ఒత్తిడి నుండి బయటపడండి

ఒత్తిడికి కారణాలు

“చాలామంది తాము ఎక్కువ ఒత్తిడికి గురౌతున్నామని చెప్తున్నారు. నేడు జీవితంలో పరిస్థితులు ఎప్పటికప్పుడు మారిపోతున్నాయి, అనుకోని సంఘటనలు ఎక్కువైపోతున్నాయి” అని పేరుగాంచిన మేయో క్లినిక్‌ చెప్తుంది. మనల్ని ఒత్తిడికి గురిచేస్తున్న అలాంటి కొన్ని విషయాల్ని గమనించండి:

విడాకులు
ఇష్టమైనవాళ్లు చనిపోవడం
తీవ్ర అనారోగ్యం
పెద్దపెద్ద యాక్సిడెంట్లు
నేరం
ఉరుకులు పరుగుల జీవితం
ప్రకృతి విపత్తులు లేదా మనుషుల వల్ల కలిగే విపత్తులు
స్కూల్లో లేదా ఉద్యోగస్థలంలో ఉండే టెన్షన్‌లు
ఉద్యోగం, డబ్బు గురించి ఆందోళన

చిన్నవయసులో కలిగే ఒత్తిడి

పిల్లలు ఒత్తిడివల్ల బాధపడడం సహజమే. కొంతమందిని స్కూల్లో బాగా ఏడ్పిస్తారు, ఇంకొంతమందిని ఇంట్లో పట్టించుకోరు. మరికొందరినైతే శారీరకంగా, మానసికంగా, లైంగికంగా వేధిస్తారు. చాలామంది పిల్లలు పరీక్షల గురించి, మార్కుల గురించి ఆందోళన పడుతుంటారు. తల్లిదండ్రులు విడాకులు తీసుకోవడం వల్ల తమ కుటుంబం విచ్ఛిన్నమవ్వడం కూడా కొంతమంది పిల్లలు చూసి ఉంటారు. ఒత్తిడికి గురైన పిల్లలకు పీడకలలు రావచ్చు, దేన్నైనా నేర్చుకోవడం కష్టం కావచ్చు, వాళ్లు డిప్రెషన్‌లోకి వెళ్లవచ్చు, లేదా నలుగురిలో కలవడానికి వెనకాడవచ్చు. కొంతమంది తమ భావోద్వేగాలను (ఫీలింగ్స్‌ని) అదుపు చేసుకోలేకపోవచ్చు. ఒత్తిడితో బాధపడుతున్న పిల్లలకు వెంటనే సహాయం అవసరం.