“నాకు ఇష్టం లేదు” అని చెప్పినవాళ్లతో యెహోవాసాక్షులు మళ్లీ ఎందుకు మాట్లాడతారు?

దేవుని మీద, అలాగే పొరుగువాళ్ల మీద ఉన్న ప్రేమతోనే యెహోవాసాక్షులు అందరికీ బైబిలు సందేశాన్ని ప్రకటిస్తారు. ఆ కారణంతోనే వాళ్లు “నాకు ఇష్టం లేదు” అని చెప్పిన వాళ్లతో కూడా మళ్లీ మాట్లాడతారు. (మత్తయి 22:37-39) మనకు దేవుని మీద ప్రేమ ఉంటే “పూర్తిస్థాయిలో సాక్ష్యమివ్వమని” ఆయన కుమారుడు ఇచ్చిన ఆజ్ఞను పాటిస్తాం. (అపొస్తలుల కార్యములు 10:42; 1 యోహాను 5:3) పూర్తిస్థాయిలో ప్రకటించడం కోసం, మేము దేవుని సందేశాన్ని చెప్పడానికి ప్రజల దగ్గరకు ఒకటికన్నా ఎక్కువసార్లు వెళ్తాం. ప్రాచీనకాలంలోని దేవుని ప్రవక్తలు కూడా అలానే చేశారు. (యిర్మీయా 25:4-6) మేము మా పొరుగువాళ్లను ప్రేమిస్తాం కాబట్టే ప్రాణాలు కాపాడే ‘రాజ్యం గురించిన మంచివార్తను’ ఇష్టం లేదని చెప్పినవాళ్లతో సహా అందరికీ చెప్పడానికి ప్రయత్నిస్తాం.—మత్తయి 24:14.

ఇష్టం లేదని ఒకసారి చెప్పినవాళ్ల ఇంటికి మళ్లీ వెళ్లినప్పుడు వాళ్లు ఆసక్తి చూపిస్తుంటారు. ఎందుకంటే,

• వేరేవాళ్లు ఆ ఇంట్లోకి రావడం.

• ఆ ఇంట్లోని ఇతరులకు మా సందేశం పట్ల ఆసక్తి ఉండడం.

• ప్రజల అభిప్రాయాల్లో మార్పు రావడం. ప్రపంచంలో జరిగే సంఘటనలు లేదా తమ జీవితాల్లో జరిగే సంఘటనల వల్ల కొంతమంది “దేవుని నిర్దేశం తమకు అవసరమని” గుర్తిస్తుంటారు. అంతేకాదు బైబిలు సందేశం పట్ల ఆసక్తి చూపిస్తుంటారు. (మత్తయి 5:3) ఒకప్పుడు బైబిలు సందేశాన్ని ఇష్టపడని వాళ్లు కూడా మనసు మార్చుకునే అవకాశం ఉంది. అపొస్తలుడైన పౌలు విషయంలో అదే జరిగింది.—1 తిమోతి 1:13.

కానీ మేము మాత్రం, మేము చెప్పే సందేశాన్ని వినమని ఎవ్వర్నీ బలవంతం చేయం. (1 పేతురు 3:15) ఎవర్ని ఆరాధించాలనే నిర్ణయాన్ని ఎవరికి వాళ్లు సొంతగా తీసుకోవాలని మేం నమ్ముతాం.—ద్వితీయోపదేశకాండము 30:19, 20.