అధ్యాయము 72

యేసు 70 మందిని పంపుట

అది సా.శ. 32 శరత్కాలం యేసు బాప్తిస్మము తీసుకొని పూర్తిగా మూడు సంవత్సరాలు నిండినవి. యేసు మరియు ఆయన శిష్యులు ఈమధ్యే యెరూషలేములో పర్ణశాలల పండుగకు హాజరైరి, మరియు వారింకా ఆ సమీప ప్రాంతమందే ఉన్నారు. వాస్తవానికి, యేసు మిగిలియున్న ఆరు నెలల పరిచర్యలో అధికభాగమును ఆయన యూదయలో లేక పెరీయ జిల్లాలోని యొర్దాను నదికి ఆవలివైపున గడుపును. ఈ ప్రాంతములోకూడ సేవచేయవలసి యున్నది.

నిజమే, సా.శ. 30 పస్కాపండుగ తర్వాత యేసు యూదయలోనే ప్రకటించుచు షుమారు ఎనిమిది నెలలు గడిపెను. అయితే సా.శ. 31 పస్కాపండుగ రోజున యూదులు ఆయనను చంప ప్రయత్నించిన తర్వాత, ఆయన ఆ మరుసటి సంవత్సమున్నర విస్తారముగా గలిలయలోనే బోధించెను. ఆ సమయములో, ఆయన తనకు అంతకుముందు లేని ఒక పెద్ద మంచి-శిక్షణ పొందిన ప్రచారకుల వ్యవస్థను పెంపొందించెను. కావున ఆయనిప్పుడు యూదయలో చివరిసారిగా ప్రబలమైన ప్రచారదాడిని ప్రవేశపెట్టును.

యేసు ఈ ప్రచారపు పనికి 70 మంది శిష్యులనెన్నుకొని వారిని ఇద్దరిద్దరిగా పంపుటద్వారా మొదలుపెట్టును. అట్లు ఆ ప్రాంతములో సేవచేయు రాజ్యప్రచారకుల సంఖ్య మొత్తము 35 జట్లు ఆయెను. యేసు తన అపొస్తలులతో కలిసివెళ్ల తలంచిన ప్రతి పట్టణము మరియు ప్రాంతమునకు వీరు ముందుగనే వెళ్లుచున్నారు.

యేసు ఆ 70 మందిని సమాజమందిరములకు వెళ్లమని చెప్పుటకు బదులు, ప్రజల ఇండ్లకు వెళ్లమని చెప్పుచు ఇట్లనును: “మీరు ఏ ఇంటనైనను ప్రవేశించునప్పుడు, ‘ఈ ఇంటికి సమాధానమగు గాక’ అని మొదట చెప్పుడి. సమాధానపాత్రుడు అక్కడ నుండినయెడల మీ సమాధానము అతని మీద నిలుచును.” వారి వర్తమానమేమై యుండవలెను? “దేవుని రాజ్యము మీదగ్గరకు వచ్చియున్నదని వారితో చెప్పుడి” అని యేసు వారికి చెప్పును. ఈ 70 మంది ప్రచార విధానమునుగూర్చి, మాథ్యు హెన్రీస్‌ కామెంట్రి ఇలా వ్రాయుచున్నది: “వారి బోధకునివలెనే, వారెక్కడికి వెళ్లినను, వారు ఇంటింటను ప్రకటించిరి.”

అంతకుముందు సంవత్సరము ప్రచారము చేయుటకు 12 మందిని గలిలయకు పంపినప్పుడు వారికిచ్చినటువంటి ఉపదేశములనే యేసు ఈ 70 మందికిని ఇచ్చును. వారు ఎదుర్కొనబోవు వ్యతిరేకతనుగూర్చి ఈ 70 మందిని హెచ్చరించుటయే కాకుండ, యేసు గృహస్థులకు వర్తమానము చెప్పుటకును వారిని సిద్ధపరచి, రోగులను బాగుచేయు శక్తినికూడ ఆయన వారికి అనుగ్రహించును. ఆ విధముగా, కొద్దికాలమైన తర్వాత యేసుతిరిగి వచ్చినప్పుడు, ఆయన శిష్యులు అటువంటి ఆశ్చర్యకార్యములను చేయగలుగుచున్నందుకు, వారి బోధకుని కలిసికొనుటకు చాలమంది ఆతురతతో ఎదురుచూచెదరు.

