడిన డబ్బునంతా మంచి నీళ్లలా ఖర్చు పెట్టేస్తారు. ఇలాంటి అలవాట్ల వల్ల వాళ్ల ఆరోగ్యమే కాదు ఉద్యోగం కూడా చేజారిపోతుంది.
అనుకోని పరిస్థితుల కోసం పొదుపు చేయండి. అనుకోని పరిస్థితులు చెప్పి రావు, ఉన్నపళంగా మీదకొచ్చి పడతాయి. కాబట్టి దానికోసం వీలైనప్పుడల్లా కొంత డబ్బును దాచి పెట్టండి. మీరు గానీ మీ ఇంట్లోవాళ్లు గానీ హాస్పిటల్ పాలైనా, మీ ఉద్యోగం పోయినా లేదా ఇలాంటి ఇంకే పరిస్థితి వచ్చినా ఆ డబ్బులు పనికొస్తాయి.