యెహెజ్కేలు
30 తర్వాత యెహోవా వాక్యం మళ్లీ నా దగ్గరికి వచ్చి ఇలా అంది: 2 “మానవ కుమారుడా, ఇలా ప్రవచించు, ‘సర్వోన్నత ప్రభువైన యెహోవా ఇలా అంటున్నాడు:
“ ‘అయ్యో, ఆ రోజు వచ్చేస్తోంది!’ అని ఏడ్వండి.
3 ఎందుకంటే ఆ రోజు దగ్గరపడింది, అవును, యెహోవా రోజు దగ్గరపడింది.+
అది కారుమబ్బులు కమ్ముకునే రోజు,+ జనాలకు తీర్పుతీర్చే రోజు.+
4 ఐగుప్తు మీదికి ఒక ఖడ్గం వస్తుంది, ఐగుప్తులో శవాలు పడివున్నప్పుడు ఇతియోపియాకు భయం పట్టుకుంటుంది;
ఐగుప్తు సంపద దోచుకోబడుతుంది, దాని పునాదులు కూలిపోతాయి.+
5 ఇతియోపియా,+ పూతు,+ లూదు అలాగే ఇతర జనాల ప్రజలందరూ,
కూబు, ఒప్పంద దేశ ప్రజలు*
అందరూ ఖడ్గం వల్ల చనిపోతారు.” ’
6 యెహోవా ఇలా అంటున్నాడు:
‘ఐగుప్తు మద్దతుదారులు కూడా చనిపోతారు,
గర్వానికి కారణమైన దాని బలం అణచివేయబడుతుంది.’+
“ ‘మిగ్దోలు+ నుండి సెవేనే+ వరకు వాళ్లు దేశంలో ఖడ్గం వల్ల చనిపోతారు’ అని సర్వోన్నత ప్రభువైన యెహోవా ప్రకటిస్తున్నాడు. 7 ‘అది దేశాలన్నిట్లో అత్యంత నిర్జన దేశంగా చేయబడుతుంది, దాని నగరాలు అత్యంత నిర్మానుష్య నగరాలు అవుతాయి.+ 8 నేను ఐగుప్తులో అగ్ని రాజేసినప్పుడు, దానితో పొత్తు పెట్టుకున్నవాళ్లంతా నలగ్గొట్టబడినప్పుడు నేను యెహోవానని వాళ్లు తెలుసుకుంటారు. 9 ఆ రోజు నేను ఓడల మీద సందేశకుల్ని పంపించి, తనమీద తాను నమ్మకం పెట్టుకున్న ఇతియోపియా భయంతో వణికిపోయేలా చేస్తాను; ఐగుప్తు మీదికి ఆ రోజు వచ్చినప్పుడు వాళ్లకు భయం పట్టుకుంటుంది, ఎందుకంటే అది ఖచ్చితంగా వస్తుంది.’
10 “సర్వోన్నత ప్రభువైన యెహోవా ఇలా అంటున్నాడు: ‘నేను బబులోను రాజైన నెబుకద్నెజరు* ద్వారా ఐగుప్తు సైన్యాల్ని అంతం చేస్తాను.+ 11 అతనూ, జనాల్లో అత్యంత కిరాతకమైన అతని దండ్లూ+ ఆ దేశంలోకి వచ్చి దాన్ని నాశనం చేస్తారు. వాళ్లు ఐగుప్తు మీదికి కత్తులు దూసి, దేశాన్ని శవాలతో నింపేస్తారు.+ 12 నేను నైలు కాలువల్ని+ ఎండిన నేలగా చేస్తాను, ఆ దేశాన్ని దుష్టుల చేతికి అప్పగిస్తాను.* నేను విదేశీయుల చేత ఆ దేశాన్ని, దానిలోని సమస్తాన్ని నిర్మానుష్యం చేస్తాను.+ యెహోవానైన నేనే ఈ మాట చెప్పాను.’
