రాజులు రెండో గ్రంథం

16 రెమల్యా కుమారుడైన పెకహు పరిపాలనలోని 17వ సంవత్సరంలో, యూదా రాజైన యోతాము కుమారుడు ఆహాజు+ రాజయ్యాడు. 2 రాజైనప్పుడు అతని వయసు 20 ఏళ్లు, అతను యెరూషలేములో 16 సంవత్సరాలు పరిపాలించాడు. అతను తన పూర్వీకుడైన దావీదు చేసినట్టు తన దేవుడైన యెహోవా దృష్టిలో సరైనది చేయలేదు.+ 3 బదులుగా, అతను ఇశ్రాయేలు రాజుల మార్గంలో+ నడిచాడు; అతను, యెహోవా ఇశ్రాయేలీయుల ఎదుట నుండి వెళ్లగొట్టిన దేశాల అసహ్యమైన ఆచారాల్ని పాటిస్తూ,+ చివరికి తన సొంత కుమారుణ్ణి అగ్నిలో వేసి కాల్చాడు.*+ 4 అంతేకాదు, అతను ఉన్నత స్థలాల+ మీద, కొండల మీద, పచ్చని ప్రతీ చెట్టు+ కింద బలులు అర్పిస్తూ, వాటి పొగ పైకిలేచేలా చేస్తూ వచ్చాడు.

5 ఆ సమయంలోనే సిరియా రాజైన రెజీను, ఇశ్రాయేలు రాజూ రెమల్యా కుమారుడూ అయిన పెకహు యెరూషలేము మీద యుద్ధానికి వచ్చారు.+ వాళ్లు ఆహాజు ఉన్న నగరాన్ని ముట్టడించారు కానీ దాన్ని స్వాధీనం చేసుకోలేకపోయారు. 6 అప్పుడే సిరియా రాజైన రెజీను ఏలతును+ మళ్లీ ఎదోముకు అప్పగించాడు, తర్వాత అతను యూదుల్ని* ఏలతు నుండి వెళ్లగొట్టాడు. ఎదోమీయులు ఏలతు నగరంలోకి వచ్చి, ఈ రోజు వరకు అక్కడే ఉన్నారు. 7 అప్పుడు ఆహాజు, అష్షూరు రాజైన తిగ్లత్పిలేసెరుకు,+ “నేను నీ సేవకుణ్ణి, నీ కుమారుణ్ణి. నువ్వు ఇక్కడికి వచ్చి నా మీద దాడి చేస్తున్న సిరియా రాజు చేతి నుండి, ఇశ్రాయేలు రాజు చేతి నుండి నన్ను రక్షించు” అని సందేశం పంపించాడు. 8 ఆహాజు యెహోవా మందిరంలో, రాజభవన ఖజానాల్లో ఉన్న వెండిబంగారాల్ని తీసి అష్షూరు రాజుకు కానుకగా పంపించాడు.+ 9 దాంతో అష్షూరు రాజు అతని మనవి విని దమస్కుకు వెళ్లి దాన్ని స్వాధీనం చేసుకున్నాడు; అక్కడి ప్రజల్ని కీరుకు బందీలుగా తీసుకెళ్లాడు,+ రెజీనును చంపాడు.+

10 తర్వాత, ఆహాజు రాజు అష్షూరు రాజైన తిగ్లత్పిలేసెరును కలుసుకోవడానికి దమస్కుకు వెళ్లాడు. ఆహాజు రాజు దమస్కులో ఉన్న బలిపీఠాన్ని చూసి, దాని రూపురేఖల్ని, తయారీ విధానాన్ని వివరించే నమూనాను యాజకుడైన ఊరియాకు పంపించాడు;+ 11 దమస్కు నుండి ఆహాజు రాజు పంపించిన నిర్దేశాలన్నిటి ప్రకారం యాజకుడైన ఊరియా+ ఒక బలిపీఠం కట్టాడు.+ ఆహాజు రాజు దమస్కు నుండి తిరిగొచ్చే లోపే యాజకుడైన ఊరియా దాన్ని కట్టడం పూర్తిచేశాడు. 12 రాజు దమస్కు నుండి తిరిగొచ్చి బలిపీఠం చూశాడు, అతను దాని దగ్గరికి వెళ్లి దానిమీద అర్పణలు అర్పించాడు.+ 13 అతను ఆ బలిపీఠం మీద తన దహనబలుల్ని, ధాన్యార్పణల్ని అర్పించి వాటి పొగ పైకిలేచేలా చేస్తూ ఉన్నాడు; అంతేకాదు, దానిమీద పానీయార్పణల్ని పోశాడు, సమాధాన బలుల రక్తాన్ని చిలకరించాడు. 14 తర్వాత అతను మందిరం ముందు భాగంలో, యెహోవా సన్నిధిలో ఉన్న రాగి బలిపీఠాన్ని+ దాని స్థానంలో నుండి తీసేశాడు; అది అతను కట్టించిన బలిపీఠానికి, యెహోవా మందిరానికి మధ్య ఉండేది. అతను దాన్ని తీసి తన సొంత బలిపీఠానికి ఉత్తరం వైపున పెట్టించాడు. 15 అప్పుడు ఆహాజు రాజు యాజకుడైన ఊరియాకు+ ఇలా ఆజ్ఞాపించాడు: “పెద్ద బలిపీఠం మీద ఉదయకాల దహనబలిని, సాయంకాల ధాన్యార్పణను,+ రాజు దహనబలిని, ధాన్యార్పణను, అలాగే ప్రజలందరి దహనబలుల్ని, ధాన్యార్పణల్ని, పానీయార్పణల్ని దహించు.+ దహనబలుల రక్తాన్నంతటినీ, ఇతర బలుల రక్తాన్నంతటినీ నువ్వు దానిమీదే చిలకరించాలి. రాగి బలిపీఠం విషయానికొస్తే, దాన్ని ఏమి చేయాలో నేను నిర్ణయిస్తాను.” 16 ఆహాజు రాజు ఆజ్ఞాపించిన ప్రతీది యాజకుడైన ఊరియా చేశాడు.+

17 తర్వాత ఆహాజు రాజు, బండ్లకు ఉన్న పక్క పలకల్ని ముక్కలు చేయించి,+ వాటిమీద ఉన్న గంగాళాలు తీయించాడు;+ రాగి ఎద్దుల మీద ఉన్న సముద్రాన్ని తీయించి,+ రాళ్లు పరిచిన నేల మీద పెట్టించాడు.+ 18 మందిరంలో విశ్రాంతి రోజు కోసం కట్టిన మంటపాన్ని, అలాగే రాజు యెహోవా మందిరంలోకి వచ్చే ప్రవేశ మార్గాన్ని అతను మందిరం నుండి తొలగించాడు; అతను ఇదంతా అష్షూరు రాజు కోసం చేశాడు.

19 ఆహాజు మిగతా చరిత్ర, అంటే అతను చేసిన పనులు యూదా రాజుల చరిత్ర గ్రంథంలో రాయబడివున్నాయి.+ 20 తర్వాత ఆహాజు చనిపోయాడు;* అతన్ని దావీదు నగరంలో తన పూర్వీకులతోపాటు పాతిపెట్టారు; అతని స్థానంలో అతని కుమారుడు హిజ్కియా*+ రాజయ్యాడు.