క్రైస్తవత్వంలో ఎందుకు ఇన్ని శాఖలు ఉన్నాయి?

బైబిలు ఇచ్చే జవాబు

ప్రజలు యేసు బోధలను ఉపయోగించుకొని రకరకాల “క్రైస్తవ” శాఖలను మొదలుపెట్టారు. కానీ, నిజమైన క్రైస్తవమతం ఒక్కటే ఉందని బైబిలు చెప్తుంది. ఇది నిజమని చెప్పడానికి ఈ మూడు కారణాలను పరిశీలించండి.

1. తాను బోధించింది “సత్యము” అని యేసు చెప్పాడు, అలాగే తొలి క్రైస్తవులు తమది సత్య మతమని చెప్పారు. (యోహాను 8:32; 2 పేతురు 2:2; 2 యోహాను 4; 3 యోహాను 3) కాబట్టి ఎవరైతే యేసు చేసిన బోధలతో పొంతనకుదరని సిద్ధంతాలను ప్రోత్సహిస్తారో వాళ్లది నిజమైన క్రైస్తవ మతం కాదు.

2. క్రైస్తవులు “ఏకభావముతో మాటలాడవలెను” అని బైబిలు బోధిస్తోంది. (1 కొరింథీయులు 1:10) కానీ చాలా క్రైస్తవమత శాఖల్లో ‘క్రైస్తవునిగా ఉండడమంటే ఏమిటి?’ వంటి ప్రాథమిక బోధల విషయంలోనే ఏకాభిప్రాయం లేదు. అలాంటి శాఖలన్నీ నిజమైనవి కావు.—1 పేతురు 2:21.

3. చాలామంది క్రైస్తవులమని చెప్పుకుంటారేగానీ తన బోధలను పాటించరనీ అలాంటివాళ్లను తాను ఒప్పుకోననీ యేసు ముందే చెప్పాడు. (మత్తయి 7:21-23; లూకా 6:46) లాభం పొందడం కోసం సత్యారాధనను కలుషితం చేసే మతనాయకుల వల్ల కొంతమంది మోసపోతారు. (మత్తయి 7:15) అయితే, అబద్ధ క్రైస్తవశాఖలను కొంతమంది ఎందుకు అనుసరిస్తున్నారంటే, అవి వాళ్లకు బైబిల్లోని సత్యాన్ని కాదుగానీ వాళ్లు వినడానికి ఇష్టపడే విషయాల్ని చెప్తాయి కాబట్టి.—2 తిమోతి 4:3, 4.

గోధుమల గురుగుల ఉపమానం గురించి చెప్తూ నిజమైన క్రైస్తవమతంలో గొప్ప భ్రష్టత్వం మొదలవుతుందని యేసు ప్రవచించాడు. (మత్తయి 13:24-30, 36-43) చాలాకాలంపాటు నిజ క్రైస్తవులు ఎవరో, అబద్ధ క్రైస్తవులు ఎవరో గుర్తుపట్టడం కష్టమౌతుంది. యేసు చెప్పినట్టే అపొస్తలులు చనిపోయిన తర్వాత మతభ్రష్టత్వం ఎక్కువైంది. (అపొస్తలుల కార్యములు 20: 29, 30) మతభ్రష్ట బోధలు వేర్వేరుగా ఉన్నప్పటికీ, రకరకాల అబద్ధ క్రైస్తవ శాఖలన్నీ సత్యము నుండి తప్పిపోయాయి.—2 తిమోతి 2:17, 18.

అబద్ధ మతానికి, నిజమైన మతానికి ఉన్న తేడా మెల్లమెల్లగా స్పష్టమౌతుందని కూడా యేసు ముందే చెప్పాడు. ఇది మన కాలంలో అంటే “యుగసమాప్తి” కాలంలో జరిగింది.—మత్తయి 13:30, 39.