13 “సర్వోన్నత ప్రభువైన యెహోవా ఇలా అంటున్నాడు: ‘నేను అసహ్యమైన విగ్రహాల్ని* కూడా నాశనం చేసి, నోఫులో* ఉన్న వ్యర్థమైన దేవుళ్లను అంతం చేస్తాను.+ ఇక ఐగుప్తు దేశంలో ఒక్క అధిపతి* కూడా ఉండడు, నేను ఐగుప్తు దేశంలో భయం పుట్టిస్తాను.+ 14 పత్రోసును+ నిర్మానుష్యం చేస్తాను, సోయనులో నిప్పు అంటిస్తాను, నో* మీద శిక్ష విధిస్తాను.+ 15 ఐగుప్తుకు బలమైన దుర్గంలా ఉన్న సీను మీద నా ఉగ్రత కుమ్మరిస్తాను, నో జనాభాను నాశనం చేస్తాను. 16 ఐగుప్తులో అగ్ని రాజేస్తాను; సీనుకు భయం పట్టుకుంటుంది, నోలో శత్రువులు చొరబడతారు, నోఫు* పట్టపగలే దాడికి గురౌతుంది! 17 ఓను,* పిబేసెతు యువకులు ఖడ్గం వల్ల చనిపోతారు, ఆ నగరాలు చెరపట్టబడతాయి. 18 నేను తహపనేసులో ఐగుప్తు కాడిని విరగ్గొట్టినప్పుడు పగలే చీకటి అవుతుంది.+ గర్వానికి కారణమైన దాని బలం అంతమౌతుంది,+ మేఘాలు దాన్ని కమ్ముకుంటాయి, దాని పట్టణాలు చెరపట్టబడతాయి.+ 19 నేను ఐగుప్తుకు శిక్ష విధిస్తాను, అప్పుడు నేను యెహోవానని వాళ్లు తెలుసుకుంటారు.’ ”
20 11వ సంవత్సరం మొదటి నెల ఏడో రోజున యెహోవా వాక్యం నా దగ్గరికి వచ్చి ఇలా అంది: 21 “మానవ కుమారుడా, నేను ఐగుప్తు రాజైన ఫరో చేతిని విరగ్గొట్టాను; అది బాగయ్యేలా దానికి కట్టుకట్టరు, అది మళ్లీ ఖడ్గం పట్టుకునేంత బలంగా తయారయ్యేలా దానికి పట్టీలు చుట్టరు.”
22 “సర్వోన్నత ప్రభువైన యెహోవా ఇలా అంటున్నాడు: ‘ఇదిగో నేను ఐగుప్తు రాజైన ఫరోకు వ్యతిరేకంగా ఉన్నాను,+ నేను అతని రెండు చేతుల్నీ అంటే బలమైనదాన్ని, విరిగినదాన్ని విరగ్గొట్టి,+ అతని చేతిలో నుండి ఖడ్గం పడిపోయేలా చేస్తాను.+ 23 తర్వాత నేను ఐగుప్తీయుల్ని జనాల మధ్యకు, దేశాల మధ్యకు చెదరగొడతాను.+ 24 నేను బబులోను రాజు చేతుల్ని బలపర్చి,+ నా ఖడ్గాన్ని అతని చేతిలో ఉంచుతాను;+ అయితే ఫరో చేతుల్ని నేను విరగ్గొడతాను, ఫరో అతని ముందు* చనిపోతున్నవాడిలా గట్టిగా మూల్గుతాడు. 25 నేను బబులోను రాజు చేతుల్ని బలపరుస్తాను, అయితే ఫరో చేతులు చచ్చుబడిపోతాయి; నేను బబులోను రాజు చేతిలో నా ఖడ్గాన్ని పెట్టినప్పుడు, అతను ఐగుప్తు దేశం మీదికి దాన్ని దూసినప్పుడు+ నేను యెహోవానని వాళ్లు తెలుసుకుంటారు. 26 నేను ఐగుప్తీయుల్ని జనాల మధ్యకు, దేశాల మధ్యకు చెదరగొడతాను;+ అప్పుడు నేను యెహోవానని వాళ్లు తెలుసుకుంటారు.’ ”