నమ్మకమైన దేవదూతల ఆదర్శాన్ని పాటించండి

1-2. (ఎ) దేవదూతలకు, మనకు తేడా ఏంటి? (బి) దేవదూతలకు, మనకు ఎలాంటి పోలికలు ఉన్నాయి?

యెహోవా మనల్ని సత్యంలోకి ఆకర్షించినప్పుడు ప్రేమగల కుటుంబంలోకి మనల్ని ఆహ్వానించాడు. అందులో బ్రదర్స్‌సిస్టర్స్‌ మాత్రమే కాదు, లక్షలమంది నమ్మకమైన దేవదూతలు కూడా ఉన్నారు. (దాని. 7:9, 10) ఒకసారి ఆలోచిస్తే దేవదూతలకు మనకు మధ్య, ఆకాశానికి భూమికి ఉన్నంత తేడా ఉందని మనకు అనిపించవచ్చు. ఉదాహరణకు, దేవదూతలు మనకన్నా ఎన్నో ఏళ్ల క్రితం సృష్టించబడ్డారు. (యోబు 38:4, 7) వాళ్లు మనకన్నా చాలా శక్తిమంతులు. అపరిపూర్ణ మనుషులమైన మనం ఉండలేనంత పవిత్రంగా, నీతిగా దేవదూతలు ఉన్నారు.—లూకా 9:26.

² దేవదూతలకు మనకు తేడాలు ఉన్నా, చాలా పోలికలు కూడా ఉన్నాయి. ఉదాహరణకు దేవదూతల్లా మనం యెహోవా లక్షణాల్ని చూపించగలుగుతాం. అలాగే మనకు సొంతగా నిర్ణయాలు తీసుకునే స్వేచ్ఛ ఉంది. దేవదూతల్లా మనకు కూడా వేర్వేరు పేర్లు, వేర్వేరు వ్యక్తిత్వాలు, యెహోవా సేవలో వేర్వేరు బాధ్యతలు ఉన్నాయి. అంతేకాదు వాళ్లలాగే సృష్టికర్త గురించి నేర్చుకుని, ఆయన్ని ఆరాధించాలనే బలమైన కోరిక మనకుంది.—1 పేతు. 1:12.

3. ఏ విషయాల్లో మనం నమ్మకమైన దేవదూతల ఆదర్శాన్ని పాటించవచ్చు?

³ దేవదూతలకు మనకు చాలా పోలికలు ఉన్నాయి కాబట్టి వాళ్లనుండి మనం ఎన్నో విషయాలు నేర్చుకోవచ్చు, ప్రోత్సాహం పొందవచ్చు. వినయం, ప్రజల పట్ల ప్రేమ, సహనం, సంఘాన్ని పవిత్రంగా ఉంచడం లాంటి విషయాల్లో మనం దేవదూతల ఆదర్శాన్ని ఎలా పాటించవచ్చో ఈ ఆర్టికల్‌లో చూస్తాం.

దేవదూతలు వినయం చూపిస్తారు

4. (ఎ) దేవదూతలు వినయాన్ని ఎలా చూపిస్తారు? (బి) దేవదూతలు ఎందుకు వినయంగా ఉంటారు? (కీర్తన 89:7)

⁴ నమ్మకమైన దేవదూతలు వినయం చూపిస్తారు. వాళ్లకు చాలా అనుభవం, శక్తి, తెలివి ఉన్నప్పటికీ వాళ్లు యెహోవా నిర్దేశాలకు లోబడతారు. (కీర్త. 103:20) వాళ్లు నియామకాలు చేస్తుండగా గొప్పలు చెప్పుకోరు లేదా వాళ్లకున్న అసాధారణ శక్తిని చూపించుకోరు. వాళ్లకు పేరు రాకపోయినా దేవుని ఇష్టాన్ని సంతోషంగా చేస్తారు.a (ఆది. 32:24, 29; 2 రాజు. 19:35) యెహోవాకు చెందాల్సిన మహిమను వాళ్లు అస్సలు ఆశించరు. దేవదూతలు ఎందుకింత వినయంగా ఉంటారు? ఎందుకంటే వాళ్లు యెహోవాను ప్రేమిస్తారు, ఆయన్ని చాలా గౌరవిస్తారు.—కీర్తన 89:7 చదవండి.

