యేసు బలి, “అనేకుల కోసం విమోచన క్రయధనం” ఎలా అయ్యింది?
బైబిలు ఇచ్చే జవాబు
యేసు బలి ద్వారానే దేవుడు మానవజాతిని పాపం, మరణం నుండి విడిపిస్తాడు. యేసు చిందించిన రక్తాన్ని విమోచన మూల్యం అని బైబిలు చెప్తోంది. (ఎఫెసీయులు 1:7; 1 పేతురు 1:18, 19) అందుకే, తాను “అనేకులకు ప్రతిగా విమోచన క్రయధనముగా తన ప్రాణము నిచ్చుటకు” వచ్చానని యేసు చెప్పాడు.—మత్తయి 20:28.
‘అనేకుల కోసం విమోచన క్రయధనం’ ఎందుకు అవసరమైంది?
దేవుడు మొదటి మనిషి ఆదామును పరిపూర్ణుడిగా లేదా ఏ పాపం లేనివాడిగా సృష్టించాడు. అతనికి నిరంతరం జీవించే గొప్ప అవకాశం ఉంది, కానీ దేవునికి అవిధేయత చూపించి, ఆ అవకాశాన్ని పోగొట్టుకున్నాడు. (ఆదికాండము 3:17-19) అతను పిల్లల్ని కనడంతో, పాపం అనే అతని లోపం వాళ్లకూ సంక్రమించింది. (రోమీయులు 5:12) అందుకే, ఆదాము తనను, తన పిల్లల్ని పాపానికి, మరణానికి బానిసలుగా ‘అమ్మేసుకున్నాడని’ బైబిలు తెలియజేస్తోంది. (రోమీయులు 7:14) వాళ్లందరూ అపరిపూర్ణులే కాబట్టి, ఆదాము పోగొట్టుకున్నదాన్ని వాళ్లలో ఎవరూ తిరిగి కొనలేరు.—కీర్తన 49:7, 8.
భవిష్యత్తు మీద ఏ ఆశా లేని ఆదాము సంతానం పట్ల దేవునికి కనికరం కలిగింది. (యోహాను 3:16) అయినా, దేవుని న్యాయ ప్రమాణాల్ని బట్టి, వాళ్ల పాపాల్ని చూసీచూడనట్లు వదిలేయడం లేదా సరైన ఆధారం లేకుండా క్షమించేయడం కుదరదు. (కీర్తన 89:14; రోమీయులు 3:23-26) దేవుడు మనుషుల్ని ప్రేమిస్తున్నాడు, కాబట్టి వాళ్లు తమ పాపాలకు క్షమాపణ పొందడమే కాదు, వాటిని పూర్తిగా తీసేసుకోవడానికి కావాల్సిన న్యాయబద్ధమైన ఆధారాన్ని వాళ్లకోసం ఏర్పాటుచేశాడు. (రోమీయులు 5:6-8) న్యాయబద్ధమైన ఆ ఆధారమే విమోచన క్రయధనం.
విమోచన క్రయధనం ఎలా పనిచేస్తుంది?
బైబిల్లో ఉన్న “విమోచన క్రయధనం” అనే పదంలో ఈ కింది మూడు అంశాలు ఉన్నాయి:
అది ఒక చెల్లింపు.—సంఖ్యాకాండము 3:46, 47.
అది విడుదలను లేదా విముక్తిని తెస్తుంది.—నిర్గమకాండము 21:30.
అది ఇచ్చిన విలువకు సరిసమానంగా ఉంటుంది, లేదా దాన్ని కప్పుతుంది.a
యేసుక్రీస్తు విమోచన క్రయధనానికి ఈ అంశాలు ఎలా వర్తిస్తాయో చూద్దాం.
చెల్లింపు. క్రైస్తవులు “విలువపెట్టి కొనబడినవారు” అని బైబిలు చెప్తోంది. (1 కొరింథీయులు 6:20; 7:23) యేసు రక్తమే ఆ విలువ. దానితోనే యేసు, “ప్రతి వంశములోను, ఆయా భాషలు మాటలాడువారిలోను, ప్రతి ప్రజలోను, ప్రతి జనములోను, దేవునికొరకు మనుష్యులను” కొన్నాడు.—ప్రకటన 5:8-10.
విడుదల. యేసు బలి, మనుషుల్ని విమోచన క్రయధనం ద్వారా పాపాల నుండి విడుదల చేస్తుంది.—1 కొరింథీయులు 1:30; కొలొస్సయులు 1:14; హెబ్రీయులు 9:15.
సరిసమానం. ఆదాము పోగొట్టుకున్న పరిపూర్ణ మానవ జీవానికి సరిగ్గా సమానమైనదాన్ని యేసు బలి చెల్లించింది. (1 కొరింథీయులు 15:21, 22, 45, 46) బైబిలు ఇలా చెప్తోంది: “ఏలయనగా ఒక మనుష్యుని [ఆదాము] అవిధేయతవలన అనేకులు పాపులుగా ఏలాగు చేయబడిరో, ఆలాగే ఒకని [యేసుక్రీస్తు] విధేయతవలన అనేకులు నీతిమంతులుగా చేయబడుదురు.” (రోమీయులు 5:19) ఒక మనిషి మరణం, అనేకమంది పాపుల కోసం విమోచన క్రయధనాన్ని ఎలా చెల్లిస్తుందో ఈ వచనం వివరిస్తోంది. నిజానికి యేసు బలి, దాని నుండి ప్రయోజనం పొందడానికి చర్యలు తీసుకునే ‘అందరి కోసం సరిసమానమైన విమోచన క్రయధనం.’—1 తిమోతి 2:5, 6, NW.
a బైబిల్లో, “విమోచన క్రయధనం” అని అనువాదమైన అసలు పదాలు, చెల్లించిన వెల లేదా విలువ అనే అర్థాన్నిస్తాయి. ఉదాహరణకు, కాఫార్ అనే హీబ్రూ క్రియాపదానికి ప్రాథమికంగా “కప్పడం” అని అర్థం. (ఆదికాండము 6:14) అది సాధారణంగా, పాపాలను కప్పడాన్ని సూచిస్తుంది. (కీర్తన 65:3, పవిత్ర గ్రంథం, వ్యాఖ్యాన సహితం) దీనికి సంబంధించిన కోఫర్ అనే నామవాచకం, అలా కప్పడానికి లేదా విమోచించడానికి చెల్లించే వెలను సూచిస్తుంది. (నిర్గమకాండము 21:30) అలాగే, “విమోచన క్రయధనం” అని అనువాదమైన గ్రీకు పదం, లీట్రన్ కూడా “విమోచనకు వెల” అనే అర్థాన్నిస్తుంది. (మత్తయి 20:28; పవిత్ర గ్రంథం, వ్యాఖ్యాన సహితం) ఒక యుద్ధ ఖైదీని విమోచించడం కోసం లేదా ఒక బానిసను విడిపించడం కోసం చెల్లించే మొత్తాన్ని సూచించడానికి గ్రీకు రచయితలు ఈ పదాన్ని ఉపయోగించారు.