PERGUNTA HUSI LEE-NAʼIN

Aliansa rua neʼebé Paulo temi iha Galásia 4:24 refere ba saida?

Bainhira apóstolu Paulo koʼalia kona-ba Abraão nia relasaun ho Sara no Agar, tuirmai nia hatete: “Buat sira-neʼe mak istória neʼebé sai hanesan símbolu, tanba feto rua neʼe reprezenta aliansa rua.” (Gal 4:​22-24) Uluk, ita komprende katak aliansa rua neʼe mak aliansa Ukun-Fuan nian no aliansa foun. Maibé, depois estuda fali eskritura neʼe, ami fiar katak presiza halo mudansa ba ita-nia kumpriensaun. Haree hanesan Paulo la koʼalia kona-ba aliansa foun, maibé kona-ba aliansa ho Abraão nian. Hanoin toʼok esplikasaun tuirmai.a

Paulo liga atan-feto Agar ho Foho Sinai. (Gal 4:25) Agar reprezenta aliansa Ukun-Fuan nian neʼebé ema Izraél simu iha Foho Sinai iha tinan 1513 AEC. (Éx 19:​5, 6) La iha ema sala-naʼin ida mak bele halo tuir Ukun-Fuan iha dalan perfeitu, no neʼe ajuda ema Izraél komprende katak sira mak atan ba sala. Aliansa neʼe mós ajuda nasaun Izraél atu hatene sé mak Mesias, tanba só nia deʼit mak bele halo tuir Ukun-Fuan ho perfeitu. Bainhira Mesias fó ninia moris nuʼudar sakrifísiu, neʼe loke dalan ba ema la perfeitu atu livre husi sala no mate. (Gal 3:​19, 24, 25) Kuandu Jesus kumpre ona Maromak nia hakarak, Ukun-Fuan la vale tan.—Rom 10:4.

Paulo kompara Agar ho Sara “feto neʼebé livre” neʼebé hahoris oan ida “liuhusi promesa”. (Gal 4:23) Promesa neʼe mak aliansa ho Abraão nian. (Gal 3:29; 4:​28, 30) Iha Génesis 22:​18, Jeová hatete ba Abraão: “Liuhusi ó-nia bei-oan mak nasaun sira hotu iha mundu sei hetan bensaun tanba ó rona ba haʼu-nia liafuan.”

Aliansa ho Abraão nian fó informasaun liután kona-ba promesa neʼebé Jeová halo iha jardín Eden. (Gén 3:15) Husi aliansa neʼe ita aprende katak “bei-oan” neʼebé fó sai nanis ona mai husi Abraão nia jerasaun. Paulo esplika katak parte primária husi “bei-oan” neʼe mak Jesus Kristu. Maibé “bei-oan” neʼe mós inklui sira neʼebé “Kristu nian”, neʼe mak ema naʼin-144.000 neʼebé sei ukun hamutuk ho Jesus iha lalehan. (Gal 3:​16, 29; Apok 14:​1-3) Ema neʼebé simu Jesus no halo tuir nia sei hetan bensaun barak liuhusi Maromak nia promesa ba Abraão.

Tanbasá Paulo temi “istória neʼebé hanesan símbolu”? Nia hakarak hatudu katak ema Judeu iha ninia tempu sei nafatin sai atan hanesan Agar se sira kontinua halo tuir Moisés nia Ukun-Fuan. Maibé, se sira simu parte primária husi Abraão nia “bei-oan”, katak Jesus Kristu, sira sei livre hanesan Sara. Sira sei hetan liberdade husi sala no mate. (João 8:​32-34) Se sira la simu Jesus, neʼe katak sira la komprende objetivu importante ba aliansa Ukun-Fuan nian, neʼe mak atu dirije sira ba Kristu.

Ema Kristaun barak iha Galásia mak laʼós ema Judeu no sira nunka tama iha Ukun-Fuan nia okos. Maibé ema Kristaun Judeu balu hakarak ema sira-neʼe atu halo tuir Ukun-Fuan, inklui halo sirkunsizaun. Paulo esplika katak neʼe la lójiku. Ema neʼebé laʼós Judeu la presiza sai “atan” ba Ukun-Fuan, tanba sira “livre ona” husi Ukun-Fuan.—Gal 5:​1, 10-14.