డెబ్బయి మంది ప్రచారము చేయుటకు ఆ పిమ్మట యేసువారిని తిరిగి కలిసికొనుటకు కేవలము కొద్దికాలమే పట్టును. త్వరలోనే రాజ్య ప్రచారకుల ఈ 35 జట్లు యేసునొద్దకు తిరిగివచ్చెదరు. సంతోషముతో వారు, “ప్రభువా, దయ్యములుకూడ నీ నామమువలన మాకు లోబడుచున్నవని చెప్పిరి.” అటువంటి శ్రేష్ఠమైన సేవనుగూర్చిన వార్త నిశ్చయముగా యేసును పులకరింపజేసియుండును, ఏలయనగా ఆయన ఇట్లు ప్రతిస్పందించును: “సాతాను మెరుపువలె ఆకాశమునుండి పడుట చూచితిని. ఇదిగో, పాములను తేళ్లను త్రొక్కుటకును . . . మీకు అధికారము అనుగ్రహించియున్నాను.”

యుగాంతమందు దేవుని రాజ్యపుట్టుక తర్వాత, సాతాను అతని దయ్యములు పరలోకమునుండి పడద్రోయబడవలెనని యేసు ఎరిగియున్నాడు. అయితే ఇప్పుడు కేవలము మానవమాత్రులు అదృశ్యమైన దయ్యములను వెళ్లగొట్టుట, రానైయున్న ఆ సంఘటనను మరి నిశ్చయపరచుచున్నది. కాబట్టి, భవిష్యత్తులో ఖచ్చితముగా సాతాను పరలోకమునుండి పడిపోవునని యేసు మాట్లాడుచున్నాడు. అందువలన, ఆ 70 మందికి పాములను తేళ్లను త్రొక్కుటకు అధికారము ఇవ్వబడుట సూచనార్థక భావమును కలిగియున్నది. అయినను, యేసు ఇట్లు చెప్పును: “దయ్యములు మీకు లోబడుచున్నవని సంతోషింపక మీ పేరులు పరలోకమందు వ్రాయబడియున్నవని సంతోషించుడి.”

అంత శక్తివంతముగా తన ఈ దీనులైన సేవకులను ఉపయోగించుచున్నందుకు, యేసు ఎంతో ఆనందించి బహిరంగముగా తన తండ్రిని స్తుతించును. తన శిష్యులవైపు తిరిగి ఆయనిట్లనును: “మీరు చూచుచున్న వాటిని చూచు కన్నులు ధన్యములైనవి; అనేకమంది ప్రవక్తలును రాజులును, మీరు చూచుచున్నవి చూడగోరి చూడకయు, వినగోరి వినకయు ఉండిరని మీతో చెప్పుచున్నాను.” లూకా 10:1-24; మత్తయి 10:1-42; ప్రకటన 12:7-12.

▪ తన పరిచర్య కాలములో మొదటి మూడు సంవత్సరములు యేసు ఎక్కడ ప్రకటించెను, తన చివరి ఆరు నెలలలో ఏ ప్రాంతములో ఆయన సేవచేయును?

▪ ప్రజలను కనుగొనుటకు 70 మందిని యేసు ఎక్కడకు పంపును?

▪ సాతాను పరలోకమునుండి అప్పటికే పడిపోవుట చూచితినని యేసు ఎందుకు చెప్పును?

▪ ఏ భావముతో ఆ 70 మంది పాములను తేళ్లను త్రొక్కగలరు?