5. అపొస్తలుడైన యోహానును సరిదిద్దుతున్నప్పుడు ఒక దేవదూత ఎలా వినయం చూపించాడు? (చిత్రం కూడా చూడండి.)

⁵ దేవదూతలు చూపించే వినయం గురించి ఒక ఉదాహరణ గమనించండి. క్రీ.శ. 96 లో ఒక దేవదూత అపొస్తలుడైన యోహానుకు ఒక అద్భుతమైన దర్శనాన్ని చూపించాడు. ఆ దేవదూత పేరు బైబిల్లో లేదు. (ప్రక. 1:1) దర్శనం చూడగానే యోహాను ఏం చేశాడు? ఆ దేవదూతను ఆరాధించడానికి ప్రయత్నించాడు. అయితే ఆ నమ్మకమైన దేవదూత వెంటనే అతన్ని ఆపుతూ ఇలా అన్నాడు: “వద్దు! అలా చేయొద్దు! నేను కూడా నీలాగే . . . నీ సహోదరుల్లాగే ఒక దాసుణ్ణి మాత్రమే. దేవుణ్ణే ఆరాధించు!” (ప్రక. 19:10) ఆ దేవదూత తననుతాను ఎంత తగ్గించుకున్నాడో కదా! అందరి దృష్టి ఆయన మీద పడాలని, ఆయన్ని మెచ్చుకోవాలని దేవదూత ఏమాత్రం కోరుకోలేదు. ఆయన వెంటనే యోహాను దృష్టిని యెహోవా వైపుకు మళ్లించాడు. అదే సమయంలో ఆయన యోహానును చిన్నచూపు చూడలేదు. యోహాను కన్నా ఆ దేవదూత చాలాకాలంగా యెహోవాను సేవిస్తున్నా, చాలా శక్తి ఉన్నా, ఎంతో వినయంగా ఆ అపొస్తలుల్లాగే తను కూడా ఒక దాసుడే అని చెప్పాడు. ఆ దేవదూత వృద్ధుడైన యోహానును సరిదిద్దాల్సి వచ్చినా తిట్టడం గానీ, కఠినంగా ప్రవర్తించడం గానీ చేయలేదు. బదులుగా ఆయన దయగా మాట్లాడాడు. యోహాను చాలా ఆశ్చర్యపోయాడు, భయపడ్డాడు కాబట్టే అలా ఆరాధించడానికి ప్రయత్నించాడని దేవదూత అర్థం చేసుకున్నాడు.

6. దేవదూతల్లాగే మనం కూడా వినయాన్ని ఎలా చూపించవచ్చు?

⁶ దేవదూతల్లాగే మనం కూడా వినయాన్ని ఎలా చూపించవచ్చు? యెహోవా సేవలో మనం ఏం చేసినా గొప్పలు చెప్పుకోకూడదు లేదా మనం సాధించిన వాటికి ఘనత తీసుకోకూడదు. (1 కొరిం. 4:7) అంతేకాదు, యెహోవా సేవను ఎక్కువకాలం చేశామని లేదా కొన్ని సేవావకాశాలు ఉన్నాయని మనం వేరేవాళ్ల కన్నా గొప్ప అని అనుకోకూడదు. నిజానికి మన బాధ్యతలు ఎంత పెరిగితే మనల్ని మనం అంత తగ్గించుకోవాలి. (లూకా 9:48) దేవదూతల్లాగే, మనం ఇతరులకు సేవచేయడానికే ప్రయత్నించాలి. మనమే అందరికన్నా గొప్ప అని చూపించుకోవడానికి ప్రయత్నించకూడదు.

7. సరిదిద్దాల్సి వచ్చినప్పుడు లేదా సలహా ఇవ్వాల్సి వచ్చినప్పుడు మనం వినయాన్ని ఎలా చూపించవచ్చు?

⁷ బ్రదర్స్‌సిస్టర్స్‌ని గానీ, మన పిల్లల్ని గానీ సరిదిద్దాల్సి వచ్చినప్పుడు లేదా సలహా ఇవ్వాల్సి వచ్చినప్పుడు వినయం చూపించాలి. సలహా ఇస్తున్నప్పుడు మనం కొన్నిసార్లు సూటిగా ఉండాల్సి రావచ్చు. కానీ అవతలి వ్యక్తి మనసును విరిచేలా కాకుండా, యోహానును సరిదిద్దిన దేవదూతలాగే దయగా మాట్లాడాలి. వేరేవాళ్లు మనకంటే గొప్ప అని అనుకున్నప్పుడే మనం గౌరవపూర్వకంగా, దయగా, బైబిలు ఆధారంగా సలహా ఇస్తాం.—కొలొ. 4:6.

దేవదూతలు ప్రజల్ని ప్రేమిస్తారు

8. (ఎ) దేవదూతలకు మనుషులంటే ఇష్టమని లూకా 15:10 ఎలా చూపిస్తుంది? (బి) మనం ప్రీచింగ్‌ చేస్తున్నప్పుడు దేవదూతలు మనకు ఎలా సహాయం చేస్తారు? (చిత్రం కూడా చూడండి.)

⁸ మనుషులకు తమకు ఎటువంటి సంబంధం లేదన్నట్టు దేవదూతలు ఉండరు. వాళ్లకు మనుషులంటే చాలా ఇష్టం. పాపం చేసిన వ్యక్తి పశ్చాత్తాపపడినప్పుడు, అంటే ఒక తప్పిపోయిన గొర్రె యెహోవా దగ్గరికి తిరిగొచ్చినప్పుడు లేదా ఒక వ్యక్తి మార్పులు చేసుకుని సత్యంలోకి వచ్చినప్పుడు దేవదూతలు సంతోషిస్తారు. (లూకా 15:10 చదవండి.) ప్రకటనా పనిలో కూడా దేవదూతలు చాలా చురుగ్గా పనిచేస్తారు. (ప్రక. 14:6) దేవదూతలు ప్రజలకు నేరుగా ప్రకటించకపోయినా, యెహోవా గురించి నేర్చుకోవాలి అనుకుంటున్న వాళ్ల దగ్గరికి బ్రదర్స్‌సిస్టర్స్‌ని నడిపిస్తారు. అయితే ఫలానా వ్యక్తి దగ్గరికి దేవదూతే మనల్ని నడిపించాడని మనం ఖచ్చితంగా చెప్పలేం. ఎందుకంటే ప్రజలకు సహాయం చేయడానికి లేదా తన సేవకుల్ని నడిపించడానికి యెహోవా వేరేవాటిని, అంటే పవిత్రశక్తిని కూడా ఉపయోగిస్తాడు. (అపొ. 16:6, 7) అయితే ఒకటి మాత్రం స్పష్టం: దేవుడు చాలావరకు దేవదూతల్ని ఉపయోగిస్తున్నాడు. కాబట్టి ప్రీచింగ్‌ చేస్తున్నప్పుడు మనకు దేవదూతల మద్దతు ఉంటుందని మనం నమ్మకంతో ఉండవచ్చు.—“వాళ్ల ప్రార్థనలకు జవాబులు దొరికాయి” అనే బాక్సు చూడండి.b

9. మనం కూడా దేవదూతల్లాగే ప్రజల్ని ఎలా ప్రేమించవచ్చు?

⁹ మనం కూడా దేవదూతల్లాగే ప్రజల్ని ఎలా ప్రేమించవచ్చు? ఎవరైనా తిరిగి చేర్చుకోబడ్డారు అనే ప్రకటన విన్నప్పుడు దేవదూతల్లాగే మనం కూడా సంతోషించవచ్చు. వాళ్లను మనం ప్రేమిస్తున్నామని, తిరిగి యెహోవా సేవ చేస్తున్నందుకు సంతోషిస్తున్నామని చెప్పవచ్చు. (లూకా 15:4-7; 2 కొరిం. 2:6-8) అంతేకాదు, ప్రకటనా పనిలో మనం చేయగలిగినదంతా చేయడం ద్వారా దేవదూతల ఆదర్శాన్ని పాటించవచ్చు. (ప్రసం. 11:6) ప్రీచింగ్‌లో దేవదూతలు మనకు మద్దతిస్తున్నట్టే, మనం కూడా బ్రదర్స్‌సిస్టర్స్‌కి మద్దతు ఇచ్చే అవకాశాల కోసం చూడవచ్చు. ఉదాహరణకు, కొత్తగా సత్యంలోకి వచ్చి అప్పుడప్పుడే ప్రీచింగ్‌ చేయడం మొదలుపెట్టిన వాళ్లతో కలిసి పని చేయగలమా? వృద్ధులతో, అనారోగ్యంతో బాధపడుతున్న బ్రదర్స్‌సిస్టర్స్‌తో కలిసి ప్రీచింగ్‌ చేయగలమా?

10. శారా ఉదాహరణ నుండి మనం ఏం నేర్చుకోవచ్చు?

¹⁰ మన పరిస్థితుల వల్ల ఎక్కువ సేవ చేయలేకపోతుంటే అప్పుడేంటి? అప్పుడు కూడా దేవదూతలు మనకు సహాయం చేస్తారని నమ్మవచ్చు. ఇండియాలో ఉంటున్న శారాc అనే సిస్టర్‌ ఉదాహరణ గమనించండి. దాదాపు 20 ఏళ్లు పయినీరుగా చేసిన తర్వాత, అనారోగ్య సమస్య వల్ల శారా మంచానికే పరిమితమైంది. అప్పుడు ఆమె చాలా బాధలో మునిగిపోయింది. కానీ బ్రదర్స్‌సిస్టర్స్‌ చూపించిన ప్రేమ, వాళ్లు చేసిన సహాయం అలాగే ఆమె క్రమంగా బైబిలు చదవడం ద్వారా తిరిగి తన సంతోషాన్ని పొందింది. అయితే ఆమె కొత్త పరిస్థితులకు తగ్గట్టు తన పరిచర్యను కూడా మార్చుకోవాల్సి వచ్చింది. ఆమె కనీసం, కూర్చుని ఉత్తరాలు కూడా రాయలేదు కాబట్టి, టెలిఫోన్‌ సాక్ష్యం మాత్రమే చేయగలిగింది. ఆమె తన రిటన్‌ విజిట్‌ వాళ్లకు కాల్‌ చేసింది. వాళ్లు ఆసక్తి ఉన్న వేరేవాళ్ల గురించి చెప్పారు. దానివల్ల కొన్ని నెలలకే శారా 70 బైబిలు స్టడీలు మొదలుపెట్టింది. అవన్నీ తను ఒక్కతే చేయలేక సంఘంలో ఉన్న బ్రదర్స్‌సిస్టర్స్‌కి కొన్ని ఇచ్చేసింది. అలా స్టడీ తీసుకుంటున్న చాలామంది, ఇప్పుడు మీటింగ్స్‌కి కూడా వస్తున్నారు. శారాలా ప్రీచింగ్‌లో చేయగలిగినదంతా చేస్తున్న బ్రదర్స్‌సిస్టర్స్‌తో కలిసి పనిచేయడానికి దేవదూతలు ఎంత సంతోషిస్తారో కదా!

దేవదూతలు సహనం చూపిస్తారు

11. సహనం చూపించే విషయంలో నమ్మకమైన దేవదూతలు తిరుగులేని ఉదాహరణ అని ఎందుకు చెప్పవచ్చు?

¹¹ సహనం చూపించే విషయంలో నమ్మకమైన దేవదూతలకు తిరుగులేదు. వాళ్లు ఎన్నో వేల సంవత్సరాల నుండి అన్యాయాన్ని, చెడుతనాన్ని సహిస్తూ వస్తున్నారు. ఒకప్పుడు వాళ్లతో కలిసి సేవచేసిన సాతాను, ఎంతోమంది ఇతర దూతలు యెహోవాకు ఎదురుతిరగడం వాళ్లు చూశారు. (ఆది. 3:1; 6:1, 2; యూదా 6) ఒక సందర్భంలోనైతే, ఒక శక్తివంతుడైన చెడ్డదూత నేరుగా నమ్మకమైన ఒక దేవదూతను వ్యతిరేకించాడని బైబిలు చెప్తుంది. (దాని. 10:13) అంతేకాదు ఆదాముహవ్వల కాలం నుండి, కేవలం కొద్దిమంది మనుషులు మాత్రమే యెహోవాను ఆరాధించాలని నిర్ణయించుకోవడం కూడా ఆ దేవదూతలు చూస్తున్నారు. అయినాసరే నమ్మకమైన దేవదూతలు సంతోషంగా, ఉత్సాహంగా యెహోవా సేవ చేస్తూనే ఉన్నారు. సరైన సమయంలో దేవుడు అన్యాయాన్ని నామరూపాలు లేకుండా చేస్తాడని వాళ్లకు తెలుసు.

12. సహించడానికి మనకేది సహాయం చేస్తుంది?

¹² దేవదూతల్లా మనం ఎలా సహనం చూపించవచ్చు? దేవదూతల్లాగే మనకు కూడా అన్యాయం, వ్యతిరేకత ఎదురవ్వచ్చు. అయినా వాళ్లలాగే, యెహోవా సరైన సమయంలో చెడుతనాన్ని తుడిచిపెట్టేస్తాడని మనం నమ్ముతాం. కాబట్టి నమ్మకమైన దేవదూతల్లాగే “మనం మానకుండా మంచిపనులు చేద్దాం.” (గల. 6:9) అంతేకాదు సహించేలా సహాయం చేస్తానని దేవుడు మాటిస్తున్నాడు. (1 కొరిం. 10:13) ఓర్పును-సంతోషాన్ని ఇచ్చే దేవుని పవిత్రశక్తి కోసం ప్రార్థించండి. (గల. 5:22; కొలొ. 1:11) మరి వ్యతిరేకత ఎదురైతే ఏం చేయాలి? కంగారుపడకుండా యెహోవా మీద పూర్తిగా నమ్మకముంచండి. ఆయన మిమ్మల్ని బలపరుస్తాడు, మీ వెన్నంటే ఉంటాడు.—హెబ్రీ. 13:6.

సంఘాన్ని పవిత్రంగా ఉంచడానికి దేవదూతలు సహాయం చేస్తారు

13. చివరి రోజుల్లో దేవదూతలకు ఏ ప్రత్యేకమైన పని ఉంది? (మత్తయి 13:47-49)

¹³ చివరి రోజుల్లో దేవదూతలకు యెహోవా ఒక ప్రత్యేకమైన పనిని అప్పగించాడు. (మత్తయి 13:47-49 చదవండి.) వేర్వేరు ప్రాంతాల్లో ఉన్న ఎన్నో లక్షలమంది ప్రకటనా పని వల్ల ఆకర్షించబడుతున్నారు. అయితే నిజక్రైస్తవులుగా అవ్వడానికి కొంతమంది మార్పులు చేసుకుంటారు, ఇంకొంతమంది చేసుకోరు. “నీతిమంతుల మధ్య నుండి దుష్టుల్ని వేరు చేసే” పని దేవదూతలకు ఇవ్వబడింది. అంటే సంఘాన్ని పవిత్రంగా ఉంచడానికి వాళ్లు సహాయం చేస్తారు. దానర్థం కొన్ని కారణాల వల్ల యెహోవాకు దూరమైపోయినవాళ్లు సంఘానికి అస్సలు తిరిగి రారని కాదు; లేదా సంఘంలో అసలు సమస్యలే ఉండవని కాదు. కానీ ఒకటి మాత్రం ఖచ్చితం, సంఘాల్ని పవిత్రంగా ఉంచడానికి దేవదూతలు చాలా కష్టపడి పనిచేస్తున్నారు.

14-15. సంఘాన్ని పవిత్రంగా ఉంచే విషయంలో దేవదూతల్లా మనం ఏం చేయవచ్చు? (చిత్రాలు కూడా చూడండి.)

¹⁴ సంఘాన్ని పవిత్రంగా ఉంచడానికి దేవదూతల్లాగే మనం ఏం చేయవచ్చు? సంఘాన్ని నైతికంగా, ఆధ్యాత్మికంగా పవిత్రంగా ఉంచడానికి మనవంతు మనం కృషిచేస్తూ ఉండాలి. దానికోసం మనం చేయాల్సిన ప్రాముఖ్యమైన పని, మన హృదయాన్ని కాపాడుకోవడం. అంటే యెహోవాను ప్రేమించేవాళ్లతో స్నేహం చేయాలి, యెహోవాతో ఉన్న సంబంధాన్ని దెబ్బతీసే దేన్నుండైనా దూరంగా ఉండాలి. (కీర్త. 101:3) మన తోటి బ్రదర్స్‌సిస్టర్స్‌ కూడా యెహోవాతో మంచి సంబంధం కలిగివుండేలా మనం సహాయం చేయవచ్చు. ఉదాహరణకు, ఎవరైనా ఘోరమైన పాపం చేశారని తెలిస్తే మనం ఏం చేయాలి? సంఘపెద్దలతో మాట్లాడమని వాళ్లకు ప్రేమగా చెప్పాలి. ఒకవేళ వాళ్లు అలా చెప్పకపోతే, మనమే సంఘపెద్దలతో ఆ విషయాన్ని చెప్పాలి. యెహోవాతో ఉన్న బంధాన్ని పాడుచేసుకున్న బ్రదర్స్‌సిస్టర్స్‌ ఎవ్వరికైనా వీలైనంత త్వరగా సహాయం అందాలని మనం కోరుకుంటాం.—యాకో. 5:14, 15.

¹⁵ విచారకరంగా, కొంతమంది ఘోరమైన పాపాలు చేసినందుకు సంఘం నుండి తొలగించబడతారు. అలాంటప్పుడు మనం వాళ్లతో ‘సహవాసం మానేయాలి.’d (1 కొరిం. 5:9-13) ఈ ఏర్పాటు వల్ల సంఘం పవిత్రంగా ఉంటుంది. అంతేకాదు, సంఘం నుండి తొలగించబడిన వాళ్లతో సహవాసం మానేయడం ద్వారా వాళ్లమీద ప్రేమ ఉందని చూపిస్తాం. ఈ విషయంలో మనం యెహోవాకు లోబడడం చూసినప్పుడు, వాళ్లు కూడా తిరిగి యెహోవా దగ్గరికి రావాలని అనుకోవచ్చు. అలా తిరిగొస్తే యెహోవా, దేవదూతలతోపాటు మనం కూడా సంతోషిస్తాం.—లూకా 15:7.

16. దేవదూతలకు ఉన్న ఏ లక్షణాల్ని మీరు చూపించాలి అనుకుంటున్నారు?

¹⁶ దేవదూతల నుండి నేర్చుకుని, వాళ్లతో కలిసి పనిచేసే గొప్ప అవకాశాన్ని యెహోవా మనకు ఇచ్చాడు. దేవదూతల వినయాన్ని, ప్రజలపట్ల వాళ్లకున్న ప్రేమను, వాళ్ల సహనాన్ని, సంఘాన్ని పవిత్రంగా ఉంచడానికి వాళ్లు చేసే కృషిని చూసి మనం ఎంతో నేర్చుకోవచ్చు. అలా మనం కూడా నమ్మకమైన దేవదూతల్లా ఉంటే, యెహోవా కుటుంబంలో శాశ్వతంగా ఉంటాం.