మనం ఎప్పుడు చనిపోతామనేది ముందే రాసిపెట్టి ఉంటుందా?

బైబిలు ఇచ్చే జవాబు

లేదు. మనం ఎంతకాలం బ్రతుకుతాం అనేది ముందే రాసిపెట్టి ఉండదు. తలరాత నిజమని బైబిలు చెప్పట్లేదు కానీ సాధారణంగా మరణం అనుకోని సంఘటనలవల్ల జరుగుతుందని చెప్తుంది.—ప్రసంగి 9:11.

చనిపోవడానికి ఒక సమయం ఉందని బైబిలు చెప్తుందా?

అవును. “పుట్టుటకు చచ్చుటకు; నాటుటకు నాటబడినదాని పెరికివేయుటకు” సమయం ఉందని ప్రసంగి 3:2 చెప్తుంది. ఈ వచనాన్ని రాసిన సందర్భాన్ని చూస్తే, మన జీవితంలో ఒకదాని తర్వాత ఒకటి వచ్చే దశల గురించి బైబిలు చర్చిస్తున్నట్లు తెలుస్తుంది. (ప్రసంగి 3:1-8) ఫలానా సమయంలోనే మొక్క నాటాలని దేవుడు ఓ రైతుని బలవంత పెట్టనట్టే, మనం ఫలానా సమయంలో చనిపోవాలని ముందే రాసిపెట్టలేదు. బదులుగా, అక్కడ చెప్తున్న విషయం ఏంటంటే మన సృష్టికర్తను పట్టించుకోనంతగా అనవసరమైన విషయాల్లో మునిగిపోకూడదు.—ప్రసంగి 3:11, 12; 12:1, 13.

ఎక్కువకాలం జీవించగలం

ఎప్పుడు ఏం జరుగుతుందో మనకు తెలియకపోయినా, తెలివైన నిర్ణయాలు తీసుకుంటే ఎక్కువకాలం జీవించగలుగుతాం. “జ్ఞానుల ఉపదేశము జీవపు ఊట అది మరణపాశములలోనుండి విడిపించును” అని బైబిలు చెప్తుంది. (సామెతలు 13:14) అదేవిధంగా, దేవుడు ఇచ్చిన ఆజ్ఞలను పాటిస్తే ‘దీర్ఘాయుష్మంతులు’ అవుతారని మోషే ప్రాచీనకాలంలోని ఇశ్రాయేలీయులకు చెప్పాడు. (ద్వితీయోపదేశకాండము 6:2) దానికి భిన్నంగా, మనం చెడ్డగా జీవిస్తే లేదా తెలివితక్కువ పనులు చేస్తే త్వరగా చనిపోయే అవకాశం ఉంది.—ప్రసంగి 7:17.

మనం ఎంత తెలివిగా లేదా జాగ్రత్తగా ఉన్నా మరణాన్ని తప్పించుకోలేం. (రోమీయులు 5:12) కానీ ఈ పరిస్థితి ఎప్పుడూ ఇలాగే ఉండదు, ‘మరణము ఇక ఉండని’ కాలం వస్తుందని బైబిలు మాటిస్తుంది.—ప్రకటన 21